Լուրջ խմորումներ` Հայաստանի սահմաններին մոտ

Ռուսաստանն ու Թուրքիան չնայած այն բանին, որ հարաբերությունները տնտեսապես բարելավելու խիստ ցանկություն ունեն, այնուամենայնիվ, Սիրիայի հարցում տարաձայնությունները պահպանվում են: Ինչպես հայտնի է, Էրդողանը ևս, ինչպես ԱՄՆ-ի նոր վարչակազմը կողմնակից է Ասադի հեռացմանը: Եվ այս մթնոլորտում ռուս-թուրքական հարաբերությունները կարող են ամեն պահի կարող են կրկին սրվել` սիրիական ճգնաժամի համատեքստում: ՌԴ նախագահ Վլադիմիր Պուտինը և Թուրքիայի նախագահ Թայիփ էրդողանը հեռախոսազրույցի ժամանակ քննարկել են մոտ ժամանակներում հնարավոր հանդիպման մասին: Այս մասին հայտարարել է ՌԴ նախագահի մամլո քարտուղար Դմիտրի Պեսկովը. «Մոտակա ժամանակներում հնարավոր հանդիպման մասին քննարկվել է վերջերս տեղի ունեցած հեռախոսազրույցի ժամանակ»: Ի դեպ, մեկ ուշագրավ տեղեկություն ևս. Սանկտ Պետերբուրգի մետրոյում կատարված ահաբեկչության ֆինանսավորումը իրականացվել է Թուրքիայից՝ միջազգային ահաբեկչական խմբավորման անդամների կողմից: Այդ մասին հետաքննության 10-րդ կասկածյալի՝ Աքրամ Ազիմովի ձերբակալության դատավճիռը հայտարարելու ժամանակ ասել է Մոսկվայի Բասմանյան դատարանի դատավոր Ելենա Լենսկայան: «Համաձայն գործի տվյալների՝ Աքրամ Ազիմովը Թուրքիայում անձամբ է ֆինանսական միջոցներ ստացել ահաբեկչության իրականացման համար: Նույն ինքը վերահսկել է կեղծ փաստաթղթերի ձևակերպումը հանցագործ խմբի անդամների և սահմաններն անխոչընդոտ անցնելու նրանց հնարավորության համար»,- ասել է դատավորը: Մյուս կողմից Միացյալ Նահանգներն եմ Թուրքիային, որպես տարածաշրջանի ռազմավարական գործընկեր` պահում տեսադաշտում, թեև Վաշինգտոն-Անկարա հարաբերություններում էլ ամեն ինչ հարթ չէ... Թուրքիայի նախագահ Ռեջեփ Թայիփ Էրդողանը և ԱՄՆ նախագահ Դոնալդ Թրամփը համատեղ հանդիպում կունենան մայիսի 16-ից 17-ը Վաշինգտոնում, թուրքական A News տեղեկատվական կազմակերպությանը հայտնել է հենց Էրդողանը: Երկու նախագահները կքննարկեն Սիրիայում ԴԱԻՇ-ի դեմ պայքարին վերաբերող հարցեր: Էրդողանը խիստ դժգոհ լինելով ԱՄՆ-ի նախորդ վարչակազմից` իհարկե ձգտում է Թրամփից ստանալ այն, ինչ չհաջողվեց Օբամայի օրոք, խոսքը վերաբերվում է թե՛ Գյուլենի արտահանձնմանը, թե՛ Սիրիայի քրդերին չաջակցելու հարցում ԱՄՆ-ից համաձայնություն ստանալուն: Թուրքիայի նախագահ Ռեջեփ Թայիփ Էրդողանը հայտարարել է, որ ԱՄՆ նախկին նախագահ Բարաք Օբաման խաբել է Անկարային և աջակցել սիրիացի քրդերի Ժողովրդավարական միություն կուսակցությանը (PYD)՝ չնայած առկա պայմանավորվածություններին: Էրդողանը պատասխանել է «Ալ-Ջազիրա» հեռուստաալիքի այն հարցին՝ արդյոք ԱՄՆ-ի վարչակազմը պատրաստ է հրաժարվել քրդական կուսակցությանը զենք մատակարարելուց: «Թրամփի հետ անձնական հանդիպման ժամանակ մենք կքննարկենք այդ հարցը, և ես փաստաթղթեր կներկայացնեմ: ԱՄՆ-ի և Թուրքիայի միջև PKK-ի դեմ պայքարելու համաձայնագիր կա, այն գործել է նաև Օբամայի նախագահության օրոք: Սակայն, ցավոք սրտի, նա խաբեց Թուրքիային… հույս ունեմ ԱՄՆ-ի նոր վարչակազմի դիրքորոշումն այլ կլինի»,-ասել է Էրդողանը: Միաժամանակ ԱՄՆ-ի ուշադրությունը նաև Իրանի ուղղությամբ է: ԱՄՆ նախագահ Դոնալդ Թրամփը Իտալիայի վարչապետ Պաոլո Ջենտիլոնիի հետ մամուլի ասուլիսում հայտարարել է, որ Թեհրանը չի հետևում Իրանի միջուկային ծրագրի հարցով համաձայնագրին: «Դա սարսափելի համաձայնագիր էր, այն չպետք է ստորագրվեր և չպետք է դրա շուրջ այնպիսի բանակցություններ ընթանային, ինչպիսիք եղել են»,-ասել է Թրամփը: Նրա խոսքով՝ ԱՄՆ-ը ուշադիր վերլուծում է համաձայնագիրը և շուտով հայտարարություն կանի այդ կապակցությամբ: Իր հերթին Է ԱՄՆ պետքարտուղար Ռեքս Թիլերսոնը ասել է, թե Իրանի սադրիչ գործողությունները սպառնում են ԱՄՆ-ին, տարածաշրջանին ու ամբողջ աշխարհին: «Իրանն աշխարհի առաջատարն է ահաբեկչությունը հովանավորելու ասպարեզում: Նա պատասխանատու է բազմաթիվ հակամարտությունների և այնպիսի երկրներում ԱՄՆ-ի շահերի խափանման համար, ինչպիսիք են Սիրիան, Եմենը և Լիբանանը, ինչպես նաև Իսրայելի վրա գրոհների շարունակվող աջակցության համար», ասել է Թիլերսոնը: ԱՄՆ-ի պետքարտուղարի խոսքով՝ «Իրանն ունի նույն այն ճանապարհն անցնելու ներուժը, ինչ և Հյուսիսային Կորեան, և աշխարհն ստիպված կլինի գործ ունենալ դրա հետ»: Մետաքսյա Շալունց