Մի վերջին «անպատեհ» հնարավորություն
«Կոնգրես-ՀԺԿ» դաշինքի նախըտրական շտաբը հայտարարություն է տարածել, որտեղ կոչ անում ԱԺ ընտրությունները ապրիլի 2-ից տեղափոխել ապրիլի 9-ին։ Դաշինքն իր պահանջը պայմանավորում է ապրիլյան պատերազմի զոհերի հիշատակը հարգելու անհրաժեշտությամբ: Հայտարարության մեջ մասնավորպես ասվում է. «Ապրիլյան պատերազմի զոհերի հիշատակի առաջին տարելիցը միայն նրանց հարազատներին ու մտերիմներին չի վերաբերում։ Ինչպես մեկ տարի առաջ, դրա արժևորումն ու վերաբերմունքը համազգային ընդգրկում է ունենալու։ Այդ օրը բոլորս ենք մասնակցելու զոհերի հիշատակի հարգման արարողություններին, ուստիև նույն օրը համապետական ընտրությունների անցկացումը, մեղմ ասած, անպատեհ է»։ Ընտրություններից ընդամենը երկու շաբաթ առաջ նման պահանջ ներկայացնելը, մեղմ ասած, զարմանալի է: Հատկապես, որ ՀԱԿ խմբակցությունը դեռեւս հունվարի կեսերին Ազգային ժողովում ստորագրահավաք կազմակերպեց այս հարցով Սահմանադրական դատարան դիմելու համար, բայց հնարավոր չեղավ հավաքել պատգամավորների՝ անհրաժեշտ թվով ստորագրություններ։ Փաստաթուղթը ստորագրել էին մոտ 15 պատգամավորներ՝ Լևոն Զուրաբյանը, Արամ Մանուկյանը, Ստեփան Դեմիրճյանը, Գագիկ Ջհանգիրյանը, Էլինար Վարդանյանը, Հայկ Խաչատրյանը, Վահե Էնֆիաջյանը, Վահե Հովհաննիսյանը, Ստեփան Մարգարյանը, Վարդան Օսկանյանը, Հրանտ Բագրատյանը, Նաիրա Զոհրաբյանը, Թևան Պողոսյանը, Միքայել Մելքումյանը։ Փաստաթուղթը Սահմանադրական դատարան ներկայացնելու համար անհրաժեշտ էր նվազագույնը 27 պատգամավորի ստորագրություն։ Ընտրությունների նշանակման օրվա հետ կապված՝ ընդդիմադիրների արտահայտած մտահոգություններից հետո, որոնք թե՛ իրավական, թե՛ բարոյական հարթությունում են, Սերժ Սարգսյանը հայտարարեց, որ դեմ չէ ընտրությունների օրը 4-5 օրով տեղափոխելուն, եթե ընտրություններին մասնակցող բոլոր ուժերի հետ համաձայնության գան: «Անձամբ ես դեմ չեմ եղել հրամանագիրը ստորագրելու պահին և հիմա էլ դեմ չեմ 4-5 օրով տեղափոխել ընտրությունների օրը: Բայց մի փոքր էլ սպասենք, երբ հայտնի կդառնան ընտրությունների բոլոր մասնակիցները, և մենք կկարողանանք նրանց հետ գալ համաձայնության՝ բոլորի հետ առանց բացառության, ես կարծում եմ՝ մեզ ոչինչ չի խանգարի, եթե ընդամենը մի քանի օրով հետաձգենք ընտրությունները: Եվ եթե գանք քաղաքական համաձայնության, ապա, վստահ եմ՝ մեր իրավաբանները դրա հիմնավորումները շատ հանգիստ կարող են տալ, և ընտրական պրոցեսը ոչնչով չի խաթարվի: Բայց համբերենք, սպասենք, տեսնենք՝ ի՞նչ է լինելու»,- ասել էր Սերժ Սարգսյանը: Այսքանից հետո ՀԱԿ-ի հերթական փորձը ի՞նչ շարժառիթներ ունի , մնում է անհասկանալի: Արդյոք ՀԱԿ-ՀԺԿ դաշինքն էլ իր հերթին է ստուգարք պատրաստել ընդդիմադիրների գործընկերների համար՝ հանրությանը ցույց տալու, թե ով է հարգում զոհերի հիշատակը, ով՝ ոչ: Որքանով է ռեալ այդ առաջարկի բավարարումը հիմա, երբ նախընտրական նախապատրաստությունները գրեթե ավարտվել են, տվյալ ամսաթվով տպվել բոլոր փաստաղթերը, կարճ ասած՝ ահռելի գումարներ վատնվել, որոնց մասին ԿԸՀ-ն թերեւս կիրազեկի, այս ամենը տեխնիկապես անհնարին է դարձնում ընտրությունների օրվա փոփոխությունը: Իսկ գուցե այս ուժի համար սա եւս մի հնարավորությո՞ւն է՝ ընտրություններից հաշված օրեր առաջ դիվիդենտներ շահելու համար: Անի Սահակյան