84 ամերիկացի կոնգրեսականներ կոչ են արել Դոնալդ Թրամփին ճանաչել Հայոց ցեղասպանությունը

ԱՄՆ 84 կոնգրեսական նամակով դիմել են Դոնալդ Թրամփին, կոչ անելով ճանաչել Հայոց ցեղասպանությունը ապրիլի 24-ի ավանդական ուղերձում, հայտնում է ԱՄՆ Հայ դատի հանձնախումբը:Կոնգրեսում հայկական հարցերի հանձնախմբի համանախագահ Ֆրանկ Փալոնի խոսքով, պետք է հաշվի առնել մարդու իրավունքների պաշտպանության գործում ԱՄՆ-ի առաջամարտիկ լինելը և այս տարի նախագահի ելույթում պատշաճ կերպով 1915 թվականին կատարվածը պետք է բնութագրել որպես ցեղասպանություն: Հայոց ցեղասպանությունը պատշաճ կերպով ճանաչելու կոչ-նամակում կոնգրեսականները վկայակոչել են նախագահ Ռեյգանին, որը ճանաչել է այդ ոճրագործությունը 1981 թ., և Էյզենհաուերի վարչակազմին, որը ևս ճանաչել է Հայոց ցեղասպանությունը 1951 թվականին: Նախագահ Թրամփին ուղղված նամակում մասնավորապես ասված է.«Անկեղծորեն և ճիշտ առաջնորդելով ցեղասպանության հիշատակման գործը` դուք պետք է հետևեք նախագահ Ռեյգանին, ով ճանաչել է Հայոց ցեղասպանությունը 1981 թվականին, և Էյզենհաուերի վարչակազմին, որը արեց նույնը 1951 թվականին` գործը ներկայացնելով Արդարադատության միջազգային դատարան»: Հայ դատի ԱՄՆ հանձնախմբի (ANCA) գործադիր տնօրեն Արամ Համփարյանը ևս հայտարարել է, որ միանում են կոչին. «Մենք միանում ենք Կոնգրեսի անդամներին՝ կոչ անելով նախագահ Թրամփին մերժել Թուրքիայի ժխտողականությունը և գրկաբաց ընդունել Հայոց ցեղասպանության ամերիկյան անկեղծ հիշատակումը»: