Սա մարտահրավեր է հասարակության եւ իշխանության համար

Պաշտպանության նախարար Վիգեն Սարգսյանը ապրիլի 20-ին իր ղեկավարած գերատեսչության նախաձեռնությամբ իրականացվող «Ազգ-բանակ» խորագրով համաժողովում հանրային քննարկման համար առաջ է քաշել երկու նախագիծ. մեկը՝ ժամկետային զինծառայության, մյուսը՝ բուհերի տարկետման և բարձրագույն կրթությամբ երիտասարդների միջոցով սպայակազմի համալրման վերաբերյալ: Նախագծերից մեկը կոչվում է «Պատիվ ունեմ», երկրորդը՝ Ես եմ: Ազգ-բանակ կոնցեպտը ՀՀ մարդու իրավունքների առաջին պաշտպան Լարիսա Ալավերդյանի համոզմամբ իրականանանալի  է: Տիկին Ալավերդյանը խորությամբ չի ծանոթացել ներկայացված ծրագրերին, սակայն մամուլից հպանցիկ տեղեկանալով է նման կարծիք հայտնում: Այդուհանդերձ հանրային ստվար զանգվածներ իշխանությունների նկատմամբ ունեցած անվստահության պատճառով, ինչպես նաեւ բանակում կոռումպացված ու անպատիժ մնացած գեներալների գոյության պայմաններում թերահավատորեն են մոտենում ազգ-բանակ կոնցեպտին: Լարիսա Ալավերդյանը ընդունելով այդ ամենը հիշեցնում է նաեւ ապրիլյան պատերազմը.<<Ես ասել եմ ու պիտի կրկնեմ՝ ապրիլի 2-ին ժողովուրդը կարողացավ քննությունը բարձր մակարդակով հանձնել, իսկ իշխանությունը՝ ոչ: Դա ժողովրդի իրական դեմքի դրսեւորումն էր: Նույնը այստեղ է, եթե ժողովուրդը վստահություն ունենա իշխանության հանդեպ, ապա նման ծրագրերը ավելի մեծ մարտահրավեր են իշխանությունների հանդեպ>>: Տիկին Ալավերդյանը մանրամասնեց,որ  ներկայացված երկու ծրագրերի հանդեպ ժողովրդն, անկասկած, հետաքրքրություն է ցուցաբերելու, հետեւաբար գնդակը լինելու է իշխանության դաշտում ու այդ առումով է, որ սեփական նախաձեռնությունը լինելու է մարտահրավեր իրենց դեմ.<Երկրորդը քաղաքացիական հասրակության մասին պետք է ասեմ, որ մարտահրավեր է նաեւ իր համար, կամ մենք նոր որակ ենք ձեռք բերում եւ ցանկացած իշխանությանը պարտադրում այնպիսի քայլեր, որոնք համապատասխանում են հասարակական եւ քաղաքական պահանջներին, այսինքն կարողանան լուծել ձեւավորված խնդիրները>>: Հիշեցնենք, որ այսօր Կարեն Դեմիրճյանի անվան մարզահամերգային համալիրում մեկնարկել է «Ազգ-բանակ-2017» խորագրով համաժողովը՝ նվիրված ռազմակրթական ոլորտի հիմնախնդիրներին: Համաժողովը կազմակերպել են ՀՀ պաշտպանության նախարարությունն ու ՀՀ կրթության և գիտության նախարարությունը: Համաժողովի մեկնարկին ելույթ ունեցան ՀՀ Նախագահ Սերժ Սարգսյանը և ՀՀ պաշտպանության նախարար Վիգեն Սարգսյանը։ Վերջինս համաժողովի ընթացքում ունեցած ելույթի ժամանակ ընդգծել է, որ հայրենասիրական դաստիարակությունն ամրապնդելու համար քաղաքացու մեջ առաջին հերթին պետք է ամրապնդել երկրի տիրոջ զգացումը: Անի Սահակյան