Իրանի կոշտ պահանջը Բաքվին` ԼՂ հարցով
Իրանի պաշտպանության նախարար Հոսեյն Դեհղանը երեկ Ադրբեջանի պաշտպանության նախարար Զաքիր Հասանովի հետ հանդիպման ժամանակ հայտարարել է, թե Հայաստանն ու Ադրբեջանը չպետք է թույլ տան, որ երրորդ ուժը միջամտի ղարաբաղյան հիմնախնդրի կարգավորմանը. «Հուսով եմ, որ Հայաստանն ու Ադրբեջանը ղարաբաղյան խնդրի խաղաղ կարգավորման հարցում վճռական կլինեն և երրորդ ուժը միջամտություն ու ճգնաժամի խորացում թույլ չտա»: Սա խիստ ուշագրավ հայտարարություն է, որովհետև պաշտոնական Բաքուն բացահայտ ռուսական աջակցություն է ակնկալում Մոսկվայից: Բայց պարզ է, որ Իրանը Ղարաբաղյան կարգավորման գործընթացում լինելով հավասարակշռված երկիր, մշտապես կողմնակից է եղել կայունության պահպանմանը: Պաշտոնական Թեհրանին ակնհայտորեն դուր չեն գալիս Ադրբեջան-Իսրայել ռազմավարական հարաբերությունները: Բացի այդ, Իրանը դեմ է, որպեսզի ղարաբաղյան գոտում խաղաղապահների տեղակայմանը, և պարզ է, որ այստեղ Թեհրանի անհանգստությունը հակասում է ռուսական հետաքրքրություններին, քանի որ Մոսկվան կուզենար խաղաղապահների տեղակայում ԼՂ-ի շուրջ: Ղարաբաղյան հակամարտությունը ռազմական լուծում չունի, կարգավորման համար կարևոր են բանակցությունները, հայտնել է օրերս Ադրբեջանում ԱՄՆ դեսպան Ռոբերտ Սեկուտան: «Ղարաբաղյան հակամարտության կարգավորման համար ծայրահեղ կարևոր են խաղաղ բանակցությունները: Հակամարտությունը ռազմական լուծում չունի: Կարևոր է, որպեսզի կողմերը միասին հավաքվեն և աշխատեն խաղաղ լուծման համար: Այս հակամարտությունն արդեն շատ երկար է տևում»,-ասել է դեսպանը: Դիվանագետի խոսքով՝ ԱՄՆ-ը ակտիվ աշխատում է ԵԱՀԿ Մինսկի խմբի միջոցով, որպեսզի կողմերին օգնի գտնել հակամարտության խաղաղ կարգավորման ուղի: Խոսելով ԵԱՀԿ Մինսկի խմբում ամերիկացի նոր համանախագահ Ռիչարդ Հոգլանդի մասին՝ դեսպանը նշել է, որ վերջինս աշխատանքի մեծ փորձ ունի ԱՄՆ պետական դեպարտամենտում, լավ տեղյակ է աշխարհի այդ հատվածից և նախկինում աշխատել է այդ հատվածի հետ: «Հոգլանդը էներգիայով լի և շատ ուժեղ խաղացող է, կարծում եմ, որ նա իրոք կարող է օգնել այս գործընթացը առաջ տանելու հարցում»,-հավելել է Սեկուտան: Շվեյցարիան աջակցում է ԵԱՀԿ Մինսկի խմբի ջանքերին՝ ուղղված արցախյան հակամարտության խաղաղ կարգավորմանը, ասել է Ադրբեջանում Շվեյցարիայի դեսպան Ֆիլիլ Շտալդերը: Նրա խոսքով՝ կողմերը պետք է նստեն բանակցությունների սեղանի շուրջ և ավելի արդյունավետ բանակցություններ անցկացնեն: «Ցանկացած հակամարտություն բացասական ազդեցություն է թողնում հարևան երկրների, ինչպես նաև ընդհանուր տարածաշրջանի վրա»,-նշել է դեսպանը: Ի դեպ, Ադրբեջանն այս օրերին` ապրիլի 16- 21-ը լայնածավալ զորավարժություններ է անցկացնում: Պաշտպանության նախարարությունը հայտնել է, որ ապրիլի 16-ին մեկնարկած զորավարժություններին ներգրավված է լինելու 30 հազար զինծառայող, ավելի քան 250 տանկ և զրահամեքենա, հրթիռա-հրետանային 200 համակարգ, այդ թվում՝ միաժամանակյա կրակի ռեակտիվ համակարգեր ու տարբեր տրամաչափի նռնականետեր, ինչպես նաև ռազմաօդային ուժերի տարբեր նշանակության 25 մարտական ինքնաթիռներ, ռադիոէլեկտրոնային հետախուզության նոր միջոցներ և անօդաչու թռչող սարքեր: Զորավարժություններում կատարվելու են բարդ ռելիեֆային պայմաններում զորամիավորումների մարտ մղելու և օպերատիվ գործողությունների սցենարներ: Մասնավորապես, զորքերի և հրամանատարական կետերի վերատեղակայումներ, ռեսուրսների մոբիլիզացիա, ստեղծվելու են հարվածային խմբեր՝ ընտրած ուղղություններով գրոհելու համար, հրթիռային և հրետանային համակարգերը դուրս են բերվելու կրակային դիրքեր, մարտական ինքնաթիռները օգտագործելու են նաև պահեստային օդանավակայաններ: Պաշտպանության նախարարության հաղորդագրությունում նշված է, որ լայնածավալ զորավարժությունների նպատակն է ստուգել զորքերի մարտական պատրաստվածությունը, կազմակերպել զինված ուժերի կառավարումն ու փոխգործակցությունը՝ գործողությունները մոտեցնելով մարտական իրավիճակի պայմաններին: Թամար Բագրատունի