Մահապարտ աղջիկը գցել է ռումբն ու հանձնվել իշխանություններին

Դեռահաս աղջիկը, ում «Բոկո Հարամ» խմբավորման զինյալներն ուղարկել էին ահաբեկչական ակտ իրականացնելու, որոշել է խնայել իրեն և հանձնվել է իշխանություններին, հաղորդում է Associated Press-ը: Ինչպես պատմել է տեղի ինքնապաշտպանական ուժերի ներկայացուցիչներից մեկը, ահաբեկիչները աղջկան մահապարտի գոտի էին հագցրել և հրահանգել պայթեցնել իրեն որևէ մարդաշատ վայրում: Բայց վախեցած աղջիկը մահապարտի գոտին հանել է և հանձնվել իշխանություններին: Ավելի ուշ նա ցույց է տվել, թե որտեղ է պայթուցիկը գցել: Հաղորդվում է, որ նա նոր տեղեկություններ է հաղորդել խմբավորման նախատեսած ահաբեկչություններից: Աղջիկը նաև ասել է, որ իր հետ ևս երկու աղջկա էին ուղարկել, որոնց իրականացրած ահաբեկչություններից 60 մարդ է մահացել: Նշենք, որ «Բոկո Հարամ» արմատական խմբավորումը պարբերաբար դիվերսիաներ է իրականացնում Նիգերիայի հյուսիսարևելյան շրջաններում, ինչպես նաև՝ հարևան երկրների հետ սահմանամերձ գոտիներում: Այդ կազմակերպությունը դեմ է արևմտյան կրթական համարգին և փորձում է ամբողջ երկրում տարածել շարիաթի օրենքը: Վերջին 6 տարիների ընթացքում «Բոկո Հարամ» ահաբեկչական խմբավորման զոհ է դարձել ավելի քան 20 հազար մարդ: