Զռռալու ,գործի ու էյֆորիայի արանքում
Որքան հեռանում է նախընտրական քարոզարշավի մեկնարկը, ՀՀԿ-ի փիառն ու վերարտադրվելու ծանր օպերացիան իր ուսերին վերցրած վարչապետ Կարեն Կարապետյանը ազարտի է ընկնում, մարզային հանդիպումների ժամանակ նորանոր բարձունքներ է նվաճում՝ հնարավորինս հեռանալով ժողովրդից, շարքային քաղաքացուց: Արագածոտնի մարզում մի խումբ գյուղացիների հետ Կարապետյանի զրույցը դեռեւս մնում է հաղթահարված: Մասնավորապես, լսելով նրանց խնդիրները, բարձրացրած հարցերը, վարչապետն ասել է. «Վա՜յ, մամա ջան, արա դուք ինչ տիպ եք…»։ Ապա շարունակել է. «Մեր ծրագիրը չե՞ք կարդացել։ Տելեվիզոր նայո՞ւմ եք»։ Գյուղացիների դրական պատասխանին, որ այո՛, նայում են, իրենց էլ շատ են տեսել հեռուստացույցով, վարչապետն արձագանքեց «Ես 5 տարվա ծրագրի մասին 3 ամիս է՝ զռռում եմ։ Նենց չի, որ ինձ տեսած լինեք՝ այդ ծրագիրը լսած չլինեք։ Լսել եք, չէ՞։ Բա որ առավոտ զարթնում, կոֆե եք խմում, թրաշվում եք կամ չեք թրաշվում, մտքներովդ չի անցել չէ՞՝ մի հատ գնանք՝ ծրագիրը նայենք, այս մարդն այսքան զռում է»։Գյուղացի կանանցից մեկն էլ նկատեց. «Այ բալամ, էս խեղճին «գռուզիտ» եք արել»։ Իսկ վարչապետն այսպես արձագանքեց. «Ինձ «գռուզիտ» անելը դժվար է»։ Տխուր, անչափ տխուր է, երբ գործադիր մարմնի ղեկավարն այսքան կտրված է իրականությունից, եթե չասենք ամբողջովին անադեկվատության տիրույթում է՝ կարծելով, թե ՀՀ հեռավոր համայնքներում մարդկանց դարդն ու ցավը ՀՀԿ-ի ծրագիրն է ու առավել եւս այդ ծրագրի հետ մեծ հույսեր են կապում: Եթե Կարեն Կարապետյանն առաջին քայլերն է անում քաղաքական մեծ թատերաբեմում, ապա շարքային քաղաքացիներս իր պես տասնյակ մեծ դերասանների ենք ճանապարհել բեմից, բայց հիմա խաղն այնքան անհետաքրքիր է, սյուժեն կրկնվող, որ ծափահարելու առանձնապես հետաքրքրություն էլ չի մնացել: Բայցեւայնպես, մեծահարգ վարչապետ, խնայեք ձեզ եւ ձեր ձայնալարերը ու եկեք՝ էլ մի <<զռռացեք>>,այ, եթե դրա փոխարեն գործ արած լինեիք, հավատացնում ենք՝ զռռալու անհրաժեշտություն չէր առաջանա: Վարչապետի խիստ դիտարժան վարքը ունի նաեւ այլ բացատրություն, որի անունն է գերհոգնածություն, գերլարվածություն: Ի վերջո, հանաք բան չէ մտնել սարսափելի, գրեթե անհաղթահարելի բեռի տակ, որի համար այդքան կարծր ուսեր էլ չկա… Իսկ գուցե Կարեն Կարապետյանի մոտ էիֆորիկ տրամադրություններ են, ի վերջո, շոումենին ցուցադրվելու լայն հարթակներ են տրվում, մեծ հանդիսատեսով: Անի Սահակյան
Հետևեք մեզ Viber-ում
