«Ես ձեզնից ակնկալում եմ ոլորտում կտրուկ, դմփոց ռեֆորմ». վարչապետ
ՀՀ վարչապետ Կարեն Կարապետյանն այսօր կառավարության նիստը սկսեց ավանդական հանձնարարականներով։ Նա անդրադարձավ ոռոգման ջրի խնդրին և տեղեկացրեց, որ այս պահին ավարտական փուլում են գտնվում 2017 թվականի ոռոգման շրջանի նախապատրաստական աշխատանքները: Կարեն Կարապետյանը նշեց, որ որոշ տարածքներում հողի մշակման աշխատանքներն արդեն սկսվել են, և փաստ է, որ պայմանավորված հողի ֆիզիկական կազմով, ՀՀ 70% հողատարածքներն ունեն ոռոգման ջրի գերնորմավորված պահանջ ու մատակարարված ջրի դիմաց ձևավորվում է մեծ հասույթ, բայց ջրօգտագործղների կողմից գերնորմավորման դիմաց չի վճարվում և տարեցտարի կուտակվում է անհուսալի դեբիտորական պարտք։ «Այս հանգամանքը գյուղատնտեսության ոլորտում ձեւավորել է ոչ հավասար մրցակցային պայմաններ հողօգտագործողների մոտ եւ ֆինանսական ճեղքվածք՝ ջրամատակարարող կազմակերպությունների մոտ: Այս ամենը հաշվի առնելով անհրաժեշտ է ստեղծել այնպիսի համակարգ, որը կկանխարգելի ջրի գերկորուստները: Ես ձեզնից ակնկալում եմ ոլորտում կտրուկ, դմփոց ռեֆորմ, պայմանավորվեցի՞նք»,- դիմելով ջրային տնտեսության պետական կոմիտեի ղեկավարին՝ հանձնարարեց նա:
Հետևեք մեզ Viber-ում
