Դեղին քարտ մարզպետին, թե՞ Ծառուկյանին
Նախընտրական քարոզարշավի վերջին ակորդը բավականին ուշագրավ է ստացվում Ծառուկյան դաշինքի համար: Սյունիք կատարած այցի ընթացքում Ծառուկյանն ու իր թիմը արտառոց վերաբերմունքի արժանացան սյունեցիների կողմից: Մինչ այս պահը սահուն ընթացքով առաջ սլացող Ծառուկյան դաշինքի առաջ որեւէ մարզում, որեւէ համայնքում ակնհայտ խոչընդոտներ չեն ստեղծվել իշխանությունների կողմից, կամ առճակատում տեղի չի ունեցել: Ամեն դեպքում տպավորությունն այնպիսին, որ միմյանց չխանգարելու, առճակատման չգնալու եւ փոխհարաբերությունները չսրելու ոչ հրապարակային պայմանավորվածություն է կայացել: Իսկ Սյունիքում Ծառուկյանն ու թիմակիցներն արժանացել են տեղացիների անբարեհաճ վերաբերմունքին: Այդ ամենն այնքան ակնառու է եղել, որ սյունեցիների անհյուրընկալության մասին բարձրաձայնել է նաեւ Գագիկ Ծառուկյանը: Գորիսում Ծառուկյանը բացահայտ մեղադրել է տեղի իշխանություններին մարդկանց ահաբեկելու և վախի մթնոլորտ սերմանելու համար: Կոնկրետ խոսել է մարզպետ Վահե Հակոբյանի գործունեության մասին «Ձեր նոր մարզպետը, որ եկել է ու մարդկանց կյանքից տեղյակ չի, սովորեցրել է մարդկանց, որ ինձ վատ հարց տան: Ես պատրաստ եմ բոլորի հարցերին պատասխանելու: Հարցնում է` 2012-ին ծրագիր ներկայացրեցիք ու ոչ մի բան չեղավ: Պատասխանեցի`գնա, քեզ սովորեցնողին ասա, որ պարոն Ծառուկյանը տեսավ, որ 50+1 չհավաքեց, դրա համար կոալիցիա չկազմեց, որ ժողովուրդը չասի, բա ինչո՞ւ դա չեղավ»,- հայտարարել է նա: Հասարակ քաղաքացիների անբարյացակամությունից զատ Ծառուկյանի այցին են անդրադարձել նաեւ քաղաքային իշխանությունները: Կապան քաղաքի ղեկավարը, որտեղ Ծառուկյանը տեղական իշխանություններին քննադատող հայտարարությամբ է հանդես եկել: «Ես խոստացել էի, ուզում էի Ղափանում ջրաշխարհ կառուցել, չթողեցին, տեղը չհատկացրին: Այնտեղ ուզում են ինչ-որ բնակարան կառուցեն, մինչև այսօր էլ քարուքանդ, ավերված մնացել է»,- ասել է Ծառուկյանը,Կապանի ՀՀԿ-ական քաղաքապետ Աշոտ Հայրապետյանը armtimes.com-ի հետ զրույցում հերքել է Ծառուկյանին, ասելով, որ ինքը հինգ տարի է քաղաքապետ է, բայց նման առաջարկ չի ստացել: Ավելին ՀՀԿ-ական քաղաքապետը խոսել է նաեւ Ծառուկյանի մեկ այլ չիրականացրած խոստումի մասին, որը վերջինս տվել է դեռեւս 2012-ին. <<Ինչ վերաբերվում է մեր կողմից կարեւորվող առաջարկին, ոչ թե առաջարկին, այլ խոստումին, դա Կապան քաղաքում կառուցվելիք մասնագիտացված ատլետիկայի սպորտդպրոցն էր իր «մանեժով», որը մինչեւ հիմա ոչ միայն չի իրականացվել, այլ խոսք էլ չի եղել, թե այն երբ կարող է իրականացվել: Խոստումը տրված էր Ծառուկյանի կողմից>>: ՀՀԿ-ական քաղաքապետի հերքումներին անդրադարձել է նաեւ Ծառուկյանի մամլո խոսնակ, պատգամավորության թեկնածու Իվետա Տոնոյանը՝ մեկ անգամ եւս վերահաստատելով Ծառուկյանի խոստման հավաստիությունը:Իսկ ատլետիկայի դպրոցի խոստման մասին նշել է, որ այն կառուցվել է ոչ թե Կապանում, այլ Սիսիանում, որի բացումը կլինի վաղը: Այսպիսով՝ Սյունիքի մարզում Ծառուկյան դաշինքին ցուցաբերած վերաբերմունքից կարելի է երկու հետեւություն անել, կամ իշխանությունը ինչ-ինչ հանգամանքներից ելնելով փոխել է վերաբերմունքը Ծառուկյանի հանդեպ եւ գրոհելու հրահանգ է իջեցվել ներքեւներին, ի դեպ, դրա համար կարող էին հիմք հանդիսանալ վերջին սոցհարցումները, որոնց արդյունքներով ԲՀԿ-ի վարկանիշը ավելի բարձր է, քան ՀՀԿ-ինը, կամ էլ ինչպես Ծառուկյանն է նկատել, մարզպետն է ինքնագործունեության անցել եւ իրեն բնորոշ մեթոդներով ճնշումներ գործադրել մարզի բնակիչների, ենթակաների վրա, որոնք էլ համապատասխան վերաբերմունք են դրսեւորել:Առաջիկայում պարզ կդառնա ով է ստանում կամ ստացել դեղին քարտ՝ արզպե՞տը պայմանավորվածություն խախտելու, թե Ծառուկյանը ինչ-ինչ պատճառներով: Անի Սահակյան