ՀՀԿ-Ելք «տրանզիտ», ովքեր են ընդդիմադիր թեկնածուները

Խորհրդարանական ընտրությունների օրերին բազմաթիվ դեպքերի ականատեսը դարձանք, երբ որևէ թեկնածու տեղ չգտնելով որեւէ կուսակցության ցուցակներում, հանգրվանում էր մեկ այլ քաղաքական ուժի ցուցակ։ Ընդհանրապես սա ընդունված պրակտիկա է եղել ՀՀԿ-ԲՀԿ-ՕԵԿ շղթայում, թեկնածուները պարբերաբար ցուցակից ցուցակ են փոխանցվել, միայն այն բանի համար, որ մուտք գործեն խորհրդարան։ Խորհրդարանի նախորդ ընտրություններին եւս, երբ գործում էր մեծամասնական համակարգը, 41 մեծամասնական տեղերը բաշխվեցին ՀՀԿ-ի ու ԲՀԿ-ի թեկնածուների միջեւ, նրանց բոլորի ընտրությունը կատարվել էր մեկ վայրում, մեկ հոգու կողմից, ու ընտրական առաջադրումները կազմակերպվել էին այնպես, որ մեկը մյուսին չխանգարեն։ Ցուցակից ցուցակ տեղափոխվելու պրակտիկան կարծես ավանդույթ է դառնում։ Վերջին օրերին հանրության քննադատության թիրախում Ելք ընդդիմադիր դաշինքի թեկնածու Նելլի Ղարդյանը: Երիտասարդ աղջիկը ընդամենը Հանրապետական կուսակցության նախընտրական տեսահոլովակում ուրախ թռչկոտում, ցատկոտում ու սելֆի էր անում։ Նա ոչ ավել ոչ պակաս ՀՀԿ-ի հոլովակի գլխավոր դերակատարն էր,որը վարչապետ Կարեն Կարապետյանի նվագակցության ներքո ՀՀԿ-ի գովազդն էր անում։ Երբ բացահայտվեց նրա ինքնությունը, երիտասարդ աղջիկը փորձեց արդարանալ, թե տեղյակ չի եղել, որ այդ հոլովակը ՀՀԿ-ի համար է նկարվում, աչոնիկն ասում է, որ իրեն թվացել է, թե դա Ռեինկարնացիա խմբի հոլովակն է։ Իհարկե, դժվար է կշռել, թե որքան է լինելու նման անտեղյակ ավագանու աշխատանքի արդյունավետությունը, սակայն փաստն արդեն խոսուն է, որ Ելք-ում առանձնապես հարմարվել են աղջկա գոյությանը ու որեւէ պարզաբանում չեն ներկայացրել։ Մյուս կողմից՝ սա մեդալի երեւացող երեսն է, եթե Նելլին չնկարվեր հոլովակում, դժվար կլիներ պարզել նրա կապը ՀՀԿ-ի հետ, ըստ երեւույթին դաշինքում նա միակ ծպտյալ ՀՀԿ-ականը չէ, այդ պատճառով ոչինչ չի ձեռնարկվում։ Ելք-ի ավագանու 63 հոգանոց ցուցակում հայտնի անունները քիչ են, տղամարդիկ այստեղ գերակշռում են, թեկնածուներից միայն 18-ն են իգական սեռի ներկայացուցիչ, 25 հոգի գործազուրկ են, Սինոփսիս, Վիվասել ընկերության մի քանի մասնագետներ, մանկավարժներ եւ ՍՊԸ-ների ներկայացուցիչներ, ցուցակը եզրափակում է փաստաբան Նիկոլայ Բաղդասարյանը։ Երեւանի ավագանու ընտրություններին մասնակցող «Երկիր Ծիրանի» կուսակցության ցուցակում, որը ղեկավարում է Զարուհի Փոստանջյանը, 55 հոգուց գերակշռում են մանկավարժները, այստեղ 12 անկուսակցական կա, գործազուրկներ չկան։ Կան ծրագրավորողներ, փաստաբաններ, բժիշկներ, գործարարներ, ֆինանսիստներ, անգամ՝ բիոլոգ, աստվածաբան, թեկնածուները 21-71 տարիքային միջակայքում են, սակայն գերակշռում են միջին տարիքի մարդիկ։ Ամենաերիտասարդը Արամ Բադասյանն է՝ 21 տարեկան, ամենատարեցը գիտությունների դոկտոր Վահան Համազասպյանը՝ 71 տարեկան։ Մամուլը պարզել է նաեւ, որ ցուցակում ընդգրկված է Զարուհի Փոստանջյանի տեգոր աղջիկը, ուսանող Լիդիա Դրամպյանը, որը նաեւ անդամագրվել է «Երկիր Ծիրանի» կուսակցությանը: Անի Սահակյան