Խոսրովի քծնանքն ու ախորժակը

Հայաստանի քաղաքական երկնակամարում շողացող աստղաբույլում իր վառ լույսով մշտապես փայլում է նախկին վարչապետ  Խոսրով Հարությունյանը: Այս տեսակի համար  կա ասպարեզում մնալու անհագուրդ ցանկություն, որն իրականություն են դարձնում ցանկացած գնով; Նրանք իրենց պատվիրաններն ունեն՝ ծառայել ընդմիշտ,անվերապահ  տերերին, չնահանջել որեւէ իրավիճակում՝  հանրային շահը դիտարկելով լոկ իշխանության կամքի ու ցանկության տիրույթում,այս պատվիրաններին հավատարմության մեջ է տեսակի մշտակայունության գրավականը: Ընդ որում՝ նրանց համար ամենեւին էլ կապ չունի, թե ով է քծնանքի ու փառաբանման օբյեկտը, դա կարող է լինել ցանկացած մեկը, ով այդ պահին թամբին է , եղանակ փոխելու ունակ, օրակարգ թելադրող: Ահավասիկ վերջին ժամանակներում Խոսրով Մելիքիչի մոտ նկատելի սրացումներ են, տեղից տեղ է գնում, հարցազրույց ու ասուլիս տալիս՝ երկրպագելու աստիճան գովերգում վարչապետ Կարեն Կարապետյանին ու ոչ միայն: Բայց նկատելի է, որ նրա համար այս ժամանակների կուռքը վարչապետն է, որը անվերապահ դերակատար է քաղաքական պրոցեսների: Իսկ հիմա խորհրդարանի ընտրություններից հետո դաշտը վերաձեւվում է, նոր պաշտոններ, նոր նշանակումներ ու, բնականաբար, ցանկություններ… Մինչ ՀՀԿ-ականները մեջներից կիսվում են խորհրդարանի ընտրություններում իրենց հաղթանակը վերագրելով թիմին ու նոր ընտրակարգին, որը Սերժ Սարգսյանի նախաձեռնած սահմանադրական փոփոխությունների արդյունք էր, Խոսրով Հարությունյանը  թմբկահարում է Կարեն Կարապետյանի հեղինակության մասին: Ըստ նրա` ՀՀԿ-ի հաղթանակին նպաստել է Կարեն Կարապետյանի վարկանիշը:Հարությունյանը կարծիքով ՀՀԿ-ի առավելությունն այն էր, որ նախապես հայտարարեց իր վարչապետի անունը: «Բոլորը գիտեին` ով է լինելու ՀՀԿ-ի վարչապետը: Հաշվի առնելով որ անցում ենք կատարել խորհրդարանական համակարգին, որում վարչապետը դառնալու է առանցքային ֆիգուր ընտրողի համար կարևոր էր կոնկրետ պաշտոնյան կամ պաշտոնյաններն ովքեր են: նախընտրական պայքարի շրջանում պետք է հայտնի լինեն անկյունաքարային պաշտոնները զբաղեցնողների անունները»,- օրերս շատ հստակ ու կոնկրետ հայտարարեց նա, ով երբեւէ հանդես չի եկել նման կոնկրետությամ մեջ: Քանզի Մելիքիչի հմայքը անվերջ խոսելու, գեղեցիկ բառեր հնչեցնելու, բայց միեւնույն ժամանակ խնդրի էությունը շրջանցելու, լղոզելու մեջ է: Ճիշտ եւ ճիշտ Արփինե Հովհաննիսյանի տղամարդ տեսակ: Հասկանալի է, որ առավել եւս այս կոնկրետ փառաբանումը հենց այնպես չի արվում: Քաղաքական կուլիսներում արդեն խոսում են, որ Խոսրով Հարությունյանի աչքը ԱԺ տնտեսական հանձնաժողովի նախագահի պաշտոնն է: Նախկին վարչապետի ախորժակը միշտ տեղն է, հիմա, երբ Վարդան Այվազյանի խորհրդարան անցնելը խիստ կասկածի տակ է, քանզի նա Կոտայքում ռեյտինգային թեկնածուներից չորրորդն է իր հավաքած ձայներով, Հարությունյանը փորձում է իր տեղը տեսնել: Տարիներ շարունակ Այվազյանն է ղեկավարել այդ կարեւոր հանձնաժողովը, այստեղ են հաստատում կամ մերժում երկրի տնտեսական կյանքին վերաբերող օրենքները, որոնք ներկայացնում է կառավարությունը: Թե ՀՀ նախագահը, թե վարչապետը կարող են պայքարել հանձնաժողովում յուրայինին տեսնելու համար, քանի որ տվյալ անձի ղեկավարությամբ են սղղացվելու խնդրահարույց օրինագծերը, կամ մերժվելու դրանք: Տարիներ շարունակ Վարդան Այվազյանը ուղիղ կապի մեջ է եղել Սերժ Սարգսյանի հետ եւ կարողացել է խնդիրներ չառաջացնել: Կկարողանա Խոսրով Հարությունյանը դիմանալ գայթակղություններին ու առաջնորդել պետության ու հանրության շահից, խիստ կասկածելի է: Անի Սահակյան