Չհիմնավորված «կապրիզներ» ու «պորտատեղադրում»
Ապրիլի 2-ի ընտրություններից հետո քաղաքական օրակարգային հարցերից մեկը դարձել է ՀՅԴ-ՀՀԿ կոալիցիոն հուշագրի վերաստորագրման հարցը: Մամուլում համառորեն լուրեր են շրջում, որ վարչապետ Կարեն Կարապետյանը դեմ է առհասարակ նման համագործակցությանը՝ համարելով դաշնակցականներին ավել ուտող բերան: Բայց քանի որ Սերժ Սարգսյանի որոշմամբ համագործակցությունն այլընտրանք չունի, Կարեն Կարապետյանին մնում է մի քիչ էլ իր պահանջները ներկայացնել: Ըստ մամուլի՝ նա պահանջում է Դաշնակցության նվազագույն ներկայություն կառավարության կազմում, իսկ որոշ անձանց հանդեպ ընդհանրապես մերժողական վերաբերմունք ունի, օրինակ Արծվիկ Մինասյանի: Պատմում էին , որ որոշ քննարկումներ մինչեւ անգամ ուղեկցվել են գոռգոռոցներով ու հայհոյանքներով: Եւ ահա, օրերս էլ լուրեր կան, որ վարչապետը ցանկանում է կանանցով փոխարինել դաշնակցական այրերին: Որ մի խնջույքի ժամանակ Կարեն Կարապետյանի կատակների հիմնական թեման եղել են դաշնակցականները, և հենց այդտեղ է նա ասել, թե մտածում է ՀՅԴ-ական նախարարներին կանանցով փոխարինելու մասին:Այն, որ ՀՅԴ-վարչապետ անհամաձայնություն կա, դրա մասին հաստատել է նաեւ ՀՅԴ Բյուրոյի ներկայացուցիչ Հրանտ Մարգարյանը, որը սակայն չսրելով իրավիճակը մամուլի հրապարակումներին անդրադառնալով Yerkir.am-ին ասել է, որ «ՀՅԴ-ն լարված հարաբերություններ ունի վարչապետ Կարեն Կարապետյանի հետ» նախադասության մեջ «լարվածություն»-ը շատ կոպիտ բառ է. «Բնականաբար, մարդիկ ենք, տեսակետներ ունենք, քննարկումներ են լինում, բայց, վերջիվերջո, կայացվում են որոշումներ: Համաձայնագրի տեքստը պատրաստ է, չստորագրելու պատճառ, որպես այդպիսին, չկա»,- հավելել է նա ու առիթը բաց չի թողել խայթելու Կարեն Կարապետյանին. « Ներկա չեմ եղել այդ թերթի մատնանշած խնջույքին, չգիտեմ՝ ով ինչ է ասել, բայց կարծում եմ, որ այն մարդիկ, ովքեր նման լուրեր են տարածում, այլ նպատակներ են հետապնդում: Ես չեմ ուզում այդ խաղին կուլ գնալ: Այդուհանդերձ կատակի ժամանակ կարելի է շատ բան ասել, բայց, միևնույն ժամանակ, կին նախարար ունենալը կատակելու բան չէ: Ի՞նչ վատ կլինի եթե անգամ վարչապետն էլ կին լինի: Մերկելը կին է, վա՞տ վարչապետ է: Դրա մեջ ոչ մի անպատեհություն չկա, զարմանալու բան չկա, 21-րդ դարում պետք է այդպես մտածել»,- թափանցիկ ակնարկել է ՀՅԴ Բյուրոյի ներկայացուցիչը: Գործադիրում ՀՅԴ-ական ներկայացուցիչների օգտակարության գորակցի ու արդյունավետ աշխատանքի մասին երկար կարելի է վիճել, այդուհանդերձ զարմանալի, նույնիսկ խիստ տարակուսանքի տեղիք է տալիս վարչապետի պահանջատիրությունը սոսկ ՀՅԴ-ականների նկատմամբ: Ի սկզբանե հայտարարվում էր, թե Կարեն Կարապետյանը տեխնոկրատների երիտասարդ թիմ է հավաքում, որոնք վարպետորեն տիրապետում են կառավարման ու մենեջմենթի նրբություններին, սակայն արդյունքում ի՞նչ պարզվեց, պարզվեց, որ այդ թիմը ձեւավորված է սոսկ ծանոթ, բարեկամ, ընկեր, փեսա, խնամի հարաբերությունների շրջանակում: Սեպտեմբերից այդ թիմի արդյունավետ կառավարման հետեւանքները առանձնապես չեն զգացվում, թեպետ վարչապետը մեծամեծ խոստումներ էր տալիս, թե դաշտն ազատականացվում է բոլորի համար, որ այսուհետ ով ցանկանա,ինչ ցանկանա ու երբ ցանկանա կարող է ներկրել , որ վերացվելու է բանանի ու մյուս մենաշնորհները եւ այլն եւ այլն: Վերադառնալով կանանց թեմային, հարց է առաջանում՝ իսկ ինչու Կարեն Կարապետյանը սեփական թիմը չի համալրում կանանցով, թե իր շրջապատում տեխնոկրատ կանայք չկան, բոլորը ճաշ եփողներ են: Անի Սահակյան