«Տեսնես ով ականջալուր կլինի». Ստյոպա Սաֆարյան

Ընտրություններից հետո «Ելք» և «ՕՐՕ» դաշինքները միմյանց հասցեին մեղադրանքներ հնչեցրեցին՝ մեղադրելով մեկը մյուսին հովանավորյալներ ունենալու մեջ: Երեկ Արմեն Մարտիրոսյանն ու Հովսեփ Խուրշուդյանը հայտարարել են, թե ԵԼՔ դաշինքի թիկունքին կանգնած է Սերժ Սարգսյանի փեսա Միքայել Մինասյանը: Այսօր նրանց պատասխանել է  «Ելք» դաշինքի անդամ Նիկոլ Փաշինյանը՝ ասելով. «ԵԼՔ դաշինքի թիկունքին կանգնած ավելի քան 120 հազար մարդուն չնկատող եւ դրա փոխարեն փեսա տեսնող ցանկացած ոք ուշադրության եւ քնքշանքի ակնհայտ պակաս ունի եւ նմանվում է զոքանչի կողմից դուրս վռնդված տնփեսայի: Միքայել Մինասյանը, նրա աները կամ նրանց նման որեւէ մեկը մեր թիկունքին չեն կարող կանգնել, կարող են կանգնել միայն մեր ստվերում»: Այնուհետև՝ նրանց տարաձայնությանը միջամտել է նաև Սերժ Սարգսյանի փեսա Միքայել Մինասյանը՝ հայտարարելով. «Մենք անձնապես ծանոթ չենք. ո՛չ Ձեզ հետ, պարո՛ն Մարտիրոսյան, ո՛չ Ձեզ հետ, պարո՛ն Փաշինյան։ Իմ անձնական հեռակա կարծիքը ձեր հանդեպ բարեկամական է՝ առանց որևէ կանխակալ բայցերի։ Այդ դեպքում որքանո՞վ է ազնիվ ինչ-ինչ հարցեր իրար հետ պարզելուց անպայման ու հետևողականորեն օգտագործել իմ անունը, որը տվյալ դեպքում նաև Հայաստանը ներկայացնող դիվանագետի անուն է»: hayeli.am-ը քաղաքագետ Ստյոպա Սաֆարյանից հետաքրքրվեց, թե ինչ կարծիք ունի այս ամենի մասին, որին ի պատասխան կարճ ասաց. «Տեսնես ով ականջալուր կլինի»: