ՊԲ-ն հերքում է ղարաբաղյան կողմից արկակոծումների մասին Բաքվի պնդումները
ԼՂ պաշտպանության նախարարությունը հերքում է Ադրբեջանի ՊՆ պնդումները, թե հայկական կողմն ականանետից արկակոծել է Թերթերի շրջանի բնակավայրերից մեկը: «Այսօր կեսօրից հետո Ադրբեջանի պաշտպանության նախարարության մամուլի ծառայությունը տեղեկություն է տարածել, թե իբր արցախյան ուժերը հակամարտ զորքերի շփման գծում խախտելով հրադադարի պահպանման ռեժիմը, 60 միլիմետրանոց ականանետից արկակոծել են Թերթերի շրջանի Ղափանլը գյուղը, ինչի արդյունքում վնասվել է մասնավոր տնտեսություն: Արցախի Հանրապետության պաշտպանության նախարարությունը հայտարարում է, որ ադրբեջանական կողմի տարածած տեղեկատվությունն իրականությանը չի համապատասխանում: Ավելին՝ այսօր ժամը 12:40-13:15-ի սահմաններում հակառակորդը Մարտակերտի ուղղությամբ տեղակայված մարտական դիրքերի ուղղությամբ 60 միլիմետրանոց ականանետից արձակել է 4 արկ: ՊԲ առաջապահ զորամասերը հիմնականում ձեռնպահ են մնացել պատասխան գործողություններից և շարունակում են վստահորեն իրականցնել մարտական հերթապահություն: Հակառակորդի ականանետային հարվածներից ՊԲ-ն կորուստներ չունի»,- նշված է ԼՂ ՊՆ տարածած հաղորդագրության մեջ:
Հետևեք մեզ Viber-ում
