Ադրբեջան-Մոսկվա պլան, հայկական կողմը պետք է չնահանջի
Մոսկվայում ռուսական կողմի նախաձեռնությամբ ապրիլի 28-ին կազմակերպված Լավրով-Նալբանդյան-Մամեդյարով հանդիպումը հայկական կողմի համար հերթական հանդիպումներից էր։ Նման կարծիք հայտնեց քաղաքագետ Լեւոն Շիրինյանը՝ անդրադառնալով մոսկովյան հանդիպմանը։ Հանդիպումը կայացել է Ռուսաստանի արտաքին գործերի նախարարի հրավերով: Կողմերը քննարկել են ղարաբաղյան հիմնախնդրի կարգավորմանը վերաբերող հարցեր: Հանդիպման արդյունքներն ամփոփոխ հայտարարությամբ տեղեկացվում է, որ ընդգծվել է Վիեննայում և Սանկտ Պետերբուրգում 2016թ. ապրիլին և հունիսին կայացած գագաթաժողովներին ձեռք բերված համաձայնությունների իրականացման անհրաժեշտությունը: Նախարարները պայմանավորվել են շարունակել շփումները քննարկված բոլոր հարցերի առնչությամբ: Անցած տարի՝ ապրիլյան պատերազմից հետո նախագահների հանդիպման ընթացքում համանախագահող երկրների ներկայացուցիչների մասնակցությամբ Վիեննայում «պայմանավորվածություններ» ձեռք բերվեցին ղարաբաղաադրբեջանական սահմանին հետաքննող մեխանիզմների ներդրման, ինչպես նաև ԵԱՀԿ անձնական ներկայացուցիչ Անջեյ Կասպրշիկի առաքելության ընդլայնման հարցերի շուրջ, որից հետո միայն կշարունակեն խնդրի խաղաղ կարգավորման շուրջ բանակցությունները։ Սակայն մինչ օրս այդ պայմանավորվածություններից եւ ոչ մեկի հարցում որեւէ գործողություն չի սկսվել։ Քաղաքագետ Լեւոն Շիրինյանը կոչ է անում ՀՀ իշխանություններին չնահանջել և այդ պայմանավորվածություններից հետ չկանգնել․«Ակնհայտ է, որ Ադրբեջանը ցանկանում է շրջանցել այդ պայմանավորվածությունները, եւ ակնհայտ է, որ ուզում են Ռուսաստանի միջոցով այդ գործընթացը շրջանցել, բայց մենք ոչ մի թիզ չպետք է հետ կանգնենք»։ Ըստ քաղաքագետի, այդուհանդերձ հանդիպման մասնակցությունը դեռ չի նշանակում հետ կանգնել պայմանավորվածություններից․ «Նախագահը չի մասնակցել եւ, ինչպես հայտնում են, խոսք էլ չի եղել այդ մասին, մեր կողմը դա բացատրում է հենց այն հանգամանքով, որ Սերժ Սարգսյանը մնում է իր տեսակետին, այդ մեխանիզմները կտեղադրեն, նոր դրանից հետո կլինի նախագահների հանդիպում», ասաց մեր զրուցակիցը հավելելով, որ եթե ինքը լիներ ՀՀ արտգործնախարար, ինքն էլ չէր ներկայանա այդ հանդիպմանը․«Եթե այս անգամվա պայմանավորվածությունը չպիտի կատարենք, հետո հանդիպենք նոր բան պայմանավորվենք ու էլի չկատարենք, ինչ իմաստ ունի գնալը։ Պետք է ուղիղ կանգնել ու ասել այդ մասին, հատկապես, որ այս հարցում ունենք համանախագահների աջակցությունը» ,- ասաց Շիրինյանը՝ նշելով հանդիպումները դադարեցնելու համար ներկայացվելիք եւս մեկ փաստարկ․«Եթե հայ-ադրբեջանական սահմանին մի զինվորի քթից անգամ արյուն եկավ, ինքը պետք է ասի, որ չի մասնակցելու, ոչ թե տան, սպանեն, ինքը գնա, որ ինչ խոսի՞»։ Շիրինյանը չհամաձայնեց քննադատությունների հետ, որ Մոսկվան խնդրի կարգավորման նախաձեռնությունը վերցնում է իր ձեռքը, ասաց, որ ցանկացած քայլի դեպքում համանախագահողները «հասնելու» են մեզ: «Ռուսական կողմին մենակ թողելն անթույլատրելի է, մենք կզրկվենք մանեւրի հնարավորությունից»,- նշեց Շիրինյանը հավելելով, որ ժամանակն է Արցախի՝ բանակցությունների կողմ դարձնելու առաջարկով հանդես գալ։ Բաքուն Ռուսաստանից ԲՏՌ-ների նորխմբաքանակ է ստացել։ Այս առթիվ քաղաքագետից հետաքրքրվեցինք, չի նշանակում, որ Ռուսաստանը շարունակում է կողմնակալ դիրքորոշումը, սակայն Շիրինյանը նշեց, որ Բաքում միշտ էլ գնում է զենք․«Ռուսաստանը Բաքվի փողերն է վերցնում զենքի միջոցով, միեւնույն է մենք խփում ենք էդ զենքը, նորից են զենք առնում, էլի ենք խփում, ադրբեջանցիներն էլ օդի մեջ են ծախսում այդ միջոցները»։ Անի Սահակյան