Սամվել Բաբայանը հարցաքննվել է
ԼՂՀ ՊԲ նախկին հրամանատար, Օհանյան-Րաֆֆի-Օսկանյան դաշինքի համակիր Սամվել Բաբայանը չի ընդունում այն մեղադրանքը, որի մեջ կասկածվում է։ Այս մասին Hayeli.am-ի հետ զրույցում ասաց Բաբայանի պաշտպանը՝ Ավետիս Քալաշյանը։ Փաստաբանի խոսքով՝ իր պաշտպանյալն անհիմն է համարում մեղադրանքը․ «Նա որեւէ առնչություն չունի այդ գործի հետ»,-ասաց պաշտպանը։ Տեղեկացանք, որ Սամվել Բաբայանը հարցաքննվել է․ «Իր դիրքորոշումը հայտնել է»,-ասաց պաշտպանը՝ չմանրամասնելով։ Հետաքրքրվեցինք՝ Բաբայանի պահվող պայմաններից, պաշտպանն ասաց, որ նորմալ մեկուսարանային պայմաններ են։ Ինչ վերաբերում է հարցին, թե արդյոք կապ տեսնո՞ւմ է ձերբակալության եւ իր՝ ՕՐՕ դաշինքի ակտիվ համակիր լինելու մեջ, պաշտպանն ասաց․ «Առայժմ զերծ է մնում նման կարծիք հայտնելուց»։ Հիշեցնենք, որ երեկ Սամվել Բաբայանը ԱԱԾ-ի կողմից ձերբակալվել է Իգլա տեսակի հրթիռա-զենիթային համակարգ մաքսանենգ եղանակով ՀՀ տեղափոխելու համար։ Սեդա Ղուկասյան