«Մեր կաշին փրկելու խնդիր չունեինք». Գագիկ Ծառուկյանը՝ Դիլիջանում

«Ծառուկյան» դաշինքի առաջնորդ Գագիկ Ծառուկյանն այսօր հանդիպում ունեցավ նաև դիլիջանցիների հետ: Նախ նա խոսեց իր քայլերի մասին, այնուհետև նշեց, որ քաղաքականություն մտնելուց հետ է կանգնել, քանի որ չէր ցանկանում արյուն թափվեր: «Մարդիկ ասում են՝ Ծառուկյան, էս անգամ հետ չկանգնես: Եթե հետ չկանգնեի, քաղաքականության իմ էջը չփակեի, տանելու էր արյունահեղության, ու ոչ թե 1, 5, 10 մարդ, այլ 1000, 2000, 3000: Ծառուկյանը չէր կարող ինքն իրեն փրկելու համար քայլ կատարեր, տեսնելով ու զգալով ժողովդրի հավատը: Չէի կարող ասել՝ ժողովուրդ ջան, դուրս եկեք, ինձ ուզում են ստուգել: Այլ ասել եմ իմ ժողովրդի մատից արյուն չթափի»,- նշեց Գագիկ Ծառուկյանը: Ինչպես հայտարարեց՝ իրեն պաշտոն, 5 նախարարություն եւ 4 մարզպետ պետք չէր: «500 հազար ձայն էինք հավաքել, բայց ես հրաժարվեցի: Եվ մեր նախարարներն ու մարզպետներն անմիջապես հրաժարվեցին: Արժանապատիվ մարդիկ միանգամից դիմում գրեցին, դուրս եկան: Այնպես, որ այսօրվա վիճակի համար մենք մեղավոր չենք, ղեկավարողը մենք չենք եղել ու մեր կաշին փրկելու խնդիր էլ չունեինք»,- ասաց Գագիկ Ծառուկյանը: Անի Աղազարյան