Պուտինը դաշնակից չէ ԴԱԻՇ-ի դեմ պայքարում. Ջորջ Սորոս

Ամերիկյան Project Syndicate պարբերականում հրապարակված հոդվածում ամերիկացի հայտնի ֆինանսիստ Ջորջ Սորոսը գրում է, որ ԱՄՆ և ԵՄ առաջնորդները լուրջ սխալ են թույլ տալիս՝ մտածելով, որ Վլադիմիր Պուտինը պոտենցիալ դաշնակից է ԴԱԻՇ-ի դեմ պայքարում: Այդ կարծիքը հակասում է գոյություն ունեցող ապացույցներին: Պուտինի նպատակը ԵՄ-ի քայքայմանը նպաստելն է, իսկ այդ նպատակը իրականություն կդառնա, եթե սիրիացի փախստականների մեծ հոսք ներթափանցի ԵՄ: Ինչպես գրում է 1in.am-ը՝ Ռուսական ինքնաթիռները հարվածներ են հասցնում Հարավային Սիրիայի քաղաքացիական բնակչությանը, ինչը ստիպում է նրանց փախչել Հորդանան և Լիբանան: Ռուսաստանը նաև օդային հարվածներ է իրականացնում Սիրիայի հյուսիսում: Դրան հետևեց նաև Սիրիայի նախագահ Բաշար Ասադի օգնությամբ Հալեպի բանակի դեմ ցամաքային գործողությունների սկսումը: 70 հազար խաղաղ բնակիչ ստիպված է եղել փախչել Թուրքիա: Այդ ընտանիքները չեն ուզում մնալ Թուրքիայում, նրանք ձգտում են դեպի Եվրոպա: Պուտինը հանճարեղ մարտավար է, սակայն չունի ստրատեգի մտածողություն: Նրա միջամտությունը Սիրիական ճգնաժամին ռազմավարական սխալ էր, որովհետև այժմ նա Թուրքիայի նախագահ Ռեջեփ Թայիփ Էրդողանի հետ հակամարտության մեջ է ներքաշվել՝ ի վնաս երկու երկրների: Սակայն հենց որ Պուտինը տեսավ ԵՄ-ի քայքայումը արագացնելու հնարավորությունը, նա այն բաց չթողեց: Ընդհանուր թշնամու՝ ԴԱԻՇ-ի դեմ համագործակցելու վերաբերյալ բանակցություններ վարելով՝ Պուտինը թաքցրեց իր իրական նպատակը: Նա նման մոտեցում ցուցաբերեց նաև Ուկրաինայի հարցով. ստորագրելով Մինսկի համաձայնագիրը՝ նա չկատարեց դրա պարտավորությունները: Դժվար է հասկանալ, թե ինչու են ԱՄՆ և ԵՄ առաջնորդները հավատում Պուտինի խոսքերին և չեն դատում նրա մասին ըստ գործերի: Միակ բացատրությունը այն է, որ ժողովրդավար քաղաքական գործիչները ձգտում են հանգստացնել իրենց երկրի բնակչությանը՝ ներկայացնելով իրականությունից հեռու պատկեր: Բանն այն է որ Ռուսաստանը և ԵՄ-ն մրցում են ժամանակի հետ, թե նրանցից ով առաջինը կփլուզվի: Պուտինի ռեժիմին 2017թ. սնանկացում է սպասվում , իսկ քաղաքական ընդվզումները կարող են ավելի շուտ սկսվել: Արևմուտքի պատժամիջոցները նավթի գնի անկմանը զուգահեռ թույլ չեն տա Պուտինի կառավարությանը իրականացնելու ժողովրդին ուղղված խոստումներից և որևէ մեկը: Պուտինյան ռեժիմի համար կոլապսից խուսափելու համեմատաբար արդյունավետ միջոցը ԵՄ-ի վաղաժամ կոլապսն ապահովելն է: Կազմաքանդման եզրին հայտնված Եվրամիությունը ի զորու չի լինի Ռուսաստանի դեմ պատժամիջոցները պահպանել՝ այն բանից հետո, երբ Ռուսաստանը ներխուժի Ուկրաինա: Ընդհակառակը՝ Պուտինը հսկայական տնտեսական շահույթ կարող է ստանալ Եվրոպայի մասնատումից: Ներկա պահին ԵՄ-ն մոտ է փլուզմանը՝ 2008-ից ի վեր ԵՄ-ն մի ճգնաժամից մյուսի մեջ է հայտնվում: Այսօր այն միաժամանակ 5-6 ճգնաժամի է բախվել: Մերկելը ճիշտ է կանխատեսել, որ միգրացիոն ճգնաժամը կարող է քայքայել ԵՄ-ն: Երբ պետությունը մահացու վտանգի առջև է կանգնած, նրա առաջնորդի համար լավագույն ելքը ոչ թե դաժան իրականությունը անտեսելն է, այլ դրան հակազդելը: Գոյության համար այս պայքարում ԵՄ-ն կանգնած է պուտինյան Ռուսաստանի դեմ: ԴԱԻՇ-ը վտանգ է ներկայացնում երկու կողմերի համար, սակայն այդ վտանգը չպետք է չափազանցնել: Ջիհադիստների հարձակումները ավելի սարսափելի չեն, քան Ռուսաստանից եկող վտանգը: Այդ վտանգին դժվար է դիմակայել, սակայն այն խոստովանելու անզորությունը ավելի է բարդացնում խնդիրը: