«Ամեն րոպե շենքից քարերը փլվում են, լցվում են մեզ վրա» /տեսանյութ/

Սիսակյան 3 հասցեի 4-րդ կարգի վթարային շենքի 8 բնակիչներ բողոքում են, որ քաղաքապետարանը վերաբնակեցման ծրագրով իրենց հետ կնքած  պայամանգիրը խախտելով՝ պայմանավորվածից պակաս  սենյակներ ունեցող բնակարաններ է հատկացնում: «Ինձ, որպես փախստական, մի սենյակ են տվել Սիսակյան 3 հասցեում: Ընթացքում կողքի սենյակն էլ են հատկացրել, 20 տարի ապրել եմ, հիմա էլ ասում են՝ հանձնի քաղաքապետարանին: Ինը հոգով ենք ապրում, ինձ այսօր ընդամենը մեկ սենյականոց բնակարան են տալիս: Ինչպե՞ս են պատկերացնում` մենք ո՞նց ենք էդ մի սենյականոց բնակարանում ապրելու»,-Հայելի.am-ի թղթակցի հետ զրույցում պատմեց Իռա Սարդարյանը: Սարդարյանը այլև չի վստահում պատկան մարմիններին, բայց իր խոսքով՝ պայքարելու է մինչև վերջ: «Այս երկրում արդարություն չկա, մեզ համապատասխան փոխհատուցում չեն տալիս»,- ընդգծում է հուսահատ կինը: Բողոքողներից Մարինե Կարապետյանի ընտանիքին էլ որևէ բան չեն հատկացնում. «Իսկ ինձ ընդհանրապես որևէ բան չեն տալիս, ասում են` չի հասնում, բայց ինչի՞, չեմ հասկանում: Շենքն ամբողջությամբ կիսաքանդ վիճակում է, մի օր փուլ է գալու մեր գլխին, բայց այնպիսի պայմաններ չեն առաջարկում, որ համաձայնության գանք»,-նկատեց Կարապետյանը: «Ամեն րոպե շենքից քարերը փլվում են, լցվում են մեզ վրա: Շենքը իրար է գալիս, քանդվում է, բայց ոչ մեկի պետքը չէ: Սանհանգույց չկան շենքում, տանիք` ընդհանրապես»,- ասացին բնակիչները: Վերջիններս փաստում են, որ կամ պատկան մարմինները կլսեն իրենց, կամ իրենք կմնան վթարային շենքում՝ պատրաստ մահանալու քանդվող շենքի պատերի մեջ: Աստղիկ Ավագյան Մանրամասները՝ տեսանյութում: