Դեռ ինչե՜ր են սպասվում
Ակնհայտ սրվել են Ծառուկյան ու Ելք դաշինքների հարաբերությունները: Տակավին օրեր առաջ անհավատալի վերլուծություն եղավ Փաշինյանի ազդեցության տակ գտնվող լրատվամիջոցում, թե երկու դաշինքները կարող են ապրիլի 2-ի ընտրություններից հետո միավորվել, կոալիցիա կազմել: Այդ վերլուծության հիմք էր դարձել Ծառուկյան դաշինքի անդամներից մի քանիսի հայտարարություններն առ այն, որ կոալիցիա չեն կազմի Հանրապետական կուսակցության հետ: Ընդամենը օրեր անց այդ երկու դաշինքների ներկայացուցիչները իրար ոչնչացնելու հայտարարություններ են անում: Ուշադրության արժանի է այն հանգամանքը, որ այդ խիստ անիրատեսական վերլուծությունը դեռ չէր հասցրել քննարկվել քաղաքական ու քաղաքագիտական հարթություններում, Ելք-ում պայթյուն եղավ: Մարտի 18-ին Արմավիրում քարոզարշավի ժամանակ «Ելք» դաշինքի 2-րդ հորիզոնականը զբաղեցնող «Հանրապետություն» կուսակցության առաջնորդ Արամ Սարգսյանը հայտարարեց, որ Գագիկ Ծառուկյանը չի կարող ընդդիմություն լինել. «Այս երկրում բոլորդ էլ գիտեք, որ անգամ կաթի մթերման կետ ունենալ հնարավոր չէ, եթե դու իշխանության հետ չես համագործակցում։ Կփակեն հենց հաջորդ օրը։ Ինչպե՞ս կարող է երկրի ամենահարուստ մարդը ընդդիմադիր լինել։ Դա անհնար է։ Կներեք ինձ, բայց ես ինչպես Հայաստանում ապրող ղարաբաղցիների հայրենասիրությանը չեմ հավատում, այնպես էլ չեմ հավատում Գագիկ Ծառուկյանի ընդդիմադիր լինելուն։ Նա Արմավիրում ասաց. «Ժողովուրդ ջան, մենք մեր գործունեությամբ գիտենք, որ ես ձեզ սիրում եմ»։ Հիմա պատկերացնո՞ւմ եք, որ այդ մարդուն ընտրում եք ու նա Հայաստանը ներկայացնում է ասենք ՄԱԿ-ում, ու մտքի այսպիսի գոհարներ է ասում» Aravot.am-ի հետ զրույցում «Ծառուկյան» դաշինքով պատգամավորության թեկնածու, ԲՀԿ նախագահ Նաիրա Զոհրաբյանը պատասխանել է Արամ Զավենիչին. «Երբ իշխանության հաճախորդները սկսում են անասելի ակտիվություն ցուցաբերել, դա մեկ բանի վկայություն է՝ «Ծառուկյան» դաշինքը բացարձակ առաջատար է: Դա ցույց տվեցին նաեւ նախընտրական քարոզարշավի 15 օրերը: Իշխանությունը կանխազգալով իր մոտալուտ պարտությունը, հրապարակ է արտանետում իշխանական տարբեր լաբորատորիաներում բուծված իր հաճախորդներին»: Նաիրա Զոհրաբյանը խոստանում է, որ ապրիլի 2-ին կայանալիք խորհրդարանական ընտրությունների արդյունքում սպասվող իշխանափոխությունից հետո քաղաքական դաշտը լքելու են ոչ միայն գործող իշխանությունները, այլ նաեւ «նրանց բոլոր հաճախորդները՝ Արամ Զավենի Սարգսյանի գլխավորությամբ»: Նիկոլ Փաշինյանին այլ բան չէր մնում, քան ինքն էլ անցնել արդարացումների ու հերքել այն վերլուծությունը, որը ամենայն հավանականությամբ չէր քննարկվել թիմակիցների հետ: Նա ֆեյսբուքյան ուղիղ եթեր կազմակերպեց, որի ժամանակ ի թիվս այլ հարցերի խոսեց նաեւ Ծառուկյանի հետ համագործակցելու, ավելի շատ վերջինիս ընդդիմադիր լինելու մասին: Փաշինյանը չկիրառեց իր բառապաշարը, որը սովորաբար գործի է դնում Ծառուկյանի մասին խոսելիս, հանդես եկավ ակնհայտ զուսպ գնահատականներով, արդյունքում եկավ թիմակցի եզրահանգմանը՝ կասկածի տակ դնելով Ծառուկյանի ընդդիմության հարցը: Նա մասնավորապես հարցադրումներ հնչեցրեց՝ ինչու Սերժ Սարգսյանը չարգելեց Ծառուկյանի վերադարձը քաղաքականություն: Փաշինյանը հիշեց, թե ինչպես երկու տարի առաջ Սերժ Սարգսյանը Ծառուկյանին հեռացրեց.<<Այսինքն նա ունի լծակներ ու երկու տարի անց այդ լծակները չեն պակասել>>: Փաշինյանը կարծիք հայտնեց, որ Ծառուկյանը վերադարձվել է ընդդիմության ձայները խլելու համար, ընտրություններից հետո միայն Սերժ Սարգսյանը կորոշի ԲՀԿ ղեկավարի հետ ինչպես վարվել: Չի բացառվում, ըստ Փաշինյանի, որ Սերժ Սարգսյանը կրկնի սցենարը ու ԲՀԿ-ից պոկի իր անդամներին, ինչպես արեց ԲՀԿ-ից դուրս մնացածների դեպքում: Մի խոսքով՝ Փաշինյանը հանգամանալից հիմնավորեց Ծառուկյանի կասկածելի ընդդիմության կարգավիճակը: Եւ այսպես, ինչ է ստացվում, ստացվում է, որ բառացիորեն օրեր առաջ հնարավոր էր Ծառուկյանի հետ համագործակցությունը, իսկ հիմա այդ գործընկերը կասկածելի է ու ոչ ընդդիմադիր:Իրականում պարզ է, որ ընդդիմության տեղի կռիվը քաղաքական ուժերին մղում է միմյանց նկատմամբ փորձությունների, կամ էլ Ելք-ը թասիբի է գցում Ծառուկյանին՝Սերժ Սարգսյանից պոկելու համար: Եւ ամենեւին էլ չի բացառվում հետընտրական անհավանական զարգացումներ, ինչպիսին Ելք-ի ու Ծառուկյանի միավորումն է: Անի Սահակյան