Սերժ Սարգսյանը զգուշացնում է Տարոն Մարգարյանին խանգարողներին
Սերժ Սարգսյանը մամուլի խոսնակի միջոցով անդրադարձել է Դավիթաշեն համայնքում ծառահատման դեպքին: «Արմենպրեսի» հարցմանն ի պատասխան նա հաղորդել է, որ Սերժ Սարգսյանը կարծում է՝ համապատասխան մարմինները կգործեն իրենց պարտականությունների համաձայն և պատշաճ վերաբերմունք կցուցաբերեն կատարվածի հանդեպ ու << բարբարոսության հեղինակները կրելու են օրենքով սահմանված պատասխանատվություն>>: Դավիթաշենում ծառահատման դեպքը իսկապես սահմռկեցուցիչ է, բարբարոսություն, բայց Հայաստանում , Երեւանում սա առաջին ու վստահ ենք՝ վերջին բարբարոսությունը չի եղել ու չի լինելու, զարմանալի է, որ որեւէ նման դեպք չի արժանացել Սերժ Սարգսյանի ուշադրությանը: Սերժ Սարգսյանի պաշտոնավարման տարիներին Երևանի տարածքում այնքան ծառ ու թուփ է հատվել, որ բոլորը միասին մի թավ անտառ կձևավորեին, բայց նախագահը քար անտարբերություն է դրսեւորել այդ բարբարոսություններին: Ուստի առաջին հայացքից էլ հասկանալի՝ եթե դեպքը վերաճել է նախագահական արձագանքի մակարդակի, ապա այդտեղ, մեղմ ասած, այլ խնդիր կա, որին պետք է լուծում տալ նախագահի մակարդակով: Հասկանալի է, որ Դավիթաշենի դեպքը ուղղակիորեն գործում է Երեւանի քաղաքապետ եւ այժմ քաղաքապետի ՀՀԿ-ի թեկնածու Տարոն Մարգարյանի դեմ, ընտրարշավը դեռ չմեկնարկած Տարոն Մարգարյանը արդեն իսկ հայտնվել է որոշ շրջանակների թիրախում, ինչն էլ ըստ ամենայնի ստիպեց վերջինին արձագանքել այս ամենին, նա նույնպես դատապարտեց ու խոստացավ պատժել բարբարոսներին: Պարզունակ է մտածել, որ Սերժ Սարգսյանն էլ իր հերթին մղվեց Տարոն Մարգարյանի պաշտպանությանը,եւ առհասարակ դժվար է ասել՝ հանրային շրջանակներում այդ աջակցությունը ինչ ազդեցություն կունենար, որովհետեւ Սերժ Սարգսյանին մեկուսացվել էր անգամ խորհրդարանի ընտրությունների ժամանակ ու մասնագետները վերլուծում էին, որ նրա ներկայությունը ավելի կգցի ՀՀԿ-ի վարկանիը: Այնպես որ հնարավոր է ծառահատման վայրագության թիկունքում բարձր կալիբրի ուժեր են կանգնած, որոնց եւ ուղերձ է հղում ՀՀԿ ղեկավարը: Իսկ որ Տարոն Մարգարյանը թիմի ներսում կարկառուն մրցակիցներ ունի, որոնց ձեռնտու է իր տապալումը, դա հայտնի է բոլորին: Քաղաքապետի պաշտոնի առաջին հավակնորդը Գագիկ Բեգլարյանն է, քննարկվում էր Միհրան Պողոսյանի տարբերակը, ով ապրիլի 2-ին Ավանում զիջեց Մարգարյանի աներորդի Ռոբերտ Սարգսյանին մոտ 7 հազար ձայնով:Երեկ մամուլին հայտնի էր դարձել, որ ՀՀ վարչապետ Կարեն Կարապետյանը, ԱԺ պատգամավոր Կարեն Կարապետյանը ու Գագիկ Բեգլարյանը հանդիպել են եւ որ Բեգլարյանը նեղսրտել է իր թեկնածությունը չառաջադրելու համար ու Կարեն Կարապետյանի միջնորդությամբ փորձել է տեղ հարթել գոնե կառավարությունում, որտեղից նորանշանակ վարչապետը նրան վտարեց ամիսներ առաջ: Հասկանալի է, որ այլեւս ավագանու ցուցակում փոփոխություն կատարելն անհնարին է, բայց հո խանգարել կարող են: Սերժ Սարգսյանի խոսքը ըստ ամենայնի միտված է հենց այս շրջանակների հարցը հանգուցալուծելու: Նա կարծես թե զգուշացնում է, որ խանգարողները կպատժվեն: Ի վերջո, նա բոլորից լավ է հասկանում, որ թե ինչ կարող են անել տեղական իշխանիկները, որոնք ապրիլի 2-ին իրենց տարածքներում աննախադեպ ցուցանիշներ ապահովեցին: Ի դեպ, հիշենք, որ Տարոն Մարգարյանին գրեթե նման աջակցություն Սերժ Սարգսյանը ցուցաբերել է ավագանու անցած ընտրությանը, Մաշտոցի պուրակում նրա <<Տարոն, սիրուն չի>> արտահայտությունը գործիք էր, որը տրվեց ազդեցիկ կուսակիցների բուտիկները ապամոնտաժելու համար: Անի Սահակյան