Անիմաստ է սպասել, որ Թուրքիան հանրաքվեից հետո կգնա նոր քայլերի Հայաստանի հետ հարաբերություններում. Ռուբեն Սաֆրաստյան
«Սպասելի էր, որ էրդողանը հաղթանակ է տանելու, և բավական փոքր է լիելու ձայների տարբերությունը։ Մեծ քաղաքները, այդ թվում՝ Անկարան, Իզմիրը, Միջերկրական ծովի շրջանները դեմ են քվեարկել. սա հետաքրքիր է ու պետք է վերլուծության ենթարկել։ Ինչպես և սպասվում էր` քրդաբնակ շրջանները ևս դեմ են քվեարկել։ Այս բարեփոխումները Թուրքիայի բնակչությանը հոգեհարազատ չեն, և, ըստ էության, երկիրը բաժանվել է երկու հատվածի։ Թուրքիայի բնակչության այն հատվածը, որն ապրում է ավելի զարգացած պայմաններում, ավելի կիրթ է, դեմ է այս ամենին»,-լրագրողների հետ հանդիպմանը,անդրադառնալով Թուրքիայում Սահմանադրական փոփոխությունների հանրաքվեին,նման տեսակետ հայտնեց թուրքագետ Ռուբեն Սաֆրաստյանը: Թուրքագետը կարևորեց նաև քրդաբնակ շրջանների կողմնորոշումը. նրանք դեմ են արտահայտվել սահմանադրական փոփոխություններին. «Այս դեմ քվեներն ավելի շատ կարող էին լինել, եթե գլխատված չլիներ «Ժողովրդական-դեմոկրատական կուսակցությունը»: Նրանց ղեկավարները մեծ մասամբ բանտերում են, եթե այդպես չլիներ, «դեմ»-ի կողմնակիցներն ավելի շատ ձայներ կստանային»: Անդրադառնալով արտերկրում քվեարկության իրավունք ունեցող 5 մլն քաղաքացիներին՝ Սաֆրաստյանն ասաց, որ արտասահմանցի թուրքերը՝ հատկապես Գերմանիայում բնակվող թուրքերը, քվեարկել են կողմ: Նրա խոսքով`Թուրքիան վերադարձավ Աթաթուրքի շրջանին. «Թուրքիան սուլթանապետության չի վերածվի, բայց գնաց միանձնյա կառավարման ճանապարհով»։ Ինչ վերաբերում է Հայաստանին, ապա, ըստ նրա՝ Թուրքիայից նոր երևույթներ սպասել պետք չէ. « Հայաստանի նկատմամբ Թուրքիայի քաղաքականության մե փոփոխություններ սպասել պետք չէ:Հայաստանն այս պահին Թուրքիայի համար կարևոր նշանակություն չունի։ Էրդողանին պետք է այնպիսի Թուրքիա, որն իսլամամետ քաղաքականություն կվարի, ավելի ակտիվ կլինի միջազգային քաղաքականության մեջ, և սանձված կլինի իր կողմից»։
Հետևեք մեզ Viber-ում
