Սամվել Բաբայանի ձերբակալությունը շոու է․ փորձագետ
Քաղաքագետ Արմեն Բադալյանը քաղաքական ենթատեքստ է տեսնում ԼՂՀ ՊԲ նախկին հրամանատար, Օսկանյան-Րաֆֆի-Օհանյան դաշինքի համակիր Սամվել Բաբայանի ձերբակալության մեջ։ Այս մասին Hayeli.am-ի հետ զրույցում ասաց նա․ «Մեղադրել մի մարդու, որը ժամանակին եղել է ԼՂՀ ՊԲ հրամանատարը, որ փորձել է սահմանով զենք տեղափոխել, մեղմ ասած լուրջ չէ, որովհետեւ ով-ով, բայց Սամվել Բաբայանը կիմանար՝ ինչպես անցկացնել այդ զենքը սահմանով, այլ ոչ թե սահմանային անցակետով, որպեսզի հետագայում կարողնանան հայտնի ծառայությունները գտնեն»,-ասաց նա՝ համոզմունք հայտնելով, որ ցանկության դեպքում Բաբայանը կարող էր այնպես տեղափոխել այդ զենքերը, որ իրավապահ մարմինների ուշադրության կենտրոնում չհայտնվեր։ Բադալյանի խոսքով՝ հայ-վրացական սահմանն այնքան խիստ չի հսկվում, ինչպես՝ թուրքականը եւ ադրբեջանականը, ուստի ցանկության դեպքում այդ ճանապարհով կանցկացներ․ «Այս ամենը շոու է հիշեցնում, բայց կարող եմ ասել, որ բավականին նպաստում է դաշինքի աճին, չեմ ասում դրա համար էին անում, որ վարկանիշը բարձրանա, բայց ինչպես միշտ իշխանությունների ցանկացած գործողություն տալիս է հակառակ արդյունքը»,-ասաց նա։Փորձագետը հիշեցնում է Բաբայանի կյանքի փորձի մասին, որ մասնակցել է պատերազմին եւ զենք-զինամթերք կարողացել Արցախ տեղափոխել, ուստի խնդիր չէր լինի հիմա էլ գաղտնի նման բան իրականացնելը։ «Եւ հիմա հանկարծ փորձել է ինչ-որ շինարարական ցելաֆոններով պատած անցկացնել, լուրջ չէ կարելի է գործ սարքել, բայց դա էլ պետք է խելքով լինի»,-ասաց նա։
Սեդա Ղուկասյան