Արդեն «Բատկան» էլ է ուզում ԼՂ հարցը լուծել
Անկախ պետությունների համագործակցության`ԱՊՀ-ի պատվին պետք է արձան կանգնեցնել, եթե այն լուծի Մերձդնեստրի, Լեռնային Ղարաբաղի կամ Դոնբասի խնդիրները, հայտարարել է Բելառուսի նախագահ Ալեքսանդր Լուկաշենկոն։ «Եթե մենք ԱՊՀ-ի շրջանակում լուծեինք մերձդնեստրյան, ղարաբաղյան, Դոնբասի խնդիրները, ապա եվրասիական տարածքի կենտրոնում մի տեղ կարելի էր ԱՊՀ-ի պատվին արձան կանգնեցնել։ Սակայն մենք դա չենք անում։ Եվ հաճախ չենք անում ոչ թե, որովհետև չի կարելի, այլ որովհետև տարբեր շահեր են։ Իսկ խնդիրը պետք է լուծել»,- ասել է Լուկաշենկոն: Լուկաշենկոյի կարծիքով՝ վերոնշյալ հակամարտությունները լուծելիս պետք է հաշվի առնել մարդկանց շահերը: «Լեռնային Ղարաբաղում, ի՞նչ է, մարդիկ լա՞վ են ապրում՝ անընդհատ ենթարկվելով ռազմական որոշակի խնդիրների։ Նրանք պարզապես ապրում և սպասում են, որ վաղը մի բան տեղի կունենա, Աստված մի արասցե, գլխին ռումբ կընկնի։ Դա նորմա՞լ է։ Դա աննորմալ է։ Ո՞ւմ է դա ձեռնտու։ Ոչ ոքի»,- ասել է Լուկաշենկոն։ Բելառուսի նախագահի խոսքով՝ միայն այդ հարցերը լուծելուց հետո հնարավոր կլինի տեսնել ռազմավարական նոր ուղղություններ, որոնք անհրաժեշտ են ապագայի համար: Ահա Բատկան, որը Իլհամ Ալիևի մտերիմ ընկերն է, նրանից Հեյդար Ալիևի շքանշան է ստանում` Բելառուս-Ադրբեջան բարեկամական երկրների հարաբերությունների ծիրում` այսօր խոսում է ԼՂ խնդրի կարգավորման անհրաժեշտության մասին: Հետաքրքիր զուգադիպությամբ` Ադրբեջանի շահերը պաշտպանողները սկսել են նախանձելի հաճախականությամբ խոսել ԼՂ խնդրի շուտափույթ լուծման մասին: Ապրիլյան քառօրյայից հետո մեկ տարի անց` Ալիևը իրեն «ազատ» է զգում: Մնալով անպատիժ, որևէ պատասխանատվության չենթարկվելով` ապրիլյան պատերազմ հրահրելու համար, նա մոբիլիզացրել է աջակիցների «բանակը», նրանք էլ միաբերան, թե` «շտապեք, լուծեք ԼՂ խնդիրը»: Հայաստանի ԱԺ ընտրությունների հետո սպասվում է, որ միջնորդ երկրները կփորձեն ևս մեկ հանդիպում կազմակերպել` Սարգսյան-Ալիև մակարդակով: Ու հիմա միջնորդները, շահագրգիռ երկրները, կարծես, պահը օգտագործում են` ցույց տալու, որ չեն մոռացել ԼՂ խնդիրը: Գերմանիայի կանցլեր Անգելա Մերկելը պատրաստակամություն է հայտնել շարունակել մասնակցությունը Լեռնային Ղարաբաղի հակամարտությունը խաղաղ կարգավորման գործում, այս մասին Գերմանիայի կանցլերն նշել է Ադրբեջանի հետ դիվանագիտական հարաբերությունների հաստատման 25-ամյակի կապակցությամբ այդ երկրի նախագահ Իլհամ Ալիևին ուղարկած շնորհավորական նամակում: «Ես վստահ եմ, որ Ադրբեջանը, ինչպես նաև ողջ տարածաշրջանը կկարողանան իրենց ներուժն ամբողջությամբ զարգացնել միայն տարածաշրջանային հակամարտությունների կարգավորումից հետո: Որպես ԵԱՀԿ Մինսկի խմբի անդամ` Գերմանիան հետագայում էլ շարունակելու է մասնակցել Լեռնային Ղարաբաղի հակամարտությունը խաղաղ կարգավորմանը, ինչպես նաև աջակցելու է համանախագահների ջանքերին»,- ասել է Մերկելը: Լեռնային Ղարաբաղի հակամարտության կարգավորման հարցում Եվրամիության դիրքորոշումն անփոփոխ է: Ինչպես հաղորդում ադրբեջանական APA ադրբեջանական գործակալությունը, այս մասին հայտարարել է Ադրբեջանում Եվրամիության պատվիրակության ղեկավար Մալենա Մարդը: Նա ընդգծել է, որ Լեռնային Ղարաբաղի հակամարտությունում գոյություն ունեցող ստատուս-քվոն անընդունելին է: «Մենք աջակցում ենք Մինսկի խմբին և նրա ջանքերին՝ ուղղված ղարաբաղյան հակամարտության կարգավորմանը: Եվրամիության հատուկ ներկայացուցիչ Հերբերտ Սալբերը ևս զբաղվում է տվյալ հակամարտության հարցով»,- նշել է նա: Թամար Բագրատունի
Հետևեք մեզ Viber-ում
