Աջակցություն Ելք-ին Սերժ Սարգսյանից՝ ակամայից, թե՞ հատուկ

  Ապրիլի 25-ին Արցախ կատարած այցի ընթացքում նախագահ  Սերժ Սարգսյանը ուշագրավ անդրադարձ է կատարել ներքաղաքական ներկա գործընթացներին: Գնահատելով քաղաքական ուժերի նախընտրական քարոզչության ընթացքը՝ ՀՀԿ ղեկավարը հայտարարել է. «Մենք պիտի հասկանանք, որ ապրիլի 2-ը խաղ չէ, սուտ շուտասելուկների մրցույթ չէ, մենք պիտի հասկանանք, որ ապրիլի 2-ին մենք տանիքների վրա լավ ցատկողներ չենք ընտրում, մենք մեր ժողովրդի գոյության իրավունքը պաշտպանողներ ենք ընտրում, մենք համազարկի , հարձակման և հարկ եղած դեպքում հետ քաշվելու հրաման տվողներ ենք ընտրում, դա անելու համար բավարար ներքին ուժ ունեցողներ ենք ընտրում»։ Սերժ Սարգսյանի՝ «տանիքների վրա լավ ցատկողներ» արտահայտությունն, անառարկելիորեն, ուղղված էր «Ելք» դաշինքի անդամ Նիկոլ Փաշինյանին, ով ժողովրդին առավել հասանելի լինելու համար, քարոզչության ժամանակ հաճախ բարձրանում է ավտոտնակների տանիքների վրա՝ շենքերի պատուհաններից նայող քաղաքացիներին վստահեցնելով՝ ելք կա: Վանաձորում ընտրողների հետ հանդիպմանը Փաշինյանը երեկ հայտարարեց, որ ժողովրդին հուսահատության փոսից հանելու համար պատրաստ են անգամ ցատկոտել տանիքներին․ «Եվ ոչ թե Սերժ Սարգսյանի, Գագիկ Ծառուկյանի դաշինքի, Դաշնակցության, մյուսների նման ցատկոտել Սերժ Սարգսյանի ստեղծած հայրենիք կրկեսում»: «Նա մեզ ասում է, թե իրեն դուր չի գալիս, որ մենք տանիք ենք բարձրանում: Բայց կներեք, այսօր Հանրապետական կուսակցությունը որպես պատգամավորի թեկնածու առաջադրել է մարդկանց, ովքեր 10 տարի Ազգային ժողովի պատգամավոր լինելով ոչ միայն տանիք, այլև Ազգային ժողովի ամբիոն չեն բարձրացել: Այդ մարդկանց ինչի՞ համար եք պատգամավորի թեկնածու առաջադրել»,- միեւնույն ժամանակ վրդովված հարց  հնչեցրեց Նիկոլ Փաշինյանը՝ Սերժ Սարգսյանին արձագանքելիս: Անշուշտ, առաջին հայացքից Սերժ Սարգսյանի կոչը Ելք-ի դեմ է, ով փորձել է ցույց տալ այդ ուժի անլրջության աստիճանը, բայց, ի վերջո, հակագովազդն ինքնին գովազդ է, եւ այն էլ ՀՀԿ ղեկավարի կողմից:Այնպես որ Ելք-ի թիմին բարեկամաբար խորհուրդ կտանք այդքան սրտին մոտ չընդունել այդ  ակնարկը: Հանրության գերակշռող մեծամասնության ատելությունը իշխող կուսակցության նկատմամբ ոչ անվիճելի է, ոչ էլ առարկելի, առավել եւս, երբ այդ կուսակցության ղեկավարն է հատուկ անդրադառնում որեւէ ուժի, կնշանակի  ի դեմս այդ ուժի, այս պարագայում՝ Ելք-ի է ՀՀԿ-ն իր հիմնական մրցակցին տեսնում,փաստն ինքնին կարող է ՀՀԿ-ից զզվող զանգվածներին կողմնորոշել դեպի Ելք: Արդյունքում Սերժ Սարգսյանը ոչ թե Ելք-ին վնասում է, այլ հակառակը՝ օգնում: Ի դեպ, առնվազն տարակուսելի է, որ Սերժ Սարգսյանը թափանցիկ ակնարկներ չի արել ոչ Ծառուկյան դաշինքի վերաբերյալ, որը սոցիոլոգիական բոլոր հարցումների արդյունքում ավելի բարձր վարկանիշ ունի, քան ՀՀԿ-ն, դրան գումարած Սերժ Սարգսյանը,ինչպես ինքը հայտարարեց, չի ողջունում Գագիկ Ծառուկյանի քաղաքականություն վերադարձը: Կամ գոնե լեզվի ծայրով խոսեր Օհանյան-Րաֆֆի-Օսկանյան դաշինքի մասին, որի դեմ ակնհայտ ճնշումներ կան: Ստացվում է, որ ՀՀԿ ղեկավարը փաստացի մրցակիցներին մի կողմ թողած, կարեւորում է տանիքների վրա ցատկոտող ու ըստ իր խոսքի տրամաբանության անլուրջ ուժի: Մի քիչ անլուրջ չէ՞… Արամ Վարդանյան