Կասկածելի անձինք Ավանի ընտրատեղամասում

Ավանում ընտրապայքարը թեժ է, այստեղ ռեյտինգային ընտրակարգով ՀՀԿ կողմից առաջադրված թեկնածուների թվում են ԴԱՀԿ նախկին պետ Միհրան Պողոսյանն ու ԱԺ պատգամավոր Ռոբերտ Սարգսյանը՝ Երևանի քաղաքապետ Տարոն Մարգարյանի աներորդին: Նրանց հետ մրցում է նաև ԵԿՄ-ական Ղուկաս Ուլիխանյանը, ով նույնպես ՀՀԿ կողմից է առաջադրված: Այսօր առավոտվանից Ավանի ընտրատեղամասերի մոտ մարդաշատ է: Դիտորդներն արդեն որոշ խախտումներ են արձանագրել:Մասնավորապես, Ավանի մանկապատանեկան մարզադպրոցում տեղակայված թիվ 1/18 ընտրատեղամասում դիտորդները նկատել են քաղաքացիների կողմից ընտրողներին ուղղորդելու դեպքեր: Դիտորդներից մեկը մեզ այստեղ պատմեց, որ այս ընտրատեղամասում շատ են կասկածելի անձինք, ովքեր որպես ընտրողներին օգնող են հանդես գալիս և փորձում ուղղորդել նրանց:Ժամը 10:00-ի սահմաններում մի երիտասարդ, ով ներկայացել է որպես Հայկ Սարգսյան, քվեախցիկից դուրս փորձել է ուղղորդել ընտրողին՝ նրա համար առանձնացնելով ՀՀԿ-ի քվեաթերթիկը: Երիտասարդն առիթից օգտվել է, որ ընտրողը մեծահասակ է եղել, նրան է տվել ՀՀԿ թերթիկն ու ասել՝ քվեարկիր: Սա փաստել են դիտորդները, աղմուկ է բարձրացել, որից հետո երիտասարդը հեռացել է: Այս ընտրատեղամասում ժամանակ առ ժամանակ նկատվում են կասկածելի անձինք, ովքեր դիտորդների կողմից դուրս են հրավիրվում: Ընտրատեղամաս են եկել նաև անձինք, որոնց մատնահետքերը սարքը չի ճանաչել, պարզվել է նրանց տվյալները չկան այստեղ:Ընտրողներն այստեղ ակտիվ են, բայց դիտորդներն արձանագրել են, որ մեծամասմաբ տեղյակ չեն ընտրության նոր կարգին: Դա էլ առիթ է ստեղծում, որպեսզի ՀՀԿ օգտին աշխատողները նրանց ուղղորդեն: