ՀՀԿ-ի ապտակը, ՀՅԴ-ին կվերցնեն իբրեւ կոճակ սեղմողների
«ՀՀԿ- ՀՅԴ առկա համագործակցությունը չի եղել Սահմանադրական պահանջ, քաղաքական է եղել: Բայց հիմա մի կարևոր հանգամանք կա՝ նոր Սահմանադրությամբ մի շարք կարևորագույն օրենքներ պետք է ընդունվեն երեք հինգերորդով, այսինքն՝ 60 տոկոս ձայնով», -այս մասին հայտարարել է ՀՀԿ փոխնախագահ Արմեն Աշոտյանը՝ հուժկու ապտակ հասցնելով ՀՅԴ-ականներին, որոնք վերջին օրերին աննախադեպ ակտիվացել են ու հայտարարում են, որ դեռ կիսատ գործեր ունեն ու այդ պատճառով են շարունակելու կոալիցիոն համագործակցությունը ՀՀԿ-ի հետ: Օրերս ՀՅԴ խմբակցության ղեկավար Արմեն Ռուստամյանը տեղեկացրեց, որ կուսակցության ղեկավարությունը հանդիպումների եւ բանակցությունների մեջ է իշխող ՀՀԿ-ի հետ համագործակցությունը նոր հարթություն տեղափոխելու շուրջ: «Ենթադրում եմ, որ այն համագործակցությունը, որի մասին դուք տեղյակ եք, պետք է շարունակվի, որովհետև ի վերջո դա անժամկետ էր, պայմանավորված չէ ինչ-որ ձևաչափով, իսկ այն հարցերը, որ արձանագրված են համագործակցության մեջ, դրանց զգալի մասը լուծված չեն»,- ասաց Արմեն Ռուստամյանը՝ նկատի ունենալով համագործակցության հուշագրում ամրագրված դրույթները, որոնք բարի ցանկությունների տեսքով ամրագրված են հուշագրի երեք գլուխներում: Սակայն պարզվում է, որ ՀՀԿ-ն գնում է կոալիցիայի ոչ թե արժեւորելով ՀՅԴ-ի ծրագրերն ու գաղափարները, այլեւ նրանց վերցնում է որպես դասական կոճակ սեղմողների: Համենայն դեպս նման եզրահանգման է բերում Աշոտյանի մտքերը: Ի դեպ, Աշոտյանը դեռեւս անցած տարի, երբ ստորագրվում էր ՀՅԴ-ի հետ հուշագիրը, ինքն էլ ստորագրողներից մեկն էր, հուշագիրը ստորագրելուց հետո հայտարարեց. «Քաղաքական նոր մշակույթի սկիզբ է դրվում քաղաքական դաշտում, քանի որ այս համաձայնագիրը ոչ հետընտրական կոալիցիա է, ոչ էլ նախընտրական դաշինք։ Այս համաձայնագիրը սկիզբ է դնում քաղաքական երկարատև համագործակցության, որը խարսխված է արժեհամակարգային ընդհանրությունների և միասնական նպատակների և գործողությունների ծրագրի վրա»: Ստացվում է, որ ՀՀԿ-ն չի պատրաստվում կյանքի կոչել ՀՅԴ-ի հետ ստորագրած հուշագիրը կամ էլ համարում է, որ այդ ամենը քողածածկույթ էր ժամանակին: Ապագա խորհրդարանում ՀՀԿ-ին բաժին է հասնում 55 մանդատ, սակայն ինչպես Աշոտյանն է նշել օրենքները անցկացնելու համար նոր Սահմանադրությունը պահանջում է ոչ թե մեծամասնություն, այլ 60 տոկոսից ավելի ձայն: Դիտարկմանը՝ ստացվում է, որ ՀՀԿ-ին խորհրդարանում կարևորագույն օրենքներն անցկացնելու համար «բուկսիր» է հարկավոր, Արմեն Աշոտյանն արձագանքել է. «Փոքրը չի կարող մեծի համար բուկսիր լինել: Սակայն կա քաղաքական ընդհանուր տեսլականի հարց, որ կառուցված է ընդհանուր մոտեցումների վրա, սակայն որոշ դեպքերում առկա է նաև քվեարկության խնդիրը», ասել է նա՝ ակնարկելով, որ ՀՅԴ-ականները լինելու են զուտ կոճակ սեղմող: ՀՀԿ փոխնախագահի խոսքը կարելի է նաեւ ՀՅԴ-ին ուղղված սթափեցման կոչ ընկալել, որպեսզի թանկով չփորձեն վաճառել իրենց.այս օրերին լուրեր են տարածվում, թե ՀՅԴ-ն փորձ է անում մեծացնել պորտֆելների թիվը: Սակայն ՀՀԿ-ի 55 մանդատը եւ պլյուս ազգաին փոքրամասնությունների 3 մանդատները գրեթե լուծում են տալիս հարցին, ցանկացած պահի ՀՀԿ-ն Ծառուկյան դաշինքից կգտնի մարդկանց, որոնք ծառայություն կմատուցեն հանուն Սերժ Սարգսյանի: Անի Սահակյան