Сладкая пара

  ՀՀԿ-ի նախընտրական քարոզարշավը գնալով  հայտնի երգի նոր տեսահոլովակ է դառնում.<<Ես քեզ, դու՝ ինձ, ու թող բոլորը մեզ տեսնեն, ուրախ ու ժպտերես…>>: ՀՀԿ-ի քարոզչությունն իր վրա վերցրած Կարեն Կարապետյանը կուռք է դառնում կուսակցական հարթությունում: Առաջին երկրպագուն այդ արշավի մասնակից Արփինե Հովհաննիսյանն է, հուսով ենք նա կլինի նաեւ վերջինը, որովհետեւ մի մեծ, շատ մեծ, բայց ոչ այնքան տաղանդաշատ դերասանն էլ  բավական է մեր փխրուն դարձած սրտերը հիմնահատակ ավերելու համար: Երբ Կարեն Կարապետյանին նոր-նոր էին հրավիրել Հայաստան ու վստահել գործադիր մարմնի ղեկավարումը, լայն զանգվածների մոտ  նրա համակրելի արտաքինն ու սոցիալապես ապահով կարգավիճակը մեծ հույսեր էր արթնացրել, որ , ի վերջո, բան է փոխվելու: Ամիսներ են անցել ՝ հույսը վերափոխելով հերթական վտանգավոր հուսալքության, գործը՝ շոուի, որն ամեն օր ենք տեսնում հեղինակի կատարմամբ: Ու հիմա պարզվում է, որ ՀՀԿ-ի մեծագույն շոումենը երկրպագուների  պակաս չունի: Արփինե Հովհաննիսյանի վերջին ելույթները ինչպես դասականը կասեր՝ ամբողջովին Կարեն Կարապետյանի <<գծի մեջ>> են, անգամ ժեստիկուլացիան, ուսերի ու ձեռքերի շարժուձեւը, լակոնիկ հարց-պատասխանը, հերքում-հաստատումը եւ այսպես շարունակ: Փաստորեն, քիչ էր Արփինե Հովհաննիսյանի դեմագոգիան, ոչինչ չասող, որեւէ միտք չհետապնդող  բառկույտի միալար ու երկարաշունչ կրակահերթը, որը սովորաբար բնորոշ է խելքի բացակայությությանը, քանի որ մարդը չի կարող րոպեներ շարունակ բառեր շաղ տալ, բայց ոչ մի իմաստ չհայտնել: Մեզ քիչ էր տիկին նախարարի  չխչփող հայացքը, որն ուղեկցվում էր շուրթերի համապատասխան ընդգծված կծկումներով, ասես Հովհաննիսյանը իսկապես ծամում է մեր ուղեղները:Ինչպես շատերը, Արփինե Հովհաննիսյանն էլ  նոր սթայլ է գտել՝ վարչապետ սթայլը: Գուցե հաշվարկելով, որ դա է իր կարիերայի բարձունք տանող միակ ճանապարհը, Հովհաննիսյանը որոշել է մինչեւ վերջ տրվել ազարտին ու դառնալ վարչապետի առաջին ֆանատը, վստահաբար նա երկար է հայելու առաջ  կրկնօրինակման փորձեր արել, քանի որ  բավականին հաջողված է.<<Պոպուլիստական հայտարարություններ, չենք անելու, չենք տալու խոստումներ, որոնք չեն իարկանացվելու>> Կարապետյանի կտրուկ ոճով Նորքի 2-րդ զանգվածում հայտարարեց Հովհաննիսյանը ու ելույթը շարունակեց նույն վարչապետական ոճով.<<Լավագույն դեպքում երեքից մեկն է հավատում դատական իշխանությանը, խնդիր է սա արդյոք, համարոմ եմ ես սա խնդիր, իհարկե՝ այո>>: Ինքը՝  Կարեն Կարապետյանը յուրօրինակ ծանծաղությամբ  պատասխանեց նաեւ մասիվցիների հարցերին: Հանդիպման ընթացքում Կարեն Կարապետյանը հասցրեց անգամ անեկդոտ պատմել, խորհուրդ տվեց, որ ազատվենք նեգատիվ տրամադրությունից։ «Այնքան ենք նեգատիվը տեսնում, որ այդ ամենը բերելու է նրան, որ պառավելու ենք։ Ժպտացե՛ք, փոխե՛ք տրամադրությունը»,- ասաց վարչապետը ու երրորդ անգամ պատմեց փղի անեկդոտը: Նա իր ոճին անդավաճան է նույնիսկ հումորի ժանրում: Մի կին, դիմելով Կարապետյանին հարցրեց. «Պարոն վարչապետ, հայ աղջիկների եւ կանանց 80 տոկոսը Ձեզ համակրում է: Վերջը ո՞նց է լինելու»:Կարեն Կարապետյանը պատասխանեց կարճ. «Վերջը լավ է լինելու»: Անի Սահակյան