ՀԱԿ-ի հուղարկավորությունը` ռոքի ներքո

Առաջին նախագահ Լեւոն Տեր-Պետրոսյանի գլխավորած ՀԱԿ-ՀԺԿ դաշինքը ընտրություններից հաշված օրեր առաջ հրապարակային կնքեց իր մահկանացուն որպես նախկին արմատական ընդդիմության, որը պահանջում էր Սերժ Սարգսյանի գլխավորած ավազակապետության հրաժարականը ու պայքարում այդ բուրգի կազմաքանդման համար: Իսկ այսօր Լեւոն Տեր-Պետրոսյանի գլխավորած դաշինքը ՀԱԿ նախկին բնորոշմամբ <<ռեժիմի>> ապօրինի գործողությունները մի կողմ է դրել ու ստանձնել է խաղաղության քարոզիչների առաքելություն, կոչ է անում իր համակիրներին գնալ ու խաղաղություն քարոզել ամենուր:Այս մասին Ազատության հրապարակում ՀԱԿ-ՀԺԿ դաշինքի եզրափակիչ հանրահավաքի ժամանակ ի լուր ամենքի հայտնեց ՀԱԿ պատգամավոր Արամ Մանուկյանը: Նրանց խաղաղության պատկերացումները արդեն հայտնի են բոլորիս: Հայ ազգային կոնգրեսը որպես հիմնական նախընտրական գաղափար առաջ է քաշում Ղարաբաղում փոխզիջումների միջոցով խաղաղության կոչը: ՀԱԿ պատգամավորության թեկնածուները կոչ են անում նայել իրականությանը եւ հայտարարում, թե Աղդամն ու Ֆիզուլին այդ ե՞րբ էին Ղարաբաղի մաս եղել: Հարցին, թե ինչու են որոշել այդ գաղափարն առաջ քաշել, ՀԱԿ անդամները պատասխանում են, որ դա ոչ թե իրենց առաջարկն է, այլ մադրիդյան սկզբունքները, որոնք իշխանություններն արդեն երկար տարիներ քննարկում են: Այսինքն, ըստ էության չեն թաքցնում, որ աջակցում են Սերժ Սարգսյանին Ղարաբաղի խնդրի հարցում: Բայց սա միակ հարցը չէ, որ այս ուժը իշխանության դաշնակիցն է: Այս դաշնակցությունն էր երեւի Տեր-Պետրոսյանին հետ պահել Ազատության հրապարակի հարթակից, այն կառավարելի եթեր չէ,որտեղ Տեր-Պետրոսյանը կարող է ուզածին չափ ջուր լցնել Բաքվի ջրաղացին ու հայաստանյան իշխանությունների գովքն անել, որի դիմաց նրան վարձահատույց կլինեն խորհրդարանում հինգ պատգամավորական մանդատ հանձնելով: Սա պայքարի հարթակ է, որտեղ հնարավոր են ամենաանկանխատեսելի զարգացումները: Այսօրվա հանրահավաքի ժամանակ չհնչեց որեւէ քննադատություն, որը կնմանվեր նախորդներին գոնե կիսով չափ: «Այսօր ասելու եմ միայն դրական, լավ բաներ, ոգևորող բաներ։ Ոչ մեկի այգին քար չեմ ուզում գցել, որովհետև մենք ուրախ ենք:Քանի դեռ պայքարում ենք, ոչ մի փող, կաշառք, ծախված ուսուցիչ չի որոշելու ՀՀ ճակատագիրը, իրենք են որոշելու այս երկրի ճակատագիրը, իրենց երեխաների ճակատագիրը, քանի դեռ իրենց կամքը ծով է »,- հայտարարեց Արամ Մանուկյանը: Լեւոն Զուրաբյանը հավատարիմ մնաց գործընկերոջ նախընտրած դրական ոճին ու միայն խոսեց ՀԱԿ-ի ձեռքբերումների, իր խոսքով՝ փոքրիկ հեղափոխության մասին, Զուրաբյանն ասաց, որ ՀԱԿ-ի շնորհիվ իշխանություններն ընկրկեցին ու առաջիկա ընտրություններին ընտրատեղամասերում մի շարք նորամուծությունների արդյունքում այլեւս հնարավոր չի լինելու կեղծել ընտրողի քվեն: Ստեփան Դեմիրճյանը ելույթը էականորեն տարբերվում էր ՀԱԿ գործընկերների ելույթներից, նա ի հեճուկս Զուրաբյանի ու Արամ Մմանուկյանի իշխանությունների կողքով աննկատ չանցավ:«Պետք է իրականացվի երկրում արդարության հաստատման ծրագիր, իրական պայքար մղել կոռուպցիայի դեմ, արդար ընտրություններ անցկացնել, բացահայտել հոկտեմբերի 27-ի եւ մարտի 1-ի ոճրագործությունները, բոլոր մեղավորներին պատժել: Այս ճգնաժամը պայմանավորված է նրանով, որ պարբերաբար յուրացնում են իշխանությունը: Իշխանությունը պահելու համար մշտապես շահարկել են Ղարաբաղի հարցը, ինչն անթույլատրելի է»,- հայտարարեց Դեմիրճյանը: Ի դեպ, նա էլ հավանաբար ետ չմնալով պաշտպանության նախկին նախարար, ՕՐՕ դաշինքի առաջնորդ Սեյրան Օհանյանից հանրավաքին ներկայացել էր տիկնոջ հետ: Նախրդ ընտրություններին ընդդիմության դրոշակակիր ուժի համար հիմա նույնիսկ հոգեհարազատ է ՀՀԿ-ի նախընտրական ոճը: ՀԱԿ-ՀԺԿ երթը եզրափակվեց ռոք հնչյունների երաժշտության ուղեկցությամբ, երթի մասնակիցների դիմացից ուղեկցող բեռնատար ավտոմեքենայի բացօթյա հետնամասում ՀԱԿ համակիրներից մեկը <<ուդարնիկ>> էր նվագում, ինչպես Կարեն Կարապետյանը հայտնի տեսահոլովակում: Անի Սահակյան