Ագրամունտը հրաժարական կտա

ԵԽԽՎ նախագահ Պեդրո Ագրամունտը Սիրիա այցի պատճառով ԵԽԽՎ գարնանային նստաշրջանը մեկնարկեց սկանդալով: Ռուս խորհրդարանականների պատվիրակությունը՝ Պետդումայի փոխխոսնակ Վլադիմիր Վասիլեւի ղեկավարությամբ՝ Ագրամունտի հետ միասին մարտին այցելել էր Սիրիա ու հանդիպումներ ունեցել այդ թվում Սիրիայի նախագահ Բաշար Ասադի հետ։ Այցելության ընթացքում Ագրամունտը շեշտել էր, որ ինքը Սիրիա է ժամանել «մասնավոր բնույթի դերակատարումով, չներկայացնելով Վեհաժողովը»։ Սակայն ԵԽԽՎ շարքերում նրա այդ այցելությունը կոշտ քննադատություն էր առաջացրել։Նախօրեին ԵԽԽՎ աշխատանքները ընդհատվել էին, քանի որ խորհրդարանականները կոչ էին արել Վեհաժողովի քննարկմանը դնել Ագրամունտին անվստահության քվե հայտնելու հարցը։ Ագրամունտը ընդմիջում էր հայտարարել, որից հետո այլեւս չէր վերադարձել դահլիճ։ Երեքշաբթի Վեհաժողովում կայացել են լսումներ, որոնց ժամանակ ԵԽԽՎ նախագահին հարցեր են ուղղել Սիրիա կատարած այցելության մասին , մասնավորապես, ստեղծված պայմաններում նախագահի պաշտոնին գտնվելու հնարավորության վերաբերյալ։ Ագրամունտը չի պատասխանել խորհրդարականների կոչերից որեւէ մեկին՝ կրկնելով, որ «ուրբաթ հանդես կգա իր կարգավիճակի մասին հայտարարությամբ,ելնելով ներկա իրադրությունից»։ Եվրոպացի պատվիրակները կարծում են, որ Ագրամունտը Եվրոպայի սկզբունքներին դեմ քայլ է կատարել՝ այցելելով բռնապետ Ասադին: Քաղաքագետ Ստյոպա Սաֆարյանը վստահ է, որ եթե ԵԽԽՎ նախագահի հարցը ԵԺԿ-ից դուրս է եկել ու մտել  լիագումար նիստ, ապա  Ագրամունտի հրաժարականը այլընտրանք չի ունենա.<<Որպես կանոն նման խնդիրները լուծվում են անաղմուկ,ԵԺԿ-ում ամենեւին հիացած չեն, որ իրենց կողմից առաջադրված թեկնածուն հայտնվել է նման սկանդալի մեջ, ինչն իր հերթին նշանակում է, որ փորձել են ներքին կարգով հարցին լուծում տալ, բայց ինչ-ինչ պատճառներով  չի ստացվել>> ասաց Սսաֆարյանը հիշելով՝ անցած տարեվերջին, երբ քննարկվեց ԵԽԽՎ  նախագահի խնդիրը, Ագրամունդը կրկին առաջադրվեց, նրա թեկնածության հետ կապված խնդիրներ կային հենց ԵԺԿ-ի նիստում: <<Բայց Ագրամունդի թեւը կարծես հաղթեց եւ նշանակվեց այդ պաշտոնում>> : Քաղաքագետի կարծիքով Ագրամունտի Սիրիա այցը  ընկալվում է Եվրոպայի շահերի ու սկզբունքներին դեմ գնալու ու Ռուսաստանի հանդեպ եվրոպական երկրների դիրքորոշումը ոտնահարելու քայլ.<<Եւ բնական է, որ հենց այդ կոնտեքստում է հարցը քննարկվում. խնդիրն այն է, որ Ռուսաստանը օգտագործելով Ագրամունդի  հետ կապից ըստ էության նրա դիրքն օգտագործել է, ամրապնդել  Ասադի դիրքերը.<<Սա է պատճառը, որ Ագրամունդին չեն պատրաստվում ներել ու լվացքը հանվեց անգամ Վեհաժողով, քանի որ խմբակցությունում ըստ էության չէր հաջողվել լուծում տալ: Որքան էլ ԵԺԿ-ն ազդեցիկ լինի այնուամենայնիվ խոսքը վերաբերում է ամբողջ Եվրոպային ու մյուս խմբակցություններն էլ բնականաբար չեն պատրաստվում հանդուրժել>>: ԵԽԽՎ հայաստանյան պատվիրակությունը, ըստ Սաֆարյանի,  Ռուսաստանի գործոնի առկայության հանգամանքում լավագույն դեպքում լռություն կպահպանի..<<Թեպետ անցած տարի Սիրիայի հարցի վերաբերյալ բոլոր ելույթներում մեր պատվիրակությունը պաշտպանել է Ասադի շահերը , հիշենք եւ Հերմինե Նաղդալյանի, եւ Արփինե Հովհաննիսյանի ելույթներ, հետեւաբար այժմ կնախընտրեն լռել եւ կփորձեն ներկայացնել ադրբեջանական կոռուպցիոն սկանդալները, որոնց հետ նույնպես առնչվել է Ագրամունդի անունը, բայց եկեք հասկանանք, որ հիմնական խնդիրը Սիրիա կատարած այցի հետ է, որի առիթով էլ Ագրամունդը ներողամտություն հայտնեց, ասելով, որ դա իր անձնական դիրքորոշումն է, որ մանիպուլացրել են, որ ինքն ափսոսում է, չի կարողացել Բյուրոյին հայտնել, որովհետեւ Սիրիայում ինտերնետ չի եղել եւ այլն, եւ այլն>>: Հայկական պատվիրակությունը կարող է ուրախանալ, որ պրոադրբեջանական հայացքներ ունեցող Ագրամունտը  հեռանում է, բայց սա  ըստ մեր զրուցակցի ՝ չի լուծում հայկական ձախողված դիվանագիտության հարցը.<<Ագրամունտը կլինի, թե մեկ ուրիշը, պետք է հասկանալ, որ հայ-ադրբեջանական կոնֆլիկտը այնպիսի նշանակություն չունի Եվրոպայի համար, քան արեւմուտք-Ռուսաստան դիվանագիտությունը>>: Անի Սահակյան