Ումից «ազատագրել» Արմավիրը
Ապրիլի 2-ի ընտրություններից հետո քաղաքական օրակարգ է կրկին բարձրացել Արմավիրի մարզպետ Աշոտ Ղահրամանյանի պաշտոնաթողության հարցը: Խնդիր է դրված փոխելու մի քանի մարզպետի, որոնց թվում Արմավիրի: Ոստիկանության համակարգից մարզպետի աթոռին տեղափոխված Ղահրամանյանը այդ պաշտոնում է արդեն ավելի քան 10 տարի՝ 2006 թվականից, նա նաեւ Հայաստանի ամենատարեց մարզպետն է՝ 68 տարեկան: Ժամանակ առ ժամանակ շրջում է նրա հեռանալու մասին լուրերը, բայց նա կայուն է իր տեղում ու անսասան: Երերուն է, սակայն, մարզպետի համբավը: Մամուլն այս տարիներին տեղեկանում էր Ղահրամանյանի ծածուկ գործողությունների մասին, իր հաստատած ավանդույթների համաձայն ամենաչնչին հարցն անգամ լուծվում է մարզպետի անմիջական թողտվությամբ՝ դպրոցի ուսուցչի, տնօրենի, մանկապարտեզի դաստիարակի եւ մնացած բոլոր պետական հսկողության տակ գործող կառույցներում կարելի է աշխատանքի անցնել կամ անխռով աշխատել, եթե Ղահրամանյանի նյութական պահանջները բավարարվում են: Նա էլ իր հերթին է մարզում ֆեոդալական համակարգ հաստատել ու թուրը ճոճում է ամենուր: Բայց միշտ ջրից չոր է դուրս գալիս, պաշտոնում Աշոտ Ղահրամանյանի երկարակեցության գաղտնիքը ազդեցիկ ընկեր-բարեկամներն են: Վահրամ Բաղդասարյանի հետ քավորսանիկական կապ կա, մտերիմ է նաեւ Սերժ Սարգսյանի եղբոր՝ Լեւոն Սարգսյանի հետ: Տարիներ առաջ մամուլն անգամ գրել էր, որ մարզի գյուղապետերի հետ հանդիպումներից մեկի ժամանակ, երբ կրկին արդիական է եղել պաշտոնանկ լինելու հարցը, Ղահրամանյանը հայտարարել է, թե իրեն չեն հանելու աշխատանքից, այդ լուրերը շրջանառության մեջ են դնում իր չուզողները։ Որպես իր խոսքերի առհավատչյա՝ գեներալ մարզպետը հայտարարել է, թե «նախագահի հետ եկել եմ, նախագահի հետ էլ գնալու եմ, քանի ինքը կա, ես պրոբլեմ չունեմ, ով մեր հետ կաշխատի, նրա համար լավ կլինի, ով չի աշխատի, նրա համար վատ կլինի»։ Մամուլում գրվեց, որ Ղահրամանյանին կփոխարինի Գեներալ Մանվել Գրիգորյանի որդին՝Էջմիածնի քաղաքապետ Կարեն Գրիգորյանը: Գրիգորյանների մարզում ունեցած ազդեցությունը զգացել են թերեւս բոլորը, նրանք իրենց հռչակել են Արմավիրի ու հատկապես Էջմիածնի շրջանի տեր ու տնօրեն ու բոլորն ապրում են այնպես, ինչպես իրենք են ուզում: Օրինակ վարորդի անվադողերը կարող են հաշված րոպեների ընթացքում պատռվել, եթե նա հանդգնի կանգնալ Էջմիածնում այնպիսի մի վայրում, որը Գրիգորյանների կողմից չի խրախուսվում: Նրանց բարբարոսությունների մասին հատորյակներ կարելի է գրել: Իհարկե, Մանվել Գրիգորյանը պատրաստ կլինի որոշակի զոհողությունների գնալ որդուն այդ պաշտոնում տեսնելու համար, սակայն քիչ հավանական է, որ նման որոշում կկայացվի: Սերժ Սարգսյանի գործելաոճին ծանոթ ցանկացած ոք կարող է գրազ գալ, որ Կարեն Գրիգորյանը մարզպետ չի դառնա, քանզի Սերժ Սարգսյանը սիրում է հակակշիռների մեխանիզմը պահպանել քաղաքական ողջ համակարգում: Օրինակ Արարատի մարզում այդ բալանսը պահպանվում է Աբրահամյանների ու Գրիգորյանների միջոցով: Զուգահեռ խոսակցություններ կան, որ Արմավիրի մարզպետ կնշանակվի «Գազպրոմ-Արմենիա» ՓԲԸ Արմավիրի մասնաճյուղի տնօրեն Սաշա Մկրտչյանը՝ Գազի Սաշիկը, որի թեկնածության հարցում շահագրգիռ է Կարեն Կարապետյանը: Անի Սահակյան