Ազատության գինը
Հայաստանի ամենահարուստ մարդկանցից մեկը, ֆինանսների պաշտոնաթող նախարար Գագիկ Խաչատրյանը նորից հայտնվել է։ Պաշտոնանկությունից հետո թվում էր, թե Գագիկ Խաչատրյանը կհայտնվի իրավապահների ուշադրության կենտրոնում, քանզի բացահայտվել էր նրա ահռելի վատնումների որոշ դրվագներ, բայց դրա փոխարեն Խաչատրյանին ուղարկեցին հանգստանալու, հիմա էլ հայտնվել է ու հոգեցունց հայտարարություններ է անում․«Ազատ ժամանակս էապես ավելացել է և հիմա ավելի շատ հնարավորություն ունեմ զբաղվելու Հայաստանում և Արցախում, հատկապես առաջնագծում իրականացվող այն կարևորագույն ծրագրերով, որոնք որդիներս սկսել էին դեռ շատ ավելի վաղ։ Ամեն իրականացված լուրջ քայլ բազմաթիվ նոր գաղափարներ է ծնում, և, հետևաբար, անելիքի պակաս չի լինում»,- ասել է Գագիկ Խաչատրյանը Tert.am-ին տված ծավալուն հարցազրույցում: Հարցազրույցի հիմնական «միտքը» հայրենանվեր գործի մասին աչքալուսանքն է, քանզի Գագիկ Խաչատրյանն իրեն ուղղված բազմաթիվ հարցերին՝ կապված վարչապետ Կարեն Կարապետյանի գործունեության, իրեն փոխարինող Վարդան Հարությունյանի սահմանած նոր աշխատաոճի եւ առհասարակ տնտեսական վիճակի մասին կարելի է ասել «գոլ» պատասխաններ է տվել, տողատակերում ակնարկելով միայն, թե չի կարծում, որ իրեն փոխարինողն իրենից լավ է աշխատում, ավելին ակնարկներ են հնչել, որ գործող ՊԵԿ ղեկավարի գործունեության հիմքում իր պաշտոնավարման ժամանակներում մշակված օրենսդրությունն է դրված։ «Էլեկտրոնային կառավարման արդիական համակարգի ներդրմամբ, օպտիմալացման գործընթացներով, օրենսդրական դաշտի քայլ առ քայլ կատարելագործմամբ, քաղաքականության իրականացման ժամանակակից մեթոդների որդեգրմամբ տարիների ընթացքում մեզ հաջողվեց հետևողականորեն բարելավել հարկեր/ՀՆԱ հարաբերակցությունը, որը համարվում է ստվերի դեմ պայքարի արդյունավետության կարևոր ցուցիչ։ Արդյունքում այսօր առկա է բավականին ամուր օրենսդրական և ինստիտուցիոնալ դաշտ էլ ավելի առաջ գնալու համար»,-պատասխանել է նա դիտարկում -հարցին, թե Վարդան Հարությունյանի կողմից կա խիստ հանձնարարություն, և առաջին քայլը համակարգը կաշառակեր և անառողջ էլեմենտներից մաքրելն է, Գագիկ Խաչատրյանը նկատել է նման էլեմենտներ իր ժամանակ։ Վերադառնալով Գագիկ Խաչատրյանի բուն ասելիքին՝ Արցախում ծավալած գործունեությանը, նախ հիշեցնենք նրա ունեցվածքի մասին, որի մասին տարիներ շարունակ մամուլը հիշատակել է։ Գագիկ Խաչատրյանին են պատկանում ՀԴՄ կտրոնների թուղթ մատակարարող «Ալեքսերվ» ընկերությունը, «Ապեյրոն» ՍՊԸ-ն (սննդամթերքի ներկրում), «Մեգաֆուդ» ՍՊԸ-ն (սննդամթերքի ներկրում և արտադրություն), «Մեգա մոթորս» ՍՊԸ-ն («Միցուբիշիի» ներկայացուցիչը ՀՀ-ում), «Սանտա ֆե» սրճարանը, «Գալաքսի» հացի գործարանը, «Մեգա սպորտ» խանութների ցանցը, «Խրոնոգրաֆ» թանկարժեք ժամացույցների խանութ-սրահը, «Չիմեգ» ՍՊԸ-ն, «Յուքոմ» ընկերությունը (արբանյակային հեռարձակում, ֆիքսված հեռախոսակապ, ինտերնետ), Ամասիայի կաթի գործարանը, «Ալյանս» մաքսային տերմինալը և այլն, և այլն, և այլն: Տասնյակ այլ բիզնեսներ գրանցված են նրա կնոջ, երկու զավակների, ազգականների կամ դրածո անձանց անուններով: Դղյակների, բնակարանների, տարածքների ու հողակտորների քանակությամբ մի ամբողջ վարչական միավոր կարելի է ձևավորել փոքրիկ Հայաստանում, ինչպես նաեւ Հայաստանից դուրս։ Մամուլում գրվեց անգամ, որ Խաչատրյանի տանը ֆիլիպիններից բերված մարդիկ են աշխատում, որպեսզի չբացահայտվի իր շեյխական կենսակերպը։ Ավելորդ է հիշել «Դիլիջան» ուսումնական կենտրոնը, որի մասին գրում ու խոսում էին տարիներ շարունակ, խոսքը մարդկային ուղեղի ծալքերում չտեղավորվող ծախսերի մասին էր, մի քանի հարյուր հազար դրամանոց օճառի ամաններ, միլիոն արժեցող զուգարանակոնքեր եւ այլն, որը, բարեբախտաբար պաշտոնանկությունից հետո վերցվեց Խաչատրյանից։ Հասկանալի է, որ Հայաստանի ամենաունևոր մարդկանցից մեկը այս ահռելի հարստությունը կուտակել է բացառապես պետական միջոցների յուրացման և վարչական լծակների կամայական գործադրման արդյունքում եւ հիմա էլ ինքնակամ չէ, որ առաջնագծի խնդիրներով է զբաղված, դա Խաչատրյանի ազատության գինն է, քանզի նորմալ երկրներում նման պաշտոնյան կհայտնվեր բոլորովին ուրիշ վայրում։ Սակայն Գագիկ Խաչատրյանի «հայտնությունը» առավել հետաքրքրական է քաղաքական առումով։ 2018-ի իշխանության համար մղվող պատերազմում կողմերը կարծես թե հավաքագրում են սեփական թիմը, մի կողմից Սամվել Կարապետյան-Կարեն Կարապետյան զույգը, մյուս կողմից Սերժ Սարգսյանն է իր շուրջ հավաքում իր բանակի երբեմնի «քաջ» զինվորներին։ Օրերս Հովիկ Աբրահամյանի հայտնությունը նշանավորվեց իշխանության հասցեին մեղմ գնահատականներով, հիմա Գագիկ Խաչատրյանը, այնինչ նրանց հեռանալուց հետո տեսանելի էր նեղացածների հոծ բանակ։ Սերժ Սարգսյանը, ըստ էության, հստակ երաշխիքներով նորից խաղի մեջ է ներքաշում՝ պատրաստելով նրանց վերադարձը։ Անի Սահակյան