Առաջնահերթ է գողության դադարեցումը. Զարուհի Փոստանջյան
Առաջնահերթ է Երևանի քաղաքապետարանի համակարգում և դրանց ենթակա կառույցներում կոռուպցիայի դեմ պայքարը, գողության դադարեցումը, այս թվում՝ երևանցիների հանրային գումարների յուրացման: «Ազատություն» ռադիոկայանի եթերում այս մասին հայտարարել է Զարուհի Փոստանջյանը, ով «Կիրակնօրյա վերլուծական Հրայր Թամրազյանի հետ» հաղորդման հյուրն էր: «Խնդիրները բազմաշերտ են և բազմազան, չես կարող մեկը մատնանշել, … ծրագիրը կներկայացնենք հանրությանը, ծրագրի դրույթների իրականացում պետք է տեղի ունենա հենց առաջին օրվանից, առաջին ժամից, դա պետք է իրականացվի: Խնդիրները տարբեր են՝ քաղաքաշինությունից սկսված, տրանսպորտ, բնապահպանություն, կա կրթական ոլորտ, մանկապարտեզներ: Համակարգն ունի նաև արատավոր, կոռուպցիոն մեխանիզմներ, այնպես որ, բոլոր ուղղություններով պետք է պայքար մղես և, ըստ էության, ներդնես նոր համակարգ»,-ասել է Զարուհի Փոստանջյանն ի պատասխան մեկնաբանի այն հարցի, թե որն է լինելու քաղաքապետ ընտրվելու դեպքում առաջին աշխատանքային օրը Երևանի քաղաքապետարան գնացած Զարուհի Փոստանջյանի առաջին հրամանը, քայլը: Հիշեցնենք, որ «Երկիր ծիրանի» կուսակցության կողմից մայիսի 14-ի ընտրություններում որպես քաղաքապետի թեկնածու առաջադրվել է Զարուհի Փոստանջյանը, ով չմասնակցեց ապրիլի 2-ի խորհրդարանական ընտրություններին: Պատասխանելով հարցին, թե ինչու համապետական ընտրություններին չմասնակցեց, սակայն որոշեց մասնակցել Երևանի ավագանու ընտրություններին՝ Զարուհի Փոստանջյանը կրկնել է.«Հիմանական պատճառը, որ ես չմասնակցեցի այն, էր, որ ես գտնում էի, որ «Ժառանգությունը» պետք է մասնակցեր առանձին: Դա ոչ միայն ես եմ գտնում, այլև հանրահայտ է, որ քաղաքականությունը ծրագրեր են գաղափարախոսություն և սկզբունքներ, մինչդեռ «Ժառանգությունը» այդ սկզբունքների ներքո չգործեց և գնաց դաշինքային այդ համագործակցության ներքո պայքարի, որը չեմ կարծում, որ արդյունավետ է և այդ արդյունավետությունը բերեց նրան, որ մենք ունեցանք այսպիսի պատկեր»,– ասել է նա: Հրայր Թամրազյանի այն հարցին էլ, թե ինչպես վերաբերվել «Ժառանգությանը», այն կա, թե չկա, Զարուհի Փոստանջյանը պատասխանել է. «Դուք կհրավիրեք իրենց ներկայացուցիչներին և նրանք Ձեզ կբացատրեն»: Զարուհի Փոստանջյանն արձանագրել է նաև, որ «Ժառանգությունն» իր համար այլևս անցյալում է: Ինչ վերաբերում է հարցին, թե ինչպես է իբրև քաղաքապետ Զարուհի Փոստանջյանը հաշվի նստելու կառավարության հետ, Զարուհի Փոստանջյանը, չբացառելով այս սցենարը, ասել է, որ հաշվի նստել չի նշանակում զիջել: «Այսինքն՝ սա միջավայր է, որտեղ դու ամեն ինչ պետք է հիմնահատակ փոխես և այդ քանդված համակարգը սկսես վերականգնել: Նաև մաքրել: Մենք նաև խնդիր ունենք մաքրելու այդ տարածքը, որովհետև այն փչացած է և վերից վար կոռումպացված»,- ասաց ընդդիմադիր կուսակցության ներկայացուցիչը: Նա հակադարձելով Երևանի քաղաքապետ, քաղաքապետի թեկնածու Տարոն Մարգարյանի նախընտրական շտաբի պետ Էդուարդ Շարմազանովին, հակադարձել է՝ «Ես այն կարծիքին չեմ, որ Երևանը կանաչապատված է, այգիներ են հիմնադրվել և Երևանը այնպիսի քաղաք է, որը հաճելի է ապրելու համար: Մենք ձմռանն էլ ենք ապրում Երևանում, ամռանն էլ և տեսնում ենք՝ ինչ է տեղի ունենում փողոցներում, հանրային տրանսպորտն ինչպես են աշխատում, խցանումներն ինչպիսին են»: Երևանի քաղաքապետի թեկնածուի ախտորոշմամբ՝ Երևանում, իր ձևակերպմամբ՝ քաոտիկ շինարարությունը, որը փոխել է քաղաքի դեմքն ու դիմագիծը, նույնպես կոռուպցիայի ու ապաշնորհ ղեկավարման հետևանքն է:
Հետևեք մեզ Viber-ում
