Ինտրիգը հանգուցալուծվում է,Սերժ Սարգսյանը հստակեցրել է 2018-ից հետո իր մնալ-չմնալու հարցը
Խորհրդարանական ընտրություններից հաշվված օրեր առաջ, վարչապետ Կարեն Կարապետյանի նախաձեռնած «Հայաստանի ներդրողների ակումբ» ֆոնդի գործունեության մեկնարկի օրը Սերժ Սարգսյանը որոշակիացրել է 2018-ի նախագահության ժամկետի լրանալուց հետո իր կարգավիճակի հարցը՝ ուղերձ հղելով իր մրցակիցներին, նախեւառաջ վարչապետ Կարապետյանին, որ պետք չէ ոգեւորվել որեւէ միջոցառումով, ինքը մնալու է 2018-ից հետո, իսկ թե որ պաշտոնում, կորոշի ապագայում: Արցախում զորամասերից մեկի շարահրապարակում զինծառայողների համար կազմակերպված համերգի ավարտին նախագահն անդրադարձել է հարցին, թե ինչ է անելու 2018 թվականից հետո ու որոշակիացրել.«Ինձ անընդհատ հարցնում են՝ ինչ եմ անելու 2018 թվականից հետո։ Ես իմ կյանքի ընթացքում իրոք երբեք չեմ պլանավորել, թե հաջորդ հանգրվանին որտեղ եմ լինելու։ Միշտ հայտնվել եմ այնտեղ, որտեղ մեր անվտանգությանն ավելի պիտանի եմ եղել։ Ես հիմա չգիտեմ՝ ինչ քաղաքական կառուցվածք կլինի 2018-ին, բայց եթե իմ գլխավորած քաղաքական ուժը հաղթի գալիք ընտրություններում, ապա այդ պահի դասավորությունից ելնելով ինչ-որ կարգավիճակում իմ դերը կունենամ մեր ժողովրդի անվտանգության ապահովման հարցում։ Չգիտեմ դա ինչ կարգավիճակ կլինի, բայց հաստատ որևէ ձևաչափով օգտակար կլինեմ»։ Սերժ Սարգսյանի հայտարարությունն ուշագրավ է այնքանով, որ սահմանադրական փոփոխությունների նախաձեռնումից սկսած քաղաքական ու հասարակական շրջանակներում ամենաքննարկվող հարցը եղել է 2018-ից հետո իր կարգավիճակի հարցը, հանուն որի էին հիմնավորվում սահմանադրական փոփոխությունները: Ըստ այդմ՝ նախագահության ժամկետից հետո Սերժ Սարգսյանը պետք է զբաղեցնի խորհրդարանական կառավարման համակարգում երկրի ղեկավար՝վարչապետի պաշտոնը: Սերժ Սարգսյանը 2014-ի բարեփոխումների հանձնաժողովականների հետ հանդիպման ժամանակ թեեւ խոստացավ, որ ինքը պետության ղեկավարի պաշտոնում այլեւս չի առաջադրվի. «Եթե վերջնական քննարկումների արդյունքում իմ ցանկությանը չհամապատասխանող ուղի ընտրվի, նկատի ունեմ պառլամենտական կառավարման մոդելը, ապա ես չեմ հավակնի նաև վարչապետի պաշտոնին։ Վստահ եմ անգամ, որ մեկ մարդը երկու անգամից ավելի իր կյանքում չպետք է հավակնի ընդհանրապես երկրի կառավարման ղեկին Հայաստանում»: Այդուհանդերձ 2015-ին հայաստանյան հեռուստաընկերություններին տված հարցազրույցի ընթացքում հարցին, ի վերջո, 2018 թվականին նախագահի լիազորությունները վայր դնելուց հետո ինչո՞վ է զբաղվելու, զբաղեցնելու է վարչապետի՞, Ազգային ժողովի նախագահի՞, թե նախագահի պաշտոնը, նա կրկին խառնել էր ծաղաքարտերը.«Նախ պետք է ասեմ, որ ես ձեր շտապողականությունը չեմ կիսում, և ինձ կարող են երեք տարի հետո ասել՝ նախկին Նախագահ»:Լրագրողի դիտարկմանը՝ «իսկ երեք տարին լրանալուց հետո՞», Սերժ Սարգսյանն այսպես էր պատասխանել․ «Դա արդեն այլ բան է: Իսկ դրա մասին ես կարծում եմ՝ կխոսենք 2017թ. խորհրդարանական ընտրություններից հետո: Հիմա շատ վաղ է այդ մասին խոսելը, և այս կարևոր թեման, չեմ կարծում, որ համադրելի է իմ քաղաքական ապագայի թեմայի հետ»: «Հիմա հրաժարվու՞մ եք ձեր խոսքերից, որ չեք պատրաստվում դառնալ վարչապետ, նախագահ և ԱԺ նախագահ»,- այս հարցին ի պատասխան, նախագահը նշել էր․ «Ոչ, ես իմ խոսքերից, չասեմ երբեք, չեմ հրաժարվել, բայց հիմնականում, լինի դա կենցաղում, թե քաղաքականության մեջ, ոչ մի բանից չեմ հրաժարվում: Ես ուղղակի չեմ ուզում լավ գործը, սկզբունքային գործը, խառնել մեկ այլ գործի հետ: Սա է իմ ամբողջ նպատակը: Որևէ բանից չեմ հրաժարվում»:Այդ <<երբեքից>> հետո էլ ավելի խորացան կասկածները, որ Սահմանադրությունը փոխելու գլխավոր դրդապատճառը Սարգսյանի իշխանության երկարաձգումն է: Սերժ Սարգսյանն ու իր թիմակիցները անընդմեջ խույս են տալիս անգամ Սարգսյանի մնալ-չմնալու հարցից: ՀՀԿ ղեկավարը մի կողմից բաց էր թողնում կառավարություն տանող դուռը, մյուս կողմից որեւէ հստակություն չէր մտցնում՝ մնալու է, թե ոչ: Սերժ Սարգսյանը այսօր փաստորեն հանգուցալուծել է ինտրիգը՝ անշուշտ մնալու է, որտե՞ղ,սա էլ ինքը կորշի, բա , հո, իզուր չէր նախաձեռնել այդ փոփոխությունները: Նախագահը պատահական չէ,որ կարեւորել է ապրիլի 2-ի ընտրությունների խնդիրը ու թիրախավորված, բայցեւ ոչ հասցեական քննադատել մրցակիցներին, չէ՞ որ այդ ընտրություններն են որոշելու իր իշխանության հարցը նաեւ 2018-ից հետո ու այս համատեքստում անչափ կարեւոր է լինելու միջազգային հանրության գնահատականը: Անի Սահակյան