Ողբերգական ավտովթարի հետևանքով հիվանդանոց տեղափոխված 35-ամյա վարորդը, ում նշանածն ու մայրը մահացել էին, նույնպես մահացավ. ՖՈՏՈՌԵՊՈՐՏԱԺ, ՏԵՍԱՆՅՈՒԹ

Երեկ՝ ապրիլի 5-ին, «Էրեբունի» բժշկական կենտրոնում վերակենդանացման բաժանմունքում մահացել է 35-ամյա Արմեն Մուխսիյանը, ով հիվանդանոց էր տեղափոխվել մարտի 19-ին Սիսիանի բժկականկ ենտրոնից, որտեղ տեղափոխվել էր ծայրահեղ ծանր վիճակում։ Ինչպես ավելի վաղ դեպքի վայրից հայտնել էր ֆոտոլրագողը, մարտի 19-ին խոշոր ու ողբերգական ավտովթար էր տեղի ունեցել Սյունիքի մարզում: Ժամը 9:30-ի սահմաններում Toyota Camry մակնիշի 50 DO 007 համարանիշի ավտոմեքենայի վարորդը Երևան-Մեղրի ավտոճանապարհի 197 կմ հատվածում դուրս էր եկել ճանապարհի երթևկելի գոտուց և մոտ 200 մետր մի քանի պտույտ գլխիվայր շրջվելով՝ հայտնվել ձորում: Վթարի հետևանքով 2 հոգի տեղում մահացել էին, իսկ 3 հոգի ծայրահեղ ծանր վիճակում տեղափոխվել էին Սիսիանի հիվանդանոց: Դեպքի վայր էին ժամանել ճանապարհային ոստիկանության 2-դ սպայական գումարտակի 6-րդ վաշտի աշխատակիցները՝ վաշտի հրամանատար Անդրանիկ Շաղոյանի գլխավորությամբ: Ժամանել էր նաև Արտակարգ իրավիճակների նախարարության փրկարար ծառայության Սիսիանի հրշեջ-փրկարարական ջոկատը, ովքեր մահացածների դիերը դուրս էին բերել ձորից և շտապօգնության ավտոմեքենան նրանց տեղափոխել էր Սիսիանի դիահերձարան: Վթարի մասին ՃՈ օպերատիվ կառավարման կենտրոնի պատասխանատու հերթապահ Արսեն Հարությունյանը տեղեկությունը փոխանցել էր Հայաստանի քննչական կոմիտեի Սյունիքի մարզային քննչական վարչության Սիսիանի քննչական բաժին, որտեղից դեպքի վայր էր ժամանել քննչական խումբը՝ բաժնի պետ Արմեն Կավեյանի գլխավորությամբ, ով դեպքի վայրից վիրավորների հետ մեկնել էր հիվանդանոց: Դեպքի վայրում հավաքվածները ֆոտոլրագրողին ասել էին, որ օպերատիվորեն դեպքի վայր էին ժամանել նաև Սիսիանի քաղաքապետարանի աշխատակիցները՝ քաղաքապետ Արթուր Սարգսյանի գլխավորությամբ, ով նույնպես օգնել էր վիրավորներին՝ հիվանդանոց տեղափոխելու գործում: Փաստի առթիվ տեղում քննչական աշխատանքները ղեկավարող հատկապես կարևոր գործերով ավագ քննիչ Արիստակես Գրիգորյանի որոշմամբ հարուցվել էր քրեական գործ՝ ՀՀ քր. օր-ի 242 հոդվածի 3-րդ մասի /ճանապարհատրանսպորտային պատահար, որն անզգուշությամբ առաջացրել է 2 և ավելի մարդու մահ/ հատկանիշով: Ոստիկանությունն ու քննչական բաժինը պարզում էին վարորդի, մահացածների և վիրավորների ինքնությունը: Փրկարարները ավտոմեքենայի մեջ հայտնաբերել էին Գավառ քաղաքի Հացառատ թաղամասի բնակիչ, 57-ամյա Արևիկ Թովմասյանի, Արցախի Հանրապետության Մարտունու շրջանի Կարմիր Շուկայի բնակիչ, 32-ամյա Վարդիթեր Գրիգորյանի անվամբ անձնագրեր և Երևան քաղաքի Մամիկոնյանց փողոցի բնակիչ, 35-ամյա Արմեն Մուխսիյանի անվամբ վարորդական իրավունքի վկայական: Վթարի վայրում հավաքվածներն ասել էին նաև, որ վթարի ենթարկվածները ընտանիքի անդամներ են եղել, մահացածներն էին՝ վարորդի մայրը, նշանածը, իսկ վիրավորներն են վարորդի հայրն ու եղբայրը: Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: Լուսանկարները և տեսանյութը՝ Գագիկ Շամշյանի

• 
• 
• 
• 

  Տեսանյութ