Մնացել է Դոն Պիպոյի հույսի՞ն

Մարտի 25-ին Հայաստանում հայտարարվել է Հայաստանի ներդրողների ակումբ հիմնադրամը, որը ներառելու է Ռուսաստանի 3 տասնյակ հայ գործարարների՝ Սամվել Կարապետյանի գլխավորությամբ: Այդ գործարարները դեռեւս հունվարին Կարեն Կարապետյանի Մոսկվա կատարած այցի ընթացքում հայտարարել էին նրան աջակցելու մասին: Այժմ նրանք հայտարարում են ներդրումային ակումբ ստեղծելու մասին։ Կասկած չկա, որ նախաձեռնությունն ունի նախընտրական նշանակություն, եւ դրանով փորձ է արվելու բարձրացնել իշխանության հանդեպ վստահությունը, միեւնույն պահին նաեւ ներիշխանական պայքարի ակնհայտ դրսեւորում է։ Ճիշտ նույն պահին, երբ Հայաստանում Սամվել եւ Կարեն Կարապետյանները զբաղված էին այս ակումբի հիմնարկեքով ու կարելի է ասել մոտ ապագայում ոսկե սարեր էին խոստանում, ամենեւին ոչ պատահականորեն Սերժ Սարգսյանն էր Արցախում խոսում 2018-ից հետո իր զբաղեցրած տեղի ու դերի մասին, եռամյա քննարկումներից հետո վերջնականապես հանգուցալուծելով ներքաղաքական հիմնական ինտրիգի հարցը՝ 2018-ին նախագահության ավարտից հետո Սերժ Սարգսյանը մնալու է քաղաքական արենայում, թե որտեղ դեռեւս չի որոշել. «Ինձ անընդհատ հարցնում են՝ ինչ եմ անելու 2018 թվականից հետո։ Ես իմ կյանքի ընթացքում իրոք երբեք չեմ պլանավորել, թե հաջորդ հանգրվանին որտեղ եմ լինելու։ Միշտ հայտնվել եմ այնտեղ, որտեղ մեր անվտանգությանն ավելի պիտանի եմ եղել։ Ես հիմա չգիտեմ՝ ինչ քաղաքական կառուցվածք կլինի 2018-ին, բայց եթե իմ գլխավորած քաղաքական ուժը հաղթի գալիք ընտրություններում, ապա այդ պահի դասավորությունից ելնելով ինչ-որ կարգավիճակում իմ դերը կունենամ մեր ժողովրդի անվտանգության ապահովման հարցում։ Չգիտեմ դա ինչ կարգավիճակ կլինի, բայց հաստատ որևէ ձևաչափով օգտակար կլինեմ»,- ասել է նախագահը Արցախում։ Մյուս կողմից՝ գաղտնիք չէ` Կարապետյանների պլանը Հայաստանում ոչ միայն տնտեսական, այլեւ քաղաքական կապիտալի տնօրինման հետ կապված։ Ստացվում է, որ իշխանությունն այսուհետ հանդես է գալու երկու ճակատով եւ թիմերի հավաքագրման պրոցես է ծավալվելու։ Այս համատեքստում ուշագրավ է Դոն Պիպոյի հայտնությունը, նույն ինքը էջմիածնեցի Արթուր Ասատրյանը, որը բնակվում է Իտալիայում, բացի դրանից բիզնեսներ ունի նաեւ Ռուսաստանում։ Ներդրումների ակումբի ստեղծման օրը նա «սկայպով» կապի է դուրս եկել հարազատ քաղաքի բնակիչների հետ, աչքալուսանք է տվել, որ շուտով գալու է Հայաստան իրականացնելու ներդրումային ահռելի ծրագրեր։ Նա շեշտել է, որ անձամբ ճանաչելով Կարեն Կարապետյանին, քաջատեղյակ լինելով նրա աշխատելաոճին, անհատապես սատարում է վարչապետին և հավատում է, որ Կարեն Կարապետյանի հետ  կարող են կամաց- կամաց կարգավորել Հայաստանի տնտեսությունը։ Ասատրյանը խոստացել է, որ մոտակա տարիների ընթացքում բացվելու են շուրջ տասներկու հազար աշխատատեղեր։ Եթե հիշում եք Դոնը իր «հեղիանակավոր» կարծիքը լսելուց մեզ չզրկեց նաեւ այն ժամանակ, եր Կարապետյանը նոր նշանակվել էր վարչապետի պաշտոնում․«ՀՀ վարչապետ Կարեն Կարապետյանը շատ բանիմաց, գրագետ, հավասարակշռված, զուսպ ու բանիմաց գործիչ է: Նա 10 քայլ առաջ է մտածում ու տեսնում: Ես վստահ եմ, եւ մեծ հույսեր ունեմ, որ մեր երկրում այդուահանդերձ կլինեն փոփոխություններ ու տեղաշարժեր: Ասեմ ավելին. իմ ընկերական շրջապատից շատ-շատերը, այդ թվում նաեւ ես, մտադրություններ ունենք լուրջ ներդրումային ծրագրեր իրականացնել մեր հայրենիքում, որպեսզի կարողանանք մենք էլ մեր հերթին, մեր լուման ունենալ մեր երկրի առաջխաղացման ու զարգացման համար», – ասել էր նա։ Հետաքրքիր է, թե Կարեն Կարապետյանն իրեն ինչպես է զգալու նոր թիմում, որի «առաջին ծիծեռնակները» կրիմինալ շրջանակներից են՝ ի դեմս Դոն Պիպոյի։ Մամուլում տարիներ շարունակ Պիպոյի «հերոսությունների» մասին հատորյակներ են գրվել։ Իսկ մենք գիտենք, գոնե այդպես է ներկայացվել, որ վարչապետը աչքով աչք չունի այդպիսի տարրերի հետ, պաշտոն ստանձնելու առաջին իսկ օրերից էլ լծվել էր այդ տարրերի «մաքրազարդմամբ», վկան մեր հալածյալ Լիսկան է։ Անի Սահակյան