Իրական ու կեղծ «Լիսկա»

Ապրիլի 2-ի խորհրդարանական ընտրություններից հետո բոլորին կամ գոնե շատերին մեկ հարց է հուզում՝ որ թեկնածուների միջեւ է բաշխվել մոտ կես միլիոն ձայնը։ Իշխանության հրապարակած ցուցանիշներով ընտրություններին մասնակցել է մոտ 1.6 մլն մարդ: Արդեն իսկ հաշվարկներ են արվում, ապացուցվում, որ այդ թվերը փուչ են, լիակատար ունայնություն, հակառակ դեպքում Հայաստանում մշտական բնակություն ունեցողների թիվը մոտ երեք միլիոն է լինելու, ինչն աբսուրդի ժանրից է։ Տարբեր հաշվարկներով մոտ 400-500 հազարով ուռճացվել է ընտրողների թիվը ու այդ ձայները բաշխվել բնականաբար անցողիկ ուժերի միջեւ, բայց որ ամենահավանականն է ՀՀԿ-ին է տրվել, ավելի կոնկրետ՝ որոշ ռեյտինգային թեկնածուներ, ովքեր այդպիսի «արջի ծառայություններ» են մատուցել հարազատ կուսակցությանը իրենց կամ իրենց հովանավորյալներին էլ շնորհել են այդ ձայները։ Մեխանիզմը եղել է հետեւյալը, որ տվյալ ընտրատարածքում բացակայող, արտագաղթած մարդկանց անձնագրային տվյալներով քվեարկություն են իրականացրել։ Այս համատեքստում ուշագրավ է Սյունիք եւ Վայոց Ձորի մարզերն ընդգրկող ընտրատարածքում ստացած պատկերը, որտեղ ՀՀԿ-ն ջախջախիչ հաղթանակ է տարել, կուսակցության օգտին քվեարկել է 58 137 մարդ կամ ընտրողների 53,66%։ՀՀԿ տարածքային թեկնածուներից առաջատարը մարզպետ Վահե Հակոբյանն է, ով տվյալներով ստացել է ՀՀԿ-ի ստացած քվեների 37,5 տոկոսը, մոտավորապես 21 հազար ձայն։ Երկրորդ տեղում Աշոտ Արսենյանն է, որին սատարում է Սյունիքի նախկին մարզպետ Սուրիկ Խաչատրյանը: Նա ստացել է ՀՀԿ-ին կողմ քվեարկած ձայների մոտ 30 տոկոսը: Երրորդ տեղում Առուշ Առուշանյանն է, ով ստացել է ընտրողների մոտ 12 տոկոսը: Տեղեկություններ կան, որ Վահե Հակոբյանի ցուցանիշները տարակուսանքի տեղիք են տվել նույնիսկ հարազատ կուսակցությունում։ Բոլորին է հայտնի, թե մարզպետին ինչպես են ընդունում հարազատ համայնքում, նա գրեթե նվազագույնի է հասցրել շփումը ենթակաների հետ, նրանց հետ հարաբերվում է ընդգծված «դիստանցիայով», քամահրանքով է վերաբերում բոլորին։ Այս իրավիճակում առնվազն անհավատալի է, որ Վահե Հակոբյանին հաջողվեր այն ցուցանիշներն ապահովել, ինչը փաստացի արձանագրվել է։ Բացի դրանից Աշոտ Արսենյանը բավականին բարձր հեղինակություն է վայելում, դրան գումարած Սուրիկ Խաչատրյանի օգնությունը, որին, ուզենք, թե չուզենք, Սյունիքում որոշ շրջանակներ անվերապահորեն ընդունում են, այս պարագայում առնվազն առաջատարը պետք է լիներ Արսենյանը։ ՀՀԿ-ն խնդիր ուներ Սյունիքում ապացուցելու, որ Վահե Հակոբյանը պակաս Լիսկա չէ ու կարող է ՀՀԿ-ի համար ցնցող ցուցանիշներ գրանցել՝ չեզոքացնելով Սուրիկ Խաչատրյանից սպասվող վտանգները։ Չի բացառվում, որ Վահե Հակոբյանը այն թեկնածուների շարքում է, որոնց իրավունք է տրվել օգտվել այն ձայներից, որոնք ազատորեն տնօրինել է իշխանությունը, խոսքը ինչպես արդեն նշել ենք ուռճացված մոտ կես միլիոն ձայների մասին է։ Անի Սահակյան