Վարդենիսցի հեղինակության առեղծվածային մահը․ հերթական «զո՞հը»
Ժամեր առաջ հայտնի դարձավ, որ Գեղարքունիքի մարզի Վարդենիս քաղաքում հայտնի հեղինակություն Ռաֆայել Թադևոսյանը՝ Մեմիրի Ռաֆոն, ՔԿՀ-ում մահացել է։ Մահվան պատճառները դեռևս պարզվում են․ ՔԿՀ-ից ընդամենը հայտնում են, որ Ռաֆայել Թադեւոսյանի ինքնազգացողությունը վատացել է, շտապօգնության ավտոմեքենան ժամանել է և տեղում գրանցել կենասաբանական մահ։ Նրա 22 տարեկան որդին լսելով հոր մահվան լուրը ինքնասպանության փորձ է արել, այս պահին հիվանդանոցում է։ Ռաֆայել Թադևոսյանը բազմաթիվ քրեական պատմություններով է հայտնի, սակայն թշնամական հարաբերություն ուներ Հրաչ Մանուկյանի հետ։ Թադեւոսյանը ձերբակալվել էր անցած տարի ամռանը, երբ գտնվում էր հետախուզման մեջ։ Իսկ դրան նախորդել էին վարդենիսյան կլանային պատերազմները։ Դեռեւս անցած տարվա գարնանը մամուլը գրում էր այս երկուսի ղեկավարած «բանդաների» ռազբորկաների մասին կապված Գեղարքունիքի մարզի Սոթքի ոսկու հանքից գողացված հանքանյութի շուրջ։ Նշված երկուսին է թույլատրվել հանքանյութ հանել ոսկու հանքից, սակայն անցած տարի պարզվել է, որ ինչ որ բան այն չէ եւ պակասնորդ է եղել։ Սա լավ առիթ է դարձել Հրաչ Մանուկյանի եւ իր ազդեցիկ հովանավորի՝ Վարդենիսի ոստիկանապետ Համլետ Ղամբարյանի համար արանքից հանել Ռաֆայել Թադեւոսյանին։ Ոստիկանության բարձրաստիճան պաշտոնյան ու Հրաչ Մանուկյանը համատեղ գործունեություն են ծավալել հանքանյութի ոլորտում եւ ցանկացել մենաշնորհել ոլորտը, այս առիթով պարբերաբար «դեբոշներ» են սարքել Թադեւոսյանի կողմնակիցների հետ։ Հանքանյութերը կիսելու շուրջ զրույցներն այնքան են թեժացել, որ արյունալի դեպքի են վերածվել, բանը հասել է կրակոցներին, ու վիրավորվել է Վահե Մանուկյանը: Այս գործի շրջանակներում ողջ մեղքը բարդվել է Թադեւոսյանի վրա, վերջինս փախուստի է դիմել, հայտարարվել է հետախուզում ու հայտնաբերել են հունիսին։ Ամիսներ հետո, փաստորեն, Թադեւոսյանը դեռեւս չպարզված հանգամանքներում մահացել է։ Սակայն ուշագրավ է, որ ոսկու հանքանյութի շուրջ պայքարի ընթացքում դեռեւս 2014-ին Վարդենիսում սպանություն տեղի ունեցավ, քաղաքի Բանավան թաղամասում «ՎԱԶ-2121» մակնիշի ավտոմեքենայի մեջ սպանվել էր 33-ամյա Արման Մանուկյանը: Armlur.am-ի հետ զրույցում սպանվածի եղբայրը՝ Գրիշա Մանուկյանը, պատմել էր, որ կատարվածի մեջ մեղավորն իր հորեղբայրն է՝ Մյասնիկ (Հրաչ) Մանուկյանը, որը «բանդա» ունի Վարդենիսում. «Ամեն ինչ ոսկու հանքերից է սկսել: Մենք որոշեցինք ազգովի մի գործ անել: Աշխատում էինք ոսկու հանքում, ոսկի էինք հանում, կամաց-կամաց իրենք ցանկացան ոսկու հանքից հանքանյութ հանելու գործը կիսենք, էդպես վիճաբանություն եղավ: Ես ասեցի իրենց, որ եթե հանք մտնելու գործը կիսվի, ուրեմն ճիշտ պտի կիսվի, բայց քանի որ սխալ կիսվեց, ամեն ինչ դրանից էլ սկսվեց»: Այս համատեքստում խիստ կասկածելի է Թադեւսյանի մահվան հանգամանքները՝ արդյոք բնականոն մահով է գնացել, թե՞․․․ Հույս ունենալ, թե արդար ու օբյեկտիվ քննություն կընթանա, միամտություն է, քանի որ նման դեպքերում, երբ մեծ շահեր է հետապնդվում, մեծ է նաեւ լինելու կոծկելու ցանկությունը: Անի Սահակյան