Рецепт счастья. Կարեն Կարապետյանն այդ հարցի պատասխանը կարող է ստանալ Բարսեղ Բեգլարյանից
Վարչապետ Կարեն Կարապետյանը սկսել է նախարարություններ այցելելու շարքը և առաջինը այցելել է գյուղատնտեսության նախարարություն: Ըստ կառավարության պաշտոնական կայքէջի՝ տեղի ունեցած խորհրդակցության ընթացքում ներկայացվել են գերատեսչության ընթացիկ ծրագրերը, միջազգային համագործակցության արդյունքները, ոլորտի զարգացման հեռանկարներն ու նախագծերը: Նախ անդրադարձ է կատարվել գարնանացան ցորենի, հնդկացորենի, ոլոռի, սիսեռի, գարնանացան գարու, եգիպտացորենի, առվույտի և կորնգանի արտադրության զարգացման 2017 թվականի ծրագրին: Զեկուցվել է, որ սերմերի ներկրման և մատակարարման գործընթացն արդեն իսկ ընթացքի մեջ է: Դրանց մի մասը ձեռք է բերվել նաև Գյումրիի սելեկցիոն կայանից, որի սերմերի վաճառքի գինը շատ ավելի ցածր է: Կառավարության ղեկավարը կարևորել է Գյումրիի սելեկցիոն կայանի զարգացումն ու գործունեության ընդլայնումը և հանձնարարել կարճ ժամանակահատվածում ներկայացնել համապատասխան ծրագիր: Սերմերի հարցն ըստ էության զայրացրել է Կարեն Կարապետյանին. «Ինչո՞ւ առ այսօր հաշվարկ չենք արել, թե ինչպես անել, որպեսզի դրսից կախվածությունը նվազեցնենք: Անընդհատ ասում ենք, որ պետք է ներմուծումը փոխարինել, ուրեմն պետք է ուսումնասիրենք, թե Հայաստանն ինչ է ներմուծում, և դրա դիմաց ինչ ենք կարողանում անել: Ինչո՞ւ սերմերի ոլորտը չենք դիտարկում, եթե ունենք սելեկցիոն կայան: Եթե խոսում ենք արտահանումը ներքին արտադրանքով փոխարինելու մասին, ունենք մի բան, որը լավ է աշխատում, ուրեմն պետք է ընդլայնենք նրա գործունեությունը: Գյումրիի սելեկցիոն կայանի հիման վրա պետք է ստեղծել փակ բաժնետիրական ընկերություն, որը կարողանում է դառնալ նորմալ կոմերցիոն կառույց, որը զբաղվում է և սերմերի արտադրությամբ, և վաճառքով: Սերմերի ոլորտը պետք է դարձնել բիզնես, դրանով փող աշխատել, ամեն տարի սուբսիդավորման համար ավելի մեծ միջոց չհատկացնել»,- ասել է Կարեն Կարապետյանը և հավելել, որ զարմացած է, որ մինչ այժմ դա չի արվել: «Ես զարմանում եմ, թե ինչ պոլիտբյուրոյի հոգեբանություն է բոլորիդ մեջ նստած, չեմ հասկանում>>,- զայրացած ասել է Կարեն Կարապետյանը: Իրականում այս հարցը, որն այդքան զարմացրել ու զայրացրել է վարչապետին, տարիների պատմություն ունի: Գարնանացանին աջակցելու և գյուղացիական տնտեսություններին սերմերով ապահովելու նպատակով ամեն տարի կառավարությունը սուբսիդիա է հատկացնում: Նախկինում Hayeli.am-ը մի քանի անգամ /Մաքուր ատկատ. գյուղացին կարող էր 11 դրամով դիզվառելիք ստանալ, Ֆլեշը Ֆլեշ է՝ անկախ նրանից, թե ով է վարչապետը, Ֆլեշի Բարսեղին ուզում են «գծերից գցել» անդրադարձել է գյուղատնտեսական սուբսիդիաների կոռուպցիոն ռիսկերին: Վերջին 7-8 տարիներին ձևավորվել էր ավանդույթ, երբ գյուղատնտեսական աշխատանքների համար մատչելի գներով դիզելային վառելանյութի, պարարտանյութի և սերմացուի ներկրման նպատակով կառավարությունը մի շարք մասնավոր ընկերությունների հատկացնում էր սուբսիդիա, որպեսզի ընկերությունները իբր շուկայականից ավելի էժան գնով մատակարարումներ կատարեն հողօգտագործողներին: Այս բոլոր ընկերությունները /«Ֆլեշ», «Բերրիություն» ԱՄ-ի Մասիսի շրջանային միավորումը» «Հրաշք այգի» ՍՊԸ/ ըստ ԶԼՄ հրապարակումների, պատկանում են հայտնի օլիգարխ Բարսեղ Բեգլարյանին՝ Ֆլեշի Բարսեղին: Այսինքն՝ Կարեն Կարապետյանի ասածը, թե սելեկցիոն կայանի գործունեությունը պետք է որպես բիզնես դիտարկել, օրիգինալ չէ: Իրականում սերմերի և ոչ միայն սերմերի, այլ նաև վառելիքի և պարարտանյութի մատակարարումը միշտ էլ դիտարկվել է որպես բիզնես: Այդ բիզնեսը արվել է պետության հաշվին, պետության միջոցներով, բայց մասնավոր ընկերության համար: Այսինքն՝ պետությունը սուբսիդիա է տվել կոնկրետ կազմակերպությունների, որպեսզի նրանք ներմուծեն վառելիք, սերմացու և պարարտնյութ և վաճառեն գյուղացուն: Ընդ որում, ընկերությունները ընտրվել են առանց մրցույթի: Սա եղել է ներմուծման վրա հիմնված կոնկրետ բիզնես, և հենց այդ պատճառով էլ տեղական սելեկցիոն կայանների զարագացումը նպատակահարմար չի եղել: Տեղական նոր և մատչելի սերմերի փոխարեն՝ գերադասել են դրսից բերված ավելի թանկ և անհասկանալի որակի սերմերը: Այնպես որ՝ Կարեն Կարապետյանն իր հարցի պատասխանը կարող է ստանալ Բարսեղ Բեգլարյանից: Արման Վարդանյան