Մայքլ Ֆլիննին իմունիտետ չեն տրամադրել

ԱՄՆ Սենատի հետախուզության հարցերով հանձնաժողովը մերժել է քրեական հետապնդումից իմունիտետ տրամադրել ազգային անվտանգության հարցերով նախկին խորհրդական Մայքլ Ֆլիննին՝ նրա ցուցմունքների դիմաց, հայտնում է «Ամերիկայի ձայնը։ Նախօրեին Ֆլիննի փաստաբանը հայտնել էր, որ իր պաշտպանյալը պատրաստ է պատմել ռուսական պաշտոնատար անձանց հետ իր շփումների մասին, եթե տվյալ տեղեկությունը նրա դեմ չգործածվի։ «Գեներալ Ֆլինն ունի պատմություն, որը արժանի է շարադրման ու նա շատ է ուզում պատմել այն,- ասել էր Ֆլիննի փաստաբանը՝ չբացահայտելով Կոնգրեսի հետ հնարավոր համաձայնության մանրամասները։ Մայքլ Ֆլիննը ստիպված էր հրաժարական տալ նախագահի խորհրդականի պաշտոնը ստանձնելուց ընդամենը երեք շաբաթ անց։ Նրան մեղադրում էին ԱՄՆ փոխնախագահ Մայք Փենսին միտումնավոր ապատեղեկացնելու մեջ՝ քողարկելով Վաշինգտոնում Ռուսաստանի դեսպան Սերգեյ Կիսլյակի հետ իր բանակցությունների մասին տեղեկությունը։ Ավելի վաղ հայտնի էր դարձել, որ 2015-ի դեկտեմբերին գեներալ Ֆլիննը 45 հազար դոլար էր ստացել Մոսկվայում RT հեռուստաալիքի հոբելյանական երեկույթին ելույթ ունենալու համար։ Նա նաեւ խոստովանել է, որ պայմանագիր է կնքել Թուրքիայի կառավարությանը լոբիստական ծառայություններ տրամադրելու համար, բայց չի գրանցվել որպես «օտարեկրյա գործակալ», ինչպես օրենքն է պահանջում։ Դոնալդ Թրամփը աջակցել էր իմունիտետի մասին պաշտոնանկ գեներալի խնդրանքը։ Նա իր Թվիթերում գրել էր ․ «Մայք Ֆլինը պետք է խնդրի իմունիտետ՝ մամուլի ու դեմոկրատների կողմից կազմակերպված այս վհուկորսի մթնոլորտում»։