Բանավեճ ԵԼՔ-ի անդամների և գորիսեցիների միջև

22:02 - 29/մարտի/2017

«Ելք» դաշինքի նախընտրական հանդիպումը Սյունիքում էր: Դաշինքի անդամ Նիկոլ Փաշինյանը Գորիսում հայտարարեց, թե կա այլընտրանք, և քաղաքացիները հնարավորություն ունեն ընտրել «Ելքին»:

«Սիրելի՛ գորիսեցիներ, ապրիլի 2-ին գնացեք ընտրական տեղամասեր և գլուխներդ բարձր, դուխով քվեարկեք Ելք դաշինքի օգտին՝ վերցնելով համար 1 քվեաթերթիկը: Չհուսահատվեք, ժողովո՛ւրդ ջան, որովհետև ելք կա»,-փողոցներով հայտարարում էր Նիկոլ Փաշինյանը:

Նրա հետ քարոզչություն էր իրականացնում նաև դաշինքի անդամ Արամ Սարգսյանը: «Ելք» դաշինքի անդամները Սյունիքում ոչ միայն գորիսեցիներին, այլ նաև զինվորներին էին բաժանում իրենց բուկլետները, ողջունում և կոչ անում ընտրել իրենց: «Ելքի» անդամներին ողջունեցին նաև զինվորները: Արամ Սարգսյանն ու Նիկոլ Փաշինյանը բանավեճի մեջ մտան գորիսեցիների հետ այն ժամանակ,երբ քննադատություններ էին հնչում երկրում գոյություն ունեցող վիճակից, իշխանությունների հասցեին, մի գորիսեցի կին հայտարարեց` բա հո հայը հայի դեմ դուրս չի՞ գա, ուստի եթե դուրս չեն գալիս իրար դեմ, ուրեմն պիտի միանան: Արամ Սարգսյանն էլ հեգնեց, թե ճիշտ է հայ է, թալանում է երկիրը. «Նրանք վեց-յոթ ընտանիքով ավելի շատ հարստություն ունեն, քան ամբողջ ժողովուրդը»,ասաց նա: «Անունը Սերժ ա, ազգանունը Ծառուկյան»,նկատեց բնակիչներից մեկը : «Փոխանակ մտածեք` ինչ անենք, որ հարցը լուծվի, բոլորն իրար համոզում են, թե չի լինի: Դե ուրեմն այդպես էլ ապրեք: Ժողովուրդ, եթե մեզ պիտի լավություն անեք` մեզ ընտրելով, մեզ մի ընտրեք» ,ասաց Փաշինյանը: