Վերեւում Աստված, ներքեւում՝ Վարդանիկը

Աստված ամենակարող է, Արարչի գործերն՝ անքննելի, բայց որ իր բանուգործը թողած կզբաղվի նախընտրական քարոզարշավով ու երբեմնի գողականների գործերով, մեղա, մեղա․... սատանայի ծիծաղն էլ կքարանա։ Բայց քանի որ այդ մասին մեզ վստահեցնում է երկնային հոր ծառա, առաքինի հավատավոր, որեւէ հանցագործության, բանսարկության ու նման այլ երեւույթների հետ կյանքում հեչ մեկ անգամ չաղերսված Վարդան Ղուկասյանը, չհավատալ նրան, մեծ մեղք կգործենք ։ Գյումրիի նախկին քաղաքապետը, որին իշխանությունները «քցեցին» , նրա հետ դաժան վարվեցին, վերջնական մխիթարություն է գտել Աստծո թագավորությունում։ Մի քանի տարվա «ճգնավորությունից» ու մեկուսացումից հետո ինչպես գիտենք  նա կրկին ասպարեզ է իջել ու հայտնվել  Ծառուկյան Դաշինքում։ Գյումրու նախկին քաղաքապետը քաղաքականություն վերադարձի առիթով ամենայն պատասխանատվությամբ հայտարարեց, թե Աստված կամեցավ, որ ինքը Ծառուկյանի թիմի հետ մասնակցի ընտրություններին․«Ես հհիմա էլ ինձ կուսակցական չեմ համարում, ավելի շատ հոգևորին մոտ եմ դասում: Սիրով եղեք միմյանց նկատմամբ, մի բուռ մարդիկ ենք մնացել, լույսը խավարի տեղ մի դրեք», -հանրությանը որպես հրեշտակ հայտնվեցավ անցյալում սկանդալային պատմություններով հայտնի նախկին քաղաքապետը։«Փառք երկինք-գետին ստեղծող արարիչ Աստծուն, Պողոս Առաքյալին, էնքան բան արեցին, հիմա մենք էլ ապրում ենք, ուզում ենք նմանվել էդ ճանապարհին»,- իր նոր իմիջը այսպես հիմնավորեց նա։ Բայց եթե Աստծո միջամտությունը միայն այդքանով սահմանափակվեր, Վարդան Ղուկասյանը դժվար թե այդչափ հանգիստ ու խաղաղ լիներ։ Իսկ որ տիրոջ ծառան խաղաղ է, ցույց է տալիս քարոզարշավի ընթացքը։ Նախընտրական քարոզչության ժամկետը մոտենում է ավարտին, բայց Վարդան Ղուկասյանի ձայն-ծպտունը չի լսվում։ Բոլոր ընտրություններին հերոսացած երբեմնի կարկառուն ՀՀԿ-ականը ժամանակ առ ժամանակ երեւում է լրատվամիջոցներում, բայց միայն սեր ու խաղաղություն է քարոզում։ Պարզվում է Վարդան Ղուկասյանը անհանգստանալու որեւէ պատճառ չունի, նա ոչ միայն Աստծո կամոք է հայտնվել Ծառուկյան դաշինքում, այլ Երկնային հորն է վստահել ընտրություններն ու հետընտրական պրոցեսները։ «Ձայն բազմաց, ձայն Աստծո, երանի խաղաղասերներին, որոնք Աստծո զավակներ պետք է կոչվեն». լրագրողների՝ իրեն ուղղված հարցերին Ղուկասյանը այսօր կրկին Աստծո անունն է խառնել ու անդավաճան մնացել հոգեւոր զավակի իր իմիջին․«Թե ինչ կլինի, Աստված ցույց կտա, կապրենք կտեսնենք» ,-միեւնույն պահին պատասխանել է նա ընտրությունները կեղծելուց հետո իրենց քայլերի մասին հարցին ։ Ակնհայտ է, որ Ղուկասյանին զսպվածության հստակ հրահանգ է իջեցվել , ու նաեւ հորդոր՝ թաքնվելու Աստծո անվան հետեւում, այլապես դյուզն ինչ ազատության դեպքում նրա դեմն առնելը հնարավոր չի լինելու։ Ղուկասյանը կարող է հավատավոր ու աստվածավախ մարդու դերը խաղալ,քանի նորից չի բարձրացել ձիու վրա, բայց հոգու խորքում գիտի, որ երկնքի բոլոր հրեշտակները միասին ի զորու չեն լինի փրկել իր մեղսակից հոգին, որը Աստծո անվան ետևում թաքնվելով, չարիքներ է գործում: Ի դեպ, Աստվածաշունչը զգուշացնում է հեռու մնալ այդպիսի մարդկանցից, քանի որ իրական հավատացյալը երբևէ իր աղոթքը ուրիշի նկատմամբ առավելություն չի ներկայացնի, ինչպես անում է Վարդան Ղուկասյանը: Եւ , ի վերջո, պարոն Ղուկասյան, Աստված ծաղր չի լինում։ Անի Սահակյան