Հոխորտալու պատճառները

«Մինսկի խումբը պետք է սաստկացնի Երևանի նկատմամբ գործադրվող ճնշումը», երեկ Բաքվում` կառավարության ընդլայնված նիստի ժամանակ, հայտարարել է Ադրբեջանի նախագահ Իլհամ Ալիևը: «ԵԱՀԿ Մինսկի խմբի համանախագահ պետությունները բազմիցս հայտարարել են ստատուս քվոյի անթույլատրելիության մասին», - ասել է Ալիևը: Ադրբեջանի նախագահի խոսքով՝ Հայաստանը փորձում է սառեցնել բանակցությունները, «բայց դա նրան չի հաջողվի»: Դիմելով կառավարության անդամներին` Ադրբեջանի նախագահն այսօր կրկին հիշել է 90-ականների սկզբին ՄԱԿ-ի Անվտանգության խորհրդի կողմից ընդունված չորս բանաձևերի մասին, հայտարարելով, թե դրանք պետք է կյանքի կոչվեն, և հայկական ուժերը պետք է դուրս բերվեն ադրբեջանական տարածքներից: «Վաղ թե ուշ, միևնույն է, Ադրբեջանը ազատագրելու է գրավյալ տարածքները», - դիմելով նախարարներին՝ հայտարարել է Իլհամ Ալիևը: Ալիևի պահվածքը որքան էլ կոշտ է թվում, բայց դա միայն առաջին հայացքից․․․ Իրականում Ալիևի՝ «հարձակվողական» պահվածքը բացատրվում է նրանով, որ իրականում Ադրբեջանից են միջնորդները քայլեր ակնկալում, հենց այդ պատճառով Ալիևը երկրի ներսում փորձում է ցույց տալ, ինքն է իբր հայկական կողմից ավելի բարձր դիրքերում, հանդես է գալիս ուժի դիրքերից: Նա անդրադարձել է նաև փետրվարի 20-ին Լեռնային Ղարաբաղում անցկացված սահմանադրական հանրաքվեին` պնդելով, թե այն զուրկ է օրինական ուժից: «Այդ հանրաքվեն անցկացնելով` Հայաստանը հերթական անգամ խայտառակ եղավ: Հարևան երկրները, Մինսկի խմբի համանախագահ պետությունները, Եվրամիությունը, բազմաթիվ այլ երկրներ` բոլորն էլ դատապարտեցին այդ այսպես կոչված հանրաքվեն և հայտարարեցին, որ չեն ընդունում դրա արդյունքները: Այդպիսով միջազգային հանրությունը մեկ անգամ ևս իր աջակցությունը հայտնեց Ադրբեջանի տարածքային ամբողջականությանը», - համոզված է Ալիևը: Սա այն դեպքն է, որ որևէ նորություն չկա: Ղարաբաղում կայացած բոլոր ընտրություններից հետ միջազգային հանրությունը հայտարարում է, որ չի ճանաչում ընտրությունների արդյունքները: Սակայն ԵԱՀԿ Մինսկի խմբի համանախագահները ամեն առիթով, երբ այցելում են Արցախ` արձանագրելով, որ հաշվի են նստում Լեռնային Ղարաբաղի դե-ֆակտո իշխանությունների հետ: Խոսելով հայկական ուժերի վերահսկողության տակ գտնվող շրջանների հետագա ճակատագրի մասին` Ադրբեջանի նախագահը այսօր նաև խոստացել է, որ դրանցում ակտիվ շինարարություն է ծավալվելու «երկրի տարածքային ամբողջականության վերականգնումից անմիջապես հետո»: Ալիևը մասնավորաբար խոսել է Ֆիզուլիի շրջանում` շփման գծի անմիջական հարևանությամբ գտնվող Ջոջուղ Մարջանլի գյուղում ծավալված աշխատանքների մասին: Հիշեցնենք, Լելե Թեփե բարձունքի` 2016-ի ապրիլին տեղի ունեցած գրավումից հետո ադրբեջանական կողմը ազդարարեց այս գյուղի վերականգնման և վերաբնակեցման ծրագրի մեկնարկը: Ամիսներ առաջ պաշտոնական Բաքուն նույնիսկ կազմակերպեց Ադրբեջանում աշխատող օտարերկրյա դիվանագետների այցը այդ գյուղ: «Ջոջուղ Մարջանլիում այժմ վերականգնողական աշխատանքներ են ընթանում: Առաջին փուլում մենք 50 տուն, մզկիթ և դպրոց կկառուցենք: Հետագայում տների թիվը կհասնի 150-ի: Այս ամենը վկայում է, որ Ադրբեջանը չի համակերպվի իր տարածքների օկուպացիայի հետ և կվերականգնի այն բոլոր գյուղերն ու քաղաքները, որոնք այժմ գտնվում են հայկական կողմի վերահսկողության ներքո», ասել է Ալիևը: Սա էլ այն դեպքն է, որ Ալիևը հասարակության աչքում ցանկանում է արդարացնել ապրիլյան պատերազմն ու հարյուրից ավելի զոհերը, թե իբր` արդյունք են ունեցել, թեև այդքան զոհեր են տվել: Մետաքսյա Շալունց