Աճը սպասվածից 10 անգամ պակաս է եղել

Արժույթի միջազգային հիմնադրամն հարապարակել է 2016 թվականի ամփոփ տնտեսական ցուցանիշներն ու հաջորդ տարվա կանխատեսումները: Հայաստանի տնտեսական պատկերն ու առաջիկա կանխատեսումները լավատեսության հիմք չեն տալիս: Այսպես. (ԱՄՀ հրապարակած զեկույցով՝ 2016 թվականը Հայաստանը փակել է իրական համախառն ներքին արդյունքի՝ՀՆԱ 0.2 տոկոս աճով։ Մինչդեռ նախորդ տարվա ապրիլին հրապարակված զեկույցի մեջ Արժույթի միջազգային հիմնադրամը Հայաստանի համար կանխատեսել էր առնվազն 1,9 տոկոս աճ: Դրան նախորդած  2015 թ.–ի հոկտեմբերյան զեկույցում ԱՄՀ–ն 2016 թ.–ին ակնկալում էր Հայաստանի ՀՆԱ–ի աճ` 2,2 տոկոսի չափով։ Փաստորեն կանխատեսումները չեն արդարացել. իրական աճը սպասվածից պակաս է եղել  մոտ 10 անգամ: 2017 և 2018 թվականների համար ԱՄՀ-ն Հայաստանում  կանխատեսվում է 2.9-ական տոկոսի աճ: Սա այս  տարվա գրեթե զրոյական աճի ֆոնին կարելի է գնահատել լավատեսական սպասում, այնուամենայնիվ՝ ԱՊՀ երկրների շարքում Հայաստանում սպասվող աճը  ամենացածրն է: ԱՄՀ-ն երկրները դասակարգել է երկու խմբով՝ էներգակիրներ ներմուծող և արտահանող:Էներգակիրներ ներմուծող երկրներում ամենամեծ տնտեսական աճը կանխատեսվում է Տաջիկստանում՝ 4.5 տոկոս 2017-ին, և 5 տոկոսի աճ՝ 2018-ին, այնուհետև գալիս են Մոլդովան, Վրաստանը, Ղրղըզստանը, Հայաստանը՝ 2.9 տոկոսով։ Ամենացածր կանխատեսումը վերաբերում է Բելառուսին, որտեղ 2017 թ. համար նշվում է 0.8 տոկոս անկում, իսկ 2018 թ.  0.6 տոկոս աճ: Էներգակիրներ արտահանող երկրներից 2017-2018 թվականներին ամենամեծ տնտեսական աճը կանխատեսվում է Թուրքմենստանում՝ 6 տոկոս, Ուզբեկստանում՝ 6 տոկոս, իսկ Ադրբեջանի համար, ընդհակառակը, 1 տոկոսի անկում է կանխատեսվում,  իսկ 2018-ին՝ 2 տոկոսի աճ: Ըստ զեկույցի, 2016-ին գործազուրկները կազմել են Հայաստանի տնտեսապես ակտիվ բնակչության ավելի քան 18 տոկոսը, գրեթե նույն ցուցանիշն ակնկալվում է 2017 և 2018 թվականների  համար: Սա ամենաբարձր ցուցանիշն է՝ ԱՊՀ երկրների շարքում որևէ այլ տեղ  գործազրկության մակարդակն  այսքան բարձր չէ:   Համեմատաբար հուսադրողը սղաճի ցուցանիշն է, ըստ զեկույցի, ԱՊՀ երկրների շարքում Հայաստանում սպասվում է  2 տոկոս սղաճ, որն ամենացածրն է ԱՊՀ երկրներում:Սղաճը ամենաբարձրն այս տարի սպասվում է Ուկրաինայում՝ 11.5 տոկոս, Ադրբեջանում՝ 10 տոկոս, Բելառուսում՝ 9.3 տոկոս: Ամբողջ ԱՊՀ տարածաշրջանում Արժույթի միջազգային հիմնադրամը դրական տեղաշարժ է արձանագրել.  Ընդհանուր  տարածաշրջանը փակել է 0.3 տոկոսի ՀՆԱ աճով, 2017-ին ակնկալվում է 1.7 տոկոսի աճ, և 2.1 տոկոսի աճ՝ 2018-ի համար։ Նախորդ զեկույցի կանխատեսումներն ավելի ցածր էին: Փաստացի Հայաստանում միջին ցուցանիշից էլ ցածր աճ է արձանագրվել: Փոխարենը ԱՄՀ-ն ԱՊՀ տարածաշրջանում իրավիճակը բարելավումը առաջին հերթին կապում է  Ռուսաստանում տնտեսական աճը վերականգնվելու  իրողության հետ. 2017 –ին ՌԴ-ում կանխատեսվում է  1,4% աճ, որի հիմքում նավթի միջազգային  գնի կայունացումն է ընկած:   Արման Վարդանյան