Սպասեք վատթարի, սա դեռ միայն սկիզբն է

Ռուսական քարոզչության վառ ներկայացուցիչներից` ռուս հաղորդավար Վլադիմիր Սոլովյովը, որն օրերս այցելել էր Բաքու, «Վեստի FM» ռադիոկայանի եթերում մանրամասներ է ներկայացրել Ադրբեջանի նախագահ Իլհամ Ալիևի հետ հանդիպումից: Նա համարվում է Հայաստանի բարեկամ, ինքն էլ խոստովանել է, որ լավ վերաբերմունք ունի Հայաստանի նկատմամբ ու երբեք դա չի թաքցրել: Նրա խոսքով՝ Ալիևի հետ զրույցը տևել է շուրջ 2 ժամ՝ առանց տեսախցիկների: «Նա ինձ վրա լավ տպավորություն թողեց: Հիանալի կրթված, խելացի պետական գործիչ է: Դա չի նշանակում, որ համաձայն եմ նրա դիրքորոշման հետ…»,-ասել է Սոլովյովը՝ շեշտելով, որ զրույցի ընթացքում Ալիևը վիրավորական ոչ մի արտահայտություն չի արել Հայաստանի իշխանությունների հանդեպ: «Նույն կերպ ես խոսել եմ նաև Հայաստանի նախագահի՝ Սերժ Սարգսյանի հետ: Յուրաքանչյուրն ունի կոշտ դիրքորոշում, սակայն նրանք չեն անցնում նրբանկատության սահմանները»,-հավելել է հաղորդավարը: Այնուհետև, Սոլովյովի խոսքով՝ Ալիևի հետ հանդիպմանը քննարկվել է Լեռնային Ղարաբաղի 5 շրջանների հարցը, 2016թ. ապրիլին հակամարտության էսկալացիան: Երբ ռուս հաղորդավարը հայտնել է իր տեսակետը, ըստ որի ղարաբաղյան հակամարտությունը ռազմական լուծում չունի, Ալիևն ասել է. «Զուտ ռազմական առումով ցանկացած խնդիր լուծելի է նույնիսկ Բաքվից: Մենք գնում ենք ոչ միայն ռուսական զենք: Արդեն գնել ենք 6 միլիարդ դոլարի իսրայելական զենքեր: Ժամանակակից տեխնիկայի շնորհիվ մենք տեսնում ենք՝ ինչ է տեղի ունենում Ղարաբաղում»: Սոլովյովը նաև ասել է, որ Ռուսաստանի ներկայիս ղեկավարության օրոք արցախյան հակամարտության ռազմական լուծումը անհնարին է: «Փոխզիջման որոնումը հնարավոր է: Դա կհանգեցնի նրան, որ Հայաստանը դուրս կգա շրջափակումից: Հսկայական ներդրումներ կլինեն Ադրբեջանի կողմից: Կարևոր է նաև, որ Հայաստանը, Ադրբեջանը և Ռուսաստանը կգտնվեն ԵՏՄ-ի միասնական տարածքում»,-ընդգծել է Սոլովյովը: Նկատենք, որ Սոլովյովը բազմիցս Ղարաբաղ այցելած լրագրող է, բայց միայն այն, որ նա ռուսական պետական քարոզչամեքենայի ներկայացուցիչ է, Ալիևը «ներել է»... Չէ՞ որ մյուսների դեպքում, գիտենք, թե ինչ ճակատագիր է սպասվում: Հիշենք Լապշինի թարմ օրինակը: Բայց Սոլովյովը լավ «պատառ» է Ադրբեջանի իշխանությանը «յուրովի» ներկայացնելու համար: Ու Սոլովյովն էլ առիթը չի կորցրել` այդ գործում իր լուման ներդնելու... Փաստորեն, ռուսական պրոպագանդան որոշել է ապրիլյան պատերազմից հետո Ալիևին «հրեշտակ» ներկայացնելու ծանր բեռն իր վրա վերցնել, ու հասկացնել տալ «բարեկամ» հայերին, թե, գիտեք` Ռուսաստանը պատերազմ չի ուզում, եկեք` Ալիևի ուզածն իրեն տվեք ու խաղաղ ապրենք... Հետաքրքիրն այն է, որ Մոսկվան չի թաքցնում, թե ինչ «բոնուս» է ստանալու դրանից` Ադրբեջանն էլ կանդամակցի ԵԱՏՄ-ին: Ինչպիսի «վարդագույն սցենար»` տարածքները տվեք, որ Ադրբեջանը անդամակցի ԵԱՏՄ-ին, մենք էլ «չաղ ու բախտավոր» ապրենք... Սա է Մոսկվայի նպատակը... Մոսկվան ու Բաքուն հայկական կողմին դա են հասկացնել տալիս` չմոռանալով, իհարկե, արձանագրել, որ բացառապես Ռուսաստանը կարող է լուծել այս խնդիրը, հետևաբար` ինչու՞ չշահի այս վիճակից Մոսկվան: Ահա, Ալիևն էլ հասկացել է, թե «ո՞ւմ դիմի»: ԱՄՆ-ն ու Ֆրանսիան նման «առևտուր» չեն անի իր հետո Ղարաբաղի հարցում: Իսկ Մոսկվան` «միշտ պատրաստ»: Ի դեպ, այն, որ Մոսկվան լուրջ աշխատում է, վկայում են Ռուսաստանի արտգործնախարարի վերջին հարցազրույցները` Մոսկվայի կողմից կողմերի հետ առանձին աշխատելու վերաբերյալ: Երեկ էլ Ադրբեջանի նախագահ Իլհամ Ալիևը ընդունել է Ռուսաստանի Անվտանգության խորհրդի քարտուղար Նիկոլայ Պատրուշևի գլխավորած պատվիրակությանը: Ինչպես հաղորդում է APA գործակալությունը, Ալիևը գոհունակություն է հայտնել երկու երկրների միջև քաղաքական, տնտեսական, մարդասիրական, ինչպես նաև անվտանգության ոլորտներում հարաբերությունների զարգացման կապակցությամբ: Շեշտելով միջազգային անվտանգության ամրապնդմանն ուղղված համագործակցության լավ մակարդակը՝ Ալիևը նշել է, որ Ռուսաստանի և Ադրբեջանի միջև մշտական շփումները, ինչպես նաև մի շարք հարցերի վերաբերյալ համատեղ լուծումները, մեծ դեր են խաղում այս համատեքստում: Ալիևի խոսքով՝ տարածաշրջանում ձևավորված իրավիճակն անհրաժեշտ է դարձնում Ադրբեջան-Ռուսաստան համագործակցության հետագա ամրապնդումը անվտանգության ոլորտում: Ահա այսպիսի թափանցիկ ակնարկներ... Թամար Բագրատունի