Բա ձեր թիթիզությունն ո՜ւմ էր պետք

Ավարտվեց խորհրդարանական հերթական ընտրությունը, եւ մեծ հաշվով ստեղծվեց նույն պատկերը իշխող ուժի վերարտադրության տեսքով։ ՀՀԿ-ն կարծես թե կատարեց իր առջեւ դրված խնդիրը ու հաջորդ խորհրդարանում ու իշխանությունում միանձնյա մեծամասնություն կձեւավորի։ ՀՀԿ-ից բացի Ազգային ժողով կմտնի եւս երեք ուժ՝ ՀՅԴ-ն, Ծառուկյան դաշինքն ու Ելք դաշինքը։ Դժվար է Հայաստանում ապրիլի 2-ին տեղի ունեցածն ընտրություն կոչել, հաղթեց փողը, ընտրակաշառքը, վարչական ռեսուրսը և իրավապահ համակարգի անգործությունը, այսինքն՝ հաղթեց ՀՀԿ-ն։ Սակայն կարելի էր այդ «հաղթանակը» ներկայացնել առանց ծաղրի, զավեշտի, մի քիչ համոզիչ, մի քիչ իրական։ Իշխանության հրապարակած ցուցանիշներով ընտրություններին մասնակցել է մոտ 1.6 մլն մարդ: Արդեն իսկ հաշվարկներ են արվում, ապացուցվում, որ այդ թվերը փուչ են, լիակատար ունայնություն, հակառակ դեպքում Հայաստանում մշտական բնակություն ունեցողների թիվը մոտ երեք միլիոն է։ Սա է հենց ծաղրը, քանզի վերջին տարիներին անգամ պաշտոնական վիճակագրությամբ արտագաղթի ցուցանիշը նորանոր վերելքներ է գրանցում։ Ու եթե այսպես սրընթաց ու առանց նեղություն քաշելու պետք է տոկոսներ «խփեիք», ո՞ւմ եւ ինչի՞ համար էր ձեր բեմադրած թատրոնը։ Ինչու չխղճալ նորընծա վարչապետին իր «թաշախուստով»՝ Արփինե Հովհաննիսյան, Արմեն Ամիրյան, էլի ուրիշ նոր անուններ՝ թարմ ու ջահել, որոնց ասպարեզ բերելով, այս ու այնտեղ ուղարկել, իրենց բլբլոցնելով մեզ հոգնեցնելով ու վերջապես իրենց չխնայելով խնդիր էիք դրել ՀՀԿ-ի նոր դեմք կերտել, նոր իմիջ, բոլորովին տարբեր քան գալուստսահակյաններն են,  շմայսներն ու լֆիկները։ Իրականում դուք բոլորդ էլ նույնն եք, առանց մի թիզ տարբերության, դա հասկացել եք նաեւ ինքներդ, այլապես նոր իմիջով, նոր ֆասոնով նոր որակի ընտրությունների կգնայիք, չէիք կեղծի այսքան ցինիկ ու այսչափ անհիմն, առանց ավելորդ ձեւականությունների, առանց ընդդիմության։ Անկասկած կարելի է արձանագրել, որ նոր խորհրդարանը զրկվելու է իրական ընդդիմությունից, եթե ոչ, ապա իշխանությունը կարող էր ցուցանիշներ ուռճացնել մի քանիսի համար եւս։ Թեև «Ծառուկյան» դաշինքը իրեն հայտարարել է ընդդիմություն, սակայն հայտնի չէ, թե մինչեւ որտեղ է լինելու այս դաշինքի վազքը։ «Ծառուկյան» դաշինքը կրկին կատարեց և կշարունակի կատարել  իր ստանձնած առաքելությունը։ Որ Ծառուկյան դաշինքն ընդդիմություն չէ, այդ մասին բարձրաձայնում էին իրենք ՀՀԿ-ականները, Խոսրով Հարությունյանը վկա։ Կարելի է արձանագրել, որ իշխանությունը նորանուն ընդդիմադիրներից նախընտրեց Ելք-ին միայն, որն իսկզբանե պրոյեկտվեց հայտնի շրջանակներում, բնականաբար, չէր կարող մնալ փողոցում, ինչպես ասենք ՕՐՕ-ն, Ազատ Դեմոկրատները եւ նույնիսկ Արթուր Բաղդասարյանի Հայկական վերածնունդը։ Բայց հանուն արդարության այս ընտրություն կոչվող ֆարսի միակ ուրախալի փաստն այն է, որ Արթուր Բաղդասարյանը, վերջապես, իր արժանի տեղը կստանա։ Անի Սահակյան