«Ոչ մեկի այգին քար չեմ ուզում գցել». Արամ Մանուկյան

Ազատության հրապարակում Կոնգրես-ՀԺԿ դաշինքի հրավիրած հանրահավաք-խաղաղության երթի մեկնարկին  ՀԱԿ անդամ Արամ Մանուկյանը հայտարարեց. «Մենք ենք որոշելու այս երկրի ճակատագիրը, մեր երեխեքի  ճակատագիրը»: «Այսօր ասելու եմ միայն դրական, լավ բաներ, ոգևորող բաներ։ Ոչ մեկի այգին քար չեմ ուզում գցել, որովհետև մենք ուրախ ենք:Քանի դեռ պայքարում  ենք, ոչ մի փող, կաշառք, ծախված ուսուցիչ չի որոշելու ՀՀ ճակատագիրը, իրենք են որոշելու այս երկրի ճակատագիրը, իրենց երեխաների ճակատագիրը, քանի դեռ իրենց կամքը ծով է »,- ասաց նա։ «Առաջին անգամ այս 30 տարվա մեր պայքարի մեջ կազմակերպելու ենք խաղաղության երթ։ Այն ուժը, որը հաղթաանակ է տարել ԼՂ-ում, որն ընդարաձսակել է Հայաստանը, այսօր ասում է՝ Հայաստանը պետք է  գնա խաղաղ ճանապարհով։ Ովքեր վաստակել են, նրանք էլ Հայաստանին խաղաղություն կբերեն և  մեր ցանկությունը, մեր կամքը այս առումով անկոտրում է»,- նշեց ՀԱԿ ներկայացուցիչը։ Շատ ասելիք չկա, որովհետև երեկվա Լևոն  Տեր-Պետրոսյանի ելույթից հետո պարզապես ոչինչ ասել հնարավոր չէ,ասաց նա և հավելեց. «Բոլորս հպարատանում ենք, որ ունենք ղեկավար, կուսակցության ղեկավար, ունենք քաղաքական գործ, որը համաշխարհային մակարդակի է, որը ՀՀ ամենաազնիվ, ամենատեղեկացված, ամենամտահոգ, ամենահեռատես, ամենաիմաստուն քաղաքական գործիչն է,  Լևոն Տեր-Պետրոսյանի առաջնորդությամբ դեռևս շատուշատ հաղթանակներ ենք արձանագրելու։ Շնորհակալություն Տեր-Պետրոսյանին, շնորհակալություն Ձեզ, շնորհակալություն Կոնգրես-ՀԺԿ դաշինքին, որ այստեղ ենք ու պայքարում ենք։ Երթով ցույց կտանք, որ գնում ենք արդար, ՀՀ զարգացման, ՀՀ հեռանկարի, ՀՀ անկախության ամրապնդման ճանապարհով»: Սոնա Դավթյան