Ծառուկյանը պնդե՞ց, թե Սերժ Սարգսյանը «վռնդեց»

Փետրվարյան հայտնի իրադարձություններից հետո ԲՀԿ-ից հեռացած ու ՀՀԿ-ում ապաստան գտած պատգամավորները ապրիլի 2-ի ընտրություններից հետո հայտնվել են անհարմար վիճակում։ Հիշեցնենք, որ երկու տարի առաջ, երբ Սերժ Սարգսյանը ՀՀԿ խորհրդի հայտնի նիստում ունեցավ հանրահայտ ելույթը, իսկ դրան հաջորդեց Գագիկ Ծառուկյանի քաղաքականությունից հարկադիր հեռացումը, նավը խորտակվելուց առաջ ԲՀԿ-ն լքեցին բազում կուսակցականներ՝ Բազմասեր Առաքելյանը, Մարտուն Գրիգորյանը, Մուշեղ Պետոյանը, Արայիկ Աղաբաբյանը, Հարություն Ղարագյոզյանը՝ Կարամելի Հարութը, Արագած Ախոյանը, Դավիթ Քոչարյանը, Կարո Կարապետյանը՝ Յուվեցի Կարոն, Ռուստամ Գասպարյանը եւ այլք, մի քանիսը հետո «անառակ որդու» օրինակով հետ վերադարձան՝ Արայիկ Աղաբաբյանը, Կարամելի Հարութը, բայց մեծ մասը տեղ գտավ իշխանության հովանու ներքո, որտեղից էլ ոմանց հրահրել էին դուրս գալ ԲՀԿ-ից ու թուլացնել այդ ուժը։ Ուշագրավ է, որ նրանք, ովքեր ընդմիշտ հեռացել են ԲՀԿ-ից ու խզել կապը Գագիկ Ծառուկյանի հետ, առանց բացառության իրենց տեղը չեն գտել, Ռուստամ Գասպարյանին, Դավիթ Քոչարյանին, Կարո Կարապետյանին մամուլի տեղեկությունների համաձայն ընդհանրապես թույլ չտվեցին առաջադրվել, իսկ ովքեր էլ առաջադրվել են ՀՀԿ-ի ռեյտինգային ցուցակով հաջողության չեն հասել։ Արագածոտնի մարզում նախկին ԲՀԿ-ական երկու թեկնածու էր ընդգրկվել ՀՀԿ ցուցակում՝ Արագած Ախոյանն ու Բազմասեր Առաքելյանը, նրանք համապատասխանաբար հավաքել են 2443 և 4443 ձայն, սակայն Բազմասեր Առաքելյանի ձայները օրեր առաջ 7 հարյուրով էլ պակասեցրեցին, քանի որ նրա հարազատ Փարպի գյուղի ընտրությունները չեղյալ հայտարարվեցին՝ հաստատված խախտումների հիման վրա։ Այս թեկնածուն ի տարբերություն Ախոյանի իշխանության բարձրաստիճան հովանավորներ ուներ՝ ի դեմս Պաշտպանության նախարար Վիգեն Սարգսյանի, որի ուղղորդմամբ մարզի զորամասերում քվեարկել էին իր սանիկ Առաքելյանի օգտին։ Այս մարզից ամենաշատ ձայները ստացել է նախկին մարզպետի եղբայրը՝ Նաիրի Սահակյանը։ Շիրակի մարզում անակնկալ պարտություն կրեց նաեւ Մարտուն Գրիգորյանը, որն ամենասերտն էր հարաբերվում իշխանությունների հետ ու կապեր ունի Շիրակի մարզի քրեական հեղինակությունների հետ։ Մարտուն Գրիգորյանը անցած աշնանը ցանկանում էր Գյումրիի քաղաքապետի ընտրություններում առաջադրվել, բայց նրան համոզեցին հետ կանգնել ու Սամվել Բալասանյանի հետ փոխանակվեց։ Մարտուն Գրիգորյանը ՀՀԿ թեկնածուների շարքում երրորդն է 10700 ձայնով, զիջում է Արման Սահակյանին ու Ֆելիքս Ցոլակյանին։ Այս մարզում նախկին ԲՀԿ-ական եւս մեկ թեկնածու կար, Մուշեղ Պետոյանը՝ 8799 ձայնով նա հաջորդում է Մարտուն Գրիգորյանին, այնինչ Շիրակից ՀՀԿ-ն ընդամենը երկու պատգամավոր է ունենալու։ Եթե կարողանան համոզել, որ Ֆելիքս Ցոլակյանը վերադառնա նախկին պաշտոնին՝ նախագահի վերահսկողական պետ, ապա Գրիգորյանի բախտը կժպտա, եթե ոչ, ապա նա եւս դուրս կմնա խորհրդարանից։ Ակնհայտ է, որ այս թեկնածուների նկատմամբ իշխանության բարեհաճությունը չզգացվեց, այլապես այլ դասավորվածության մեջ կլիներ նրանց առաջադրումները ու արդյունքներն էլ այլ կլինեին։ Հիմա հարց է՝ այս իրավիճակը Սերժ Սարգսյան-Գագիկ Ծառուկյան պայմանավորվածության արդյունք է, թե Սերժ Սարգսյանը առանձնապես չի կարեւորել նրանց հարցը։ Անի Սահակյան