Ռուսական էլիտայի գլամուրն ու Արա Աբրահամյանի 60-ամյակը
Ապրիլի 16-ին Ռուսաստանի հայերի միության նախագահ Արա Աբրահամյանը տոնել է իր 60-ամյակը: Խնջույքին մասնակցելու համար Հայաստանի նախագահ Սերժ Սարգսյանը մի քանի ժամով մեկնել է Մոսկվա: Բարձրաստիճան հյուրերի թվում էին Ռուսաստանի արտգործնախարար Սերգեյ Լավրովը, Ռուսաստանի նախագահի մամուլի քարտուղար Դմիտրի Պեսկովը, քաղաքական գործիչ Վլադիմիր Ժիրինովսկին: Միջոցառումը աչքի է ընկել նաեւ աստղերի մասնակցությամբ: Ըստ RUSARMINFO-ի տեղեկությունների՝ ռուս էստրադային և օպերային հայտնի երգիչ Նիկոլայ Բասկովը հայտնի «Սիրո ամառ» երգը հայերեն երգել է Արա Աբրահամյանի 60-ամյա հոբելյանի առթիվ: Նրան շնորհավորել են նաև Ֆիլիպ Կիրկորովը, Գրիգորի Լեպսը և Թաթա Սիմոնյանը: Համացանցում Արա Աբրահիմովիչի շքեղագույն ծնունդը թիվ մեկ քննարկման թեմաներից է դարձել, աղքատ երկրի միլիրադատեր զավակների անամոթ զեխությունների հերթական դրվագը հրավիրել է բոլորի ուշադրությունը։ Ռուսաստանի հայերի միության ղեկավարը ադրբեջանցի հայտնի միլիարդատիրոջ Թելման Իսմայիլովի վարքուբարքի կրկնօրինակությամբ է տարված, սակայն բոլորիս է հայտնի նրա վերջը․․․ Ինչեւէ, ուշադրության է արժանի ռուսաստանցի չինովնիկների, բարձրաստիճան այրերի, ինչպես նաեւ Սերժ Սարգսյանի մասնակցությունը, որն ընդհանուր առմամբ ընդգծել է հայ-ռուսական հարաբերությունների պերճանքն ու թշվառությունը։ Ապրիլյան պատերազմից հետո հայ-ռուսական հարաբերություններում առաջացած խորը վիհի ու Հայաստանում հակառուսական տրամադրությունների խորացման պարագայում ակնհայտ է, որ Ռուսաստանը փորձում է վերականգնել իր ազդեցությունը եւ վարկանիշը տարածաշրջանում ու հատկապես Հայաստանում, ինչի դրսեւորումներից մեկն էլ Ռուսաստանի հայերի միության ղեկավարի ծննդյան տոնին բարձրաստիճանների մասնակցությունն է՝ ասել է թե վերաբերմունքի, տոնայնության վերանայում։ Բայց դրանով հանդերձ ում համար հայնտի չէ թե մասնակիցների, թե առհասարակ ռուսաստանյան բարձրաստիճանների վերաբերմունքը հայերիս ու Հայաստանի նկատմամբ։ Այնտեղ է Վլադիմիր Ժիրինովսկին, ով տարվա մեջ իր կապիկությունների ռեկորդներով անգերազանցելի է, մեկ Ադրբեջանի շահերով է մտահոգվում ու հարձակում գործում Հայաստանի վրա, մեկ հակառակը։ Հետեւաբար այս համատեքստում ավելին, քան ցինիզմ չի կարելի անվանել Ժիրինովսկու մաղթանքը։ Մի քանի ամիս առաջ ադրբեջանցիների համար էր կենացներ ասում Բաքվում, իսկ ծնունդին մաղթել է վերադարձնել Արարատն ու ճանաչել Արցախը։ Իսկ Պուտինի խոսնակը մաղթել է, որ Աբրահամյանը վերջապես սովորի ռուսերեն խոսել, ըստ երեւույթին ակնարկելով, որ այդպես Աբրահամյանը գուցե Կրեմլի համար դառնա առավել արդյունավետ աշխատող: Իհարկե Պեսկովի «սիրալիրությունը» ակնհայտ է Պուտինի՝ Արա Աբրահամյանի նկատմամբ հեգնական վերաբերմունքի դիմաց, ով տարիներ առաջ հայտնի միջոցառումներից մեկի ժամանակ բավական կոշտ կշտամբել էր Աբրահամյանին այն բանի համար, որ Ռուսաստանում 3 միլիոնից քիչ հայ է ապրում։ «Իհարկե, Պուտինը միշտ ճիշտ ա, բայց ես ասեմ` Ռուսաստանում, իրոք, ապրում է մոտ 3 մլն հայ», -հետո վախվորած արձագանքեց Աբրահամյանը, բայց եղածը եղած էր ու նա Պուտինի դեմ, ինչպես արդարության, երբեք չի մեղանչել։ Ում համար հայտնի չէ, որ Պուտինի էմիսարների համար խնդիրը ոչ միայն Աբրահամյանի, այլեւ հայ ժողովրդի ռուսերեն գերազանց իմացության մեջ է, այլեւ ռուսական մշակույթի սերտումը, որով էլ ավելի կհեշտանա իրենց «սպիտակ ջարդը»։ Պակաս ուշագրավ չէ նաեւ Սերժ Սարգսյանի մասնակցությունը, մի կողմից նա թույլ չի տալիս ռուսական դիրքերի ընդլայնումը Հայաստանում, վկան Աբրահամյանի քաղաքական հայտնի մերժումն է, մյուս կողմից պահում է հավասարակշռությունը՝ իր ներկայությամբ պահելով այդ շրջանակների հետ հարաբերությունները։ Անի Սահակյան