Ռուզան Խաչատրյանը բացահայտում է ընդվզման պատճառը
Պաշտպանության նախկին նախարար Սեյրան Օհանյանի քաղաքական հայտնը մնում է չպատճառաբանված, հարյուրավոր ու նույնիսկ հազարավոր «ինչու»-ներ մինչ օրս տրամաբանական հիմնավորում չեն ստացել։ Գլխավոր հարցը՝ ինչու երկու տասնամյակ իշխանության տաքուկ անկյուններում վայելքների մեջ ապրող Սեյրան Օհանյանը կտրուկ ցատկով տեղափոխվեց ընդդիմության փշոտ ճանապարհ։ Հիմա փորձում են ամեն ինչ այնպես հրամցնել, թե Սեյրան Օհանյանը իշխանության մեջ ընդդիմություն է եղել, բայց միեւնույն է դրանից հարցերը չեն ավարտվում։ Ասենք ինչպես, կամ ինչո՞ւ է տասնյակ տարիներ իշխանության պատասխանատու օղակի ղեկավար հանդիսացող Սեյրան Օհանյանը լռելյան մնացել իր աթոռին, մինչդեռ հիմա իշխանությունների վարած քաղաքականության անողոք քննադատությամբ է զբաղված, ինչու նա ժամանակին որեւէ կերպ դժգոհություն չի դրսեւորել այս կամ այն, ինչպես ինքն է ասում, գոյություն ունեցող արատավոր երեւույթների մասին, որոնք տիրել են համակարգում։ Սեյրան Օհանյանը կցկտուր պատմում է, թե երբեմն-երբեմն բարձրաձայնել է համակարգի բացերի ու ոմանց անարդյունավետ կառավարման մասին, բայց այդ ամենը մնացել են անարձագանք։ Այդ պարագայում Սեյրան Օհանյանին այլ բան չէր մնում, քան դուրս գալ համակարից, հեռանալ այդ իշխանությունից, ինչը նա չի արել։ Եւ բոլորովին մեկ-երկու տարի առաջ նա պատրաստ էր դառնալ Սերժ Սարգսյանի իրավահաջորդը ու այդ ուղղությամբ Օհանյանն ու ընտանիքն ակտիվ ջանքեր էին գործադրում, ներկայանում հայ ընտանիքի իդեալական տեսակով, նրանց մասին ֆիլմեր էին նկարահանվում ու ցուցադրվում Հանրայինի եթերով։ Բայց այդ ուրախությունը երկար չտեւեց, Սեյրան Օհանյանի բախտի անիվը թափ հավաքեց հակառակ ուղղությամբ։ Կարեն Կարապետյանի վարչապետությունից հետո վճռվեց նաեւ նրա հեռանալու հարցը, բայց մինչ այդ Օհանյանի գեղեցկուհի տիկինն արդեն իսկ հասցրել էր խամրեցնել ամուսնու փայլող աստղը՝ համացանցում իր բազմերանգ ֆոտեսեսիաներով, ծաղիկների ու հագուստի հիվանդագին համադրությամբ հայտնվելով մամուլի թիրախում։ Իշխանությունից իր հեռացումը Սեյրան Օհանյանը հիմնավորեց փոփոխությունների հույժ անհրաժեշտությամբ, որի պատճառով ինքը ստիպված եղավ մերժելու բարձր պաշտոններ՝ ՀԱՊԿ քարտուղարի, ԶՈՒ շտաբի պետի եւ էլի ուրիշներ։ Տեղեկություններ կան, որ Արցախի նախագահ Բակո Սահակյանին անգամ չհաջողվեց համոզել Օհանյանին հետ կանգնել ընդդիմության շարքերը համալրելու մտքից, Օհանյանը մերժեց Սահակյանի հրավերը ու կայացրեց վճռորոշ քայլը։ Իր զգուշավորությամբ հայտնի պաշտպանության նախկին նախարարի կտրուկ քայլի պատճառները բացահայտվեց բոլորովին վերջերս, բացահայտողն էլ կրկին նրա գեղեցկուհի տիկին, դոկտոր Ռուզաննա Խաչատրյանն է։ Ազատության հրապարակում օրերս մասնակցելով ՕՐՕ դաշինքի հրավիրած երթին, տիկին Ռուզաննան ի հեճուկս ամուսնու ցանկության խոսեց մինչեւ վերջ՝ գաղտնազերծելով ամենը․ «Ես այսօր ևս կրկնում են, որ իշխանությունը պետք է փոխվի, որովհետև իշխանության ղեկին գտնվում են մադիկ, որոնք կազմակերպում են ընտանիքների և հատկապես՝ կանանց նկատմամբ այդ տեղեկատվական տեռորը: Իմ դեմ արշավ է եղել և, միանշանակ, իշխանության կողմից։ Ընտանիքը, եթե գեղեցիկ է, չի նշանակում, որ մեծ գումարներ են այնտեղ ներգրավված»,- ընդգծեց Ռուզաննա Խաչատրյանը՝ հավելելով, որ պատրաստ է նաև մամուլում հանդես գալ հայտարարությամբ և փաստերով ապացուցել, թե ովքեր են եղել դրա հետևում կանգնած մարդիկ: Ռուզաննա Խաչատրյանը իր խոսքում ըստ էության ակնարկում է, որ իրեն նախանձում են, խանդում ու առանց բացահայտելու էլ, բնականաբար, հայտնի է, թե ովքեր ու որ շրջանակներից է հնարավոր «արշավ» կազմակերպել Պաշտպանության նախարարի ու նրա տիկնոջ դեմ։ Իզուր,որ ՀՀԿ շրջանակները լուրջ չեն ընդունել տիկնոջ հայտարարությունը, որովհետեւ բոլորին է հայտնի, թե հայ կինն ինչպիսի դերակատարում ու ազդեցություն ունի ընտանիքում ու նաեւ ամուսնու վրա։ Պարզապես, ի տարբերություն ավելի խորամանկ տիկնանց, Սեյրան Օհանյանի կողակիցը չկարողացավ նրբորեն քողարկել այդ ամենը ու բացահայտեց իրենց վիրավորվածության ու ընդվզման պատճառը։ Անի Սահակյան